“Iya ni Jehova ang Gubat”

Niadtong 1999, gisingil sa gobyerno sa France ang sangang buhatan didto ug dili makataronganon nga buhis sa mga donasyon nga nadawat sukad niadtong 1993 hangtod 1996. Amo ning gidala sa mga korte sa France pero wala mi modaog. Among giapelar ang desisyon pero pildi gihapon mi. Human ana, giembargo sa gobyerno ang kapig 4.5 ka milyong euro ($6,300,000 U.S.) nga naa sa bank account sa sangang buhatan. Ang ECHR na lay among paglaom aron makuha namog balik ang kuwarta. Pero sa dili pa paminawon sa ECHR ang among kaso, kami ug ang legal team sa gobyerno sa France kinahanglan unang moatubang sa usa sa mga representative sa European Court para sa pretrial hearing aron makita kon magkasabot ba mi ug dili na kinahanglang dad-on ngadto sa ECHR ang kaso.

Nahibalo mi nga presyuron mi sa representative sa ECHR nga mobayad na lang ug gamayng bahin sa kantidad nga gipangayo aron mahusay na ang isyu. Pero nahibalo pod mi nga kon mobayad mig bisan usa lang ka euro, malapas namo ang mga prinsipyo sa Bibliya. Ang donasyon sa mga igsoon maoy para suportahan ang buluhaton sa Gingharian, maong dili ni iya sa gobyerno. (Mat. 22:21) Pero miatubang gihapon mi sa pretrial hearing agig pagtahod sa protocol sa korte.

Ang hearing gihimo didto sa usa sa mga nindot nga conference room sa ECHR. Pero pagsugod pa lang sa hearing, ang representative miingon dayon nga ang mga Saksi ni Jehova sa France angayng mobayad ug porsiyento sa gipangayo nga buhis. Maong amo siyang gipangutana, “Nahibalo ba ka nga giembargo na sa gobyerno ang kapig 4.5 ka milyong euro gikan sa among bank account?”

Dili makatuo ang representative, maong iyang gipangutana ang legal team sa gobyerno. Dihang miangkon sila nga tinuod ni, nausab gyod ang iyang hunahuna bahin sa kaso. Iya silang gipangkasab-an ug gihuman dayon ang hearing. Wala gyod ko magdahom nga mao toy paagi ni Jehova aron modaog mi sa kaso. Halos dili mi katuo sa nahitabo, ug mibiya mi sa hearing nga malipayon kaayo.

Niadtong Hunyo 30, 2011, ang tanang huwes sa ECHR nagkahiusa sa ilang desisyon pabor nato. Ang Korte midesisyon nga ilegal ang pagsingil sa gobyerno sa France ug buhis sa mga Saksi, ug angayng ibalik sa gobyerno ang kuwarta nga ilang nakuha, apil na ang interes niini! Kining importante nga desisyon nanalipod sa kagawasan sa pagsimba sa mga Saksi ni Jehova sa France hangtod karon. Kadto nga pangutana nga wala gani namo andama nahisamag bato nga miigo sa agtang ni Goliat. Mao toy nakapausab sa dagan sa kaso. Nganong midaog man mi? Tungod kay sama sa giingon ni David kang Goliat, “iya ni Jehova ang gubat.”—1 Sam. 17:45-47.

Pero dili ra kini nga kaso ang atong nadaog. Sa pagkakaron, bisan pa sa pagsupak sa gamhanang mga gobyerno ug mga relihiyon, ang kinatas-ang mga korte sa 70 ka nasod ug ang pipila ka internasyonal nga mga korte nagpakanaog ug 1,225 ka desisyon nga pabor sa mga Saksi ni Jehova. Kini nga mga kadaogan diha sa korte nanalipod sa atong pangunang mga katungod, sama sa atong katungod nga marehistro ingong relihiyon ug makahimog publikong pagsangyaw, katungod nga dili moapil sa nasodnong mga kalihokan o seremonya, ug katungod nga dili magpaabonog dugo.

Pero sa unsang paagi naapil ko sa legal team sa Europe nga didto man ko nag-alagad sa world headquarters sa mga Saksi ni Jehova sa New York, U.S.A.?

GIPADAKO SA MADASIGONG MGA GINIKANAN

Ang akong mga ginikanan, si George ug Lucille, migraduwar sa ika-12 nga klase sa Gilead ug nag-alagad ingong mga misyonaryo sa Ethiopia dihang natawo ko niadtong 1956. Ila kong ginganlan ug Philip, gikan sa ngalan ni Felipe nga tig-ebanghelyo niadtong unang siglo. (Buh. 21:8) Pagkasunod tuig, gidili sa gobyerno ang atong pagsimba. Bisag bata pa ko adtong panahona, mahinumdom gyod ko nga ang among pamilya motambong sa mga tigom ug mosangyaw nga tinagotago. Kay wala pa man koy buot, nalingaw ra pod ko adto. Pero makapaguol kay niadtong 1960, gipugos mi sa gobyerno nga mohawa sa nasod.

