Unsay Giingon sa Bibliya Bahin sa Pagsimbag mga Imahen?

Matod sa Catholic News Service, panahon sa usa ka seremonya didto sa St. Peter’s Basilica niadtong Marso 25, 2022, si Pope Francis mitindog atubangan sa estatuwa ni Maria nga “nagpiyong ug nagduko samtang hilom nga nag-ampo.” Siya “nangamuyo kang Maria” para sa kalinaw. Ang Vatican News miingon sab nga gigamit sa Santo Papa ang pag-ampo nga Konsagrasyon ngadto sa Putling Kasingkasing ni Maria (Act of Consecration to the Immaculate Heart of Mary) para sa katawhan, ilabina sa Russia ug Ukraine.

Unsay imong hunahuna? Sakto ba nga moampo ta sa mga imahen o gamiton kini sa pagsimba? Konsideraha ang giingon sa Bibliya:

• “Ayaw pagbuhat ug kinulit nga larawan o simbolo sa bisan unsang butang nga naa sa langit o sa yuta o sa tubig. Ayawg yukbo nila o katental sa pag-alagad nila kay ako, si Jehova nga imong Diyos, maoy Diyos nga nangayog eksklusibong debosyon.”—Exodo 20:4, 5.a

• “Ang ilang mga idolo maoy plata ug bulawan, binuhat lang sa tawo. Duna silay baba, apan dili makasulti; dunay mga mata, apan dili makakita; duna silay mga dalunggan, apan dili makadungog; dunay ilong, apan dili makapanimaho; duna silay mga kamot, apan dili makahikap; dunay mga tiil, apan dili makalakaw; walay mogawas nga tingog sa ilang tutonlan. Ang mga tawo nga nagbuhat kanila mahisama gayod kanila, mao man usab ang tanang nagasalig kanila.”—Salmo 115:4-8.

• “Ako si Jehova. Kana ang akong ngalan; dili nako ipaambit kang bisan kinsa ang akong himaya, ug ang akong pagdayeg ngadto sa kinulit nga mga larawan.”—Isaias 42:8, footnote.

• “Kalagiw gikan sa idolatriya.”—1 Corinto 10:14.

• “Pagbantay mo sa mga idolo.”—1 Juan 5:21.

Alang sa dugang impormasyon kon unsay giingon sa Bibliya bahin sa paggamit ug imahen sa pagsimba, basaha ang artikulong “Ang Hunahuna sa Bibliya—Mga Imahen” o tan-awa ang video nga Giuyonan ba sa Diyos ang Paggamit ug mga Imahen Diha sa Pagsimba?

Makapainteres sab ang giingon sa Bibliya bahin niini nga mga topiko:

• “Ang Birheng Maria—Unsay Giingon sa Bibliya Bahin Kaniya?”

• “Angay Ka Bang Moampo Kang Birhen Maria?”

• “Mga Milagro ug mga Aparisyon—Mga Ilhanan Gikan sa Diyos?”

• “Kalinaw sa Yuta—Sa Unsang Paagi Kini Makab-ot?”

Photo credit: Vincenzo Pinto/AFP via Getty Images