Paggamit ug Epektibong Presentasyon
1. Unsay atong makat-onan sa lainlaing presentasyon sa unang mga Kristohanon?
1 Ang unang mga Kristohanon nagwali sa maayong balita ngadto sa mga tawong lainlaig kultura ug relihiyon. (Col. 1:23) Bisag ang mensahe pareho ra—Gingharian sa Diyos—ang presentasyon lainlain depende sa gisangyawan. Pananglitan, dihang si Pedro nakigsulti sa mga Hudiyo kinsa may lalom nga pagtahod sa Kasulatan, siya mikutlo sa giingon sa manalagnang si Joel. (Buh. 2:14-17) Sa laing bahin, matikdi kon sa unsang paagi si Pablo nangatarongan sa mga Grego sumala sa narekord sa Buhat 17:22-31. Karon, may mga tawo sa atong teritoryo nga nagtahod sa Kasulatan, ug kita direktang makapamatuod kanila gamit ang Bibliya. Apan, angay nga magmataktikanhon kita dihang makig-estorya sa mga tawo nga dili interesado sa Bibliya o sa relihiyon o kaha dili Kristohanon.
2. Sa unsang paagi nato magamit ang tanyag nga mga literatura sa pagtabang sa mga interesado ug dili interesado sa Bibliya?
2 Gamita ang Tanyag nga Literatura sa Epektibong Paagi: Ang tanyag nga mga literatura niini nga tuig sa pag-alagad mausab matag duha ka bulan ug magpasiugda sa mga magasin, tract, ug brosyur. Bisag ang mga tawo sa atong teritoryo dili interesado sa Bibliya, makahisgot gihapon kitag mga topiko gikan sa atong mga publikasyon nga makapainteres kanila. Mahimong dili kita makabasag teksto o makakutlo sa Bibliya sa unang duaw, apan dihang ang tagbalay magpakitag interes, mahimo kitang mobalik aron siya tabangan sa pagbatog pagtuo sa Maglalalang ug sa Iyang inspiradong Pulong. Sa laing bahin, kon kita nagsangyaw sa mga tawong may pagtamod sa Bibliya, kita makatanyag sa atong mga literatura gamit ang haom nga presentasyon. Gani, mahimo natong itanyag ang librong Gitudlo sa Bibliya o ang mga brosyur nga Listen to God o Pamati sa Diyos ug Mabuhi Ka sa Walay Kataposan bisag dili kini ang tanyag sa bulan. Ang importante mao nga gamiton ang epektibong presentasyon.
3. Sa unsang paagi ang kasingkasing sa mga tawo sa atong teritoryo nahisamag yuta?
3 Andama ang Yuta: Ang kasingkasing sa tawo nahisama gayod sa yuta. (Luc. 8:15) Ang ubang yuta kinahanglang andamon pag-ayo aron ang binhi sa kamatuoran sa Bibliya makagamot ug motubo. Ang unang siglong mga magwawali milampos sa ilang pagpananom sa tanang matang sa yuta, ug kini nakahatag kanilag katagbawan ug kalipay. (Buh. 13:48, 52) Magmalamposon usab kita kon hatagan natog pagtagad ang atong presentasyon.