Ang Labing Hinungdanong Buluhaton
1. Unsang mga sakripisyo ang atong himoon tungod sa atong dakong pagpabili sa ministeryo?
1 Nganong kanunay man kitang gidasig sa paggamit sa atong panahon, kusog, ug kahinguhaan alang sa ministeryo? Kay kini ang labing hinungdanong buluhaton! Kon atong pamalandongon ang daghang kaayohan niini, mas madasig kita sa pagpakigbahin niining dili-na-masubling buluhaton.—Buh. 20:24.
2. Sa unsang paagi ang atong pagsangyaw makatabang sa pagbalaan sa ngalan ni Jehova?
2 Makabalaan sa Ngalan ni Jehova: Atong gisangyaw nga ang Gingharian ni Jehova pinaagi ni Kristo Jesus maoy mopuli sa tanang tawhanong kagamhanan ug mosulbad sa tanang suliran sa katawhan. (Mat. 6:9, 10) Si Jehova mahimaya ingong bugtong may-katakos sa pagluwas kanato gikan sa sakit ug kamatayon. (Isa. 25:8; 33:24) Kay nagdala man kita sa iyang ngalan, ang uban nga makapaniid sa atong maayong panggawi ug kasibot mahimong modayeg kaniya. (1 Ped. 2:12) Malipayon gayod kita sa pagsangyaw sa ngalan sa Soberano Ginoong Jehova sa tibuok yuta!—Sal. 83:18.
3. Unsang mga panalangin ang mabatonan niadtong mosanong sa mensahe sa Gingharian?
3 Makaluwas ug mga Kinabuhi: Si Jehova “wala magtinguha nga adunay malaglag apan nagtinguha nga ang tanan makakab-ot sa paghinulsol.” (2 Ped. 3:9) Apan kon walay magtudlo, unsaon man sa mga tawo pagkahibalo kon unsay matarong o dili-matarong nga panggawi sa panglantaw ni Jehova? (Jon. 4:11; Roma 10:13-15) Kon mosanong ang mga tawo sa maayong balita, moarang-arang ang ilang pagkinabuhi samtang biyaan nila ang makadaot nga mga bisyo. (Miq. 4:1-4) Dugang pa, sila may makapalipay nga paglaom nga mabuhi sa walay kataposan. Ang atong masibotong pagsangyaw ug pagpanudlo magluwas kanato ug niadtong mamati kanato. (1 Tim. 4:16) Bulahan kaayo kita nga nakigbahin niining labing hinungdanong buluhaton!
4. Nganong angay kitang magmakugihon sa pagsangyaw sa Gingharian ug sa paghimog mga tinun-an?
4 Sa dili madugay ang dakong kasakitan magpahinabog kalit nga kalaglagan niining dili-matarong nga kalibotan. Ang mga modapig kang Jehova mao lamang ang maluwas. Busa, ang pagsangyaw ug paghimog mga tinun-an mao ang labing dinalian, hinungdanon, ug mapuslanong buluhaton nga ginahimo karon. Unahon gayod nato kini!—Mat. 6:33.