Ang among pamilya mibalhin sa Wichita, Kansas, U.S.A., pero wala gyod moawop ang kadasig sa akong mga ginikanan. Nagkinabuhi gyod sila uyon sa kamatuoran, ug ila ning gitudlo sa akoa, sa akong magulang nga babaye nga si Judy, ug sa akong manghod nga lalaki nga si Leslie, nga pareho pong natawo sa Ethiopia. Nabawtismohan ko sa edad nga 13. Tulo ka tuig sa ulahi, ang among pamilya mibalhin sa Arequipa, Peru, diin mas dako ang panginahanglan.

Niadtong 1974, dihang 18 anyos pa lang ko, ang sangang buhatan sa Peru nag-asayn nako ug sa upat pa ka brader aron mag-alagad ingong mga espesyal payunir. Giasayn mi sa mga teritoryo nga wala pa gyod sukad masangyawi, didto sa kabukiran sa Central Andes. Apil sa among asaynment ang pagsangyaw sa lumad nga mga tawo nga nagsultig Quechua ug Aymara. Mobiyahe mi gamit ang among sakyanan nga mao poy among puy-anan. Gitawag namo ni nga “Ang Arka,” kay maomao nig porma sa arka ni Noe. Dili gyod nako malimtan ang akong eksperyensiya sa pagsangyaw didto, kay ang mga tawo ganahan gyong maminaw sa mga saad ni Jehova diha sa Bibliya nga wad-on niya ang kalisod, sakit, ug kamatayon. (Pin. 21:3, 4) Daghan nila ang midawat sa mensahe ug nahimong mga alagad ni Jehova.

GIDAPIT SA WORLD HEADQUARTERS

Niadtong 1977, si Albert Schroeder, nga membro sa Nagamandong Lawas sa mga Saksi ni Jehova, mibisita sa Peru. Iya kong gidasig nga moaplay sa Bethel sa world headquarters. Ug mao nay akong gihimo. Wala madugay, pagka-Hunyo 17, 1977, natawag ko sa Brooklyn Bethel. Sulod sa upat ka tuig, naasayn ko sa Cleaning Department ug sa Maintenance Department.

Niadtong Hunyo 1978, nailaila nako si Elizabeth Avallone panahon sa internasyonal nga kombensiyon sa New Orleans, Louisiana. Parehas mi nga gipadako sa madasigon nga mga ginikanan. Upat ka tuig na siyang nag-alagad ingong regular payunir, ug gusto niyang magpadayon sa bug-os panahong pag-alagad sa tibuok niyang kinabuhi. Mas nagkailhanay pa mi, ug wala madugay nagkahigugmaay mi. Nagminyo mi niadtong Oktubre 20, 1979, ug human ana, miuban siya nako sa pag-alagad sa Bethel.

Ang una namong asaynment nga kongregasyon mao ang Brooklyn Spanish, ug mahigugmaon kaayo ang mga igsoon didto. Human ana, naasayn mi sa tulo pa ka kongregasyon. Mahigugmaon pod ang mga igsoon niini nga mga kongregasyon. Ila ming giabiabi ug gisuportahan sa among pag-alagad sa Bethel. Giapresyar gyod namo ang ilang suporta, apil na ang suporta sa among mga higala ug pamilya nga mitabang namo sa pag-atiman sa among tigulang na nga mga ginikanan.

NAASAYN SA LEGAL DEPARTMENT

Pagka-Enero 1982, giasayn ko sa Legal Department sa Bethel. Dili gyod ko makatuo adto. Paglabayg tulo ka tuig, gipaeskuwela ko sa unibersidad aron mahimong abogado. Nalipay kaayo ko dihang nahibaloan nako nga ang kadaghanan sa kagawasan nga napahimuslan sa mga tawo sa United States ug sa ubang mga nasod maoy tungod sa mga kaso nga nadaog sa mga Saksi ni Jehova. Kini nga mga kaso gihisgotan pag-ayo sa among klase.

Niadtong 1986, natudlo ko ingong overseer sa Legal Department sa edad nga 30. Nalipay ko nga gisaligan ko niini nga pribilehiyo bisag kulang pa kog kasinatian, pero nahadlok pod ko kay dili ni sayon nga responsibilidad.

Nahimo kong abogado niadtong 1988, pero wala ko makamatikod nga nakaapektar na diay ni pag-ayo sa akong espirituwalidad. Ang taas nga edukasyon puwedeng makapahimo sa usa nga garboso ug makapahunahuna niya nga mas labaw siya sa uban tungod sa iyang edukasyon. Maayo na lang kay naa si Elizabeth. Gitabangan ko niya nga mabalik ang akong espirituwal nga rutina niadtong wala pa ko mag-eskuwela sa unibersidad. Sa primero dili to sayon, pero sa ngadtongadto nabalik ra ang akong maayong relasyon kang Jehova. Makaingon gyod ko nga dili ang kahibalo niining kalibotana ang pinakaimportante sa kinabuhi, kondili ang atong suod nga relasyon kang Jehova ug lawom nga gugma para niya ug sa iyang katawhan.

PAGDEPENSA SA ATONG KATUNGOD NGA ISANGYAW ANG MAAYONG BALITA

Human sa akong pag-eskuwela, nagpokus ko sa pagtabang sa Legal Department sa Bethel ug sa pagdepensa sa katungod sa mga Saksi diha sa mga korte. Nag-enjoy ko sa akong asaynment, pero usahay dili pod ni sayon kay paspas kaayo ang mga kausaban sa atong organisasyon. Pananglitan, sukad niadtong 1990, ang Legal Department gihangyo sa paghatag ug direksiyon kon unsaon nga mahunong na ang dugay na natong ginahimo nga pagdawat ug kontribusyon para sa atong mga publikasyon. Human ana, ato nang gipanagtag ang atong mga publikasyon nga walay bayad. Nakatabang ni nga mapasimple ang buluhaton sa Bethel ug sa mga kongregasyon ug malikayan nga masinglan tag buhis para niini. Ang uban naghunahuna nga kini nga kausaban makahurot sa atong pondo ug nga wala na tay magamit nga publikasyon para sa atong pagsangyaw. Pero lahi ang nahimong resulta. Karon, kapin pa sa doble ang gidaghanon sa mga Saksi ni Jehova kon itandi sa 1990, ug ang makaluwas ug kinabuhi nga espirituwal nga pagkaon puwede nang mabatonan sa mas daghang tawo nga walay bayad. Nakita nako nga ang mga kausaban sa organisasyon magmalamposon lang pinaagi sa tabang ni Jehova ug sa direksiyon nga iyang gitagana pinaagi sa matinumanong ulipon.—Ex. 15:2; Mat. 24:45.

Daghan tag nadaog nga mga kaso sa korte, pero sagad dili lang ni tungod kay maayo tag mga abogado, kondili tungod sa atong maayong binuhatan ingong mga alagad ni Jehova. Pananglitan, niadtong 1998, ang tulo ka membro sa Nagamandong Lawas ug ang ilang mga asawa mitambong sa mga kombensiyon sa Cuba. Sila buotan ug matinahoron, ug mao toy mas nakakombinsir sa mga awtoridad nga neyutral ta sa politika.

Pero naay mga panahon nga kinahanglang depensahan nato diha sa korte ang atong mga katungod. (Filip. 1:7) Pananglitan, sulod sa daghang tuig, wala ilha sa mga gobyerno sa Europe ug sa South Korea ang atong katungod nga dili magsundalo. Ingong resulta, mga 18,000 ka brader sa Europe ug kapig 19,000 ka brader sa South Korea ang napriso kay dili madawat sa ilang konsensiya nga magsundalo.

Pero niadtong Hulyo 7, 2011, ang ECHR nagpakanaog ug importante kaayo nga desisyon sa kaso nga Bayatyan v. Armenia. Kini nagsugo nga angayng iimplementar ang alternative civilian service sa tibuok Europe. Ang South Korean Constitutional Court mihimo pod ug susamang desisyon niadtong Hunyo 28, 2018. Dili gyod tingali ta modaog niini nga mga kaso kon naay bisan pipila lang ka batan-ong brader nga mikompromiso.

Ang Legal Department sa headquarters ug ang mga sangang buhatan sa tibuok kalibotan naningkamot pag-ayo nga depensahan ang atong katungod nga simbahon si Jehova ug isangyaw ang maayong balita sa Gingharian. Pribilehiyo kaayo para namo nga depensahan ang atong mga igsoon nga gisupak sa mga awtoridad. Modaog man ta sa mga kaso o dili, ang atong pagdepensa makahatag ug pamatuod ngadto sa mga hari ug magmamando sa mga nasod. (Mat. 10:18) Ang mga huwes, mga opisyales sa gobyerno, ang media, ug ang publiko sagad mahibalo sa mga teksto nga among giapil diha sa among mga oral argument ug sa legal nga mga dokumento nga among gipasa sa korte. Tungod ana, ang sinserog kasingkasing nga mga tawo nahatagag kahigayonan nga makaila sa mga Saksi ni Jehova ug mahibalo sa basehanan sa atong pagtuo. Gani, ang pipila nila nahimong atong mga igsoon.

SALAMAT, JEHOVA!

Sa milabay nga 40 ka tuig, nakapribilehiyo ko nga motabang sa mga sangang buhatan sa tibuok kalibotan ug moatubang sa daghang tag-as nga mga korte ug opisyales sa gobyerno. Naapresyar kaayo nako ang akong mga kaubanan sa Legal Department sa world headquarters ug sa lainlaing sangang buhatan. Nakadawat kog daghang panalangin ug malipayon kaayo ang akong kinabuhi.

Si Elizabeth maunongon ug mahigugmaong nagsuportar nako sa milabayng 45 ka tuig, sa maayo ug sa lisod nga mga panahon. Naapresyar gyod nako siya kay iya nang gihimo bisag naa siyay sakit nga nakapaluya niya.

Nakita gyod namo nga ang atong kusog ug kadaogan wala maggikan sa atong kaugalingong mga katakos. Sama sa giingon ni David, “Si Jehova maoy kusog sa iyang katawhan.” (Sal. 28:8) Oo, “iya ni Jehova ang gubat.”