“Mamatay na Gayod Ako!”

Usa ka Nakalabang sa Pinusilay sa Iranianhong Embahada Miasoy sa lyang Estorya

“GAWAS KAMO! GAWAS KAMO!” Ang putolputol nga mando sa mga tawo sa SASa nga tinabonan ug itom ang ulo milanog nga dinalian ibabaw sa kaguliyang sa kusog nagdilaab nga tinukod. “Gawas! Gawas!” mipadayon ang ilang singgit samtang nagkapangkapangkang milatas kami sa abog ug aso sa ngitngit nga kuwarto nga maoy among prisohan ug nagkatumbatumbang nanaog sa hagdanan ibabaw sa mga guba ug hugaw sa pagluwas sa among mga kinabuhi. Kami, nga nagtikuka gumikan sa halang nga aso sa mga granada ug ginamit nga mga bala ug uban ang nagluha nga mga mata, gipangduso agi sa pultahan sa luyo sa embahada ug nanghidugmo ngadto sa tanaman.

Tin-aw nga akong mahinumdoman