6 Milyon nga Namatay sa COVID—Unsay Giingon sa Bibliya?

Sumala sa World Health Organization (WHO), 6.27 milyon na ang namatay sa COVID-19 hangtod niadtong Mayo 23, 2022. Pero sa news report nga gi-publish niadtong Mayo 5, 2022, gibanabana sa WHO nga mas daghan pa niana ang namatay. Kini nag-ingon nga sa 2020 ug 2021, “ang namatay tungod sa COVID-19 nga pandemic, direkta man o dili direkta, . . . miabot nag mga 14.9 milyon.” Naa bay giingon ang Bibliya bahin nianang makapaguol kaayo nga mga trahedya?

Gitagna sa Bibliya ang makamatay nga mga pandemic

•  Si Jesus nagtagna nga dunay mga “kamatay,” o epidemya sa grabeng mga sakit, panahon sa “kataposang mga adlaw.”—Lucas 21:11; 2 Timoteo 3:1.

Nagakahitabo na karon ang tagna ni Jesus. Aron mahibalog dugang, basaha ang artikulo nga “Unsa ang Ilhanan sa ‘Kataposang mga Adlaw,’ o ‘Panahon sa Kataposan’?”

Ang Bibliya dunay makapahupay nga mensahe

•  “Ang Diyos sa tanang paghupay . . . nagahupay kanato sa tanan natong pagsulay.”—2 Corinto 1:3, 4.

Daghan sa namatyag minahal ang nahupayan sa mensahe sa Bibliya. Makatabang ang mga artikulo nga “Pagsagubang sa Grabeng Kaguol—Kon Unsay Imong Mahimo” ug “Pinakamaayong Tabang Para sa Grabeng Naguol.”

Gipakita sa Bibliya ang permanenteng solusyon

•  “Paanhia ang imong Gingharian. Matuman unta ang imong kabubut-on, maingon sa langit, mao man usab sa yuta.”—Mateo 6:10.

Sa dili madugay, paneguroon sa “Gingharian sa Diyos” nga “walay residente nga moingon: ‘Masakiton ko.’” (Marcos 1:14, 15; Isaias 33:24) Tan-awa ang video nga Unsa ang Gingharian sa Diyos? aron mahibalo bahin niini nga gobyerno sa langit ug kon unsay himoon niini.

Gidasig ka namo nga sayron ang praktikal nga mga tambag ug nindot nga mga saad sa Bibliya aron makabenepisyo ka ug ang imong pamilya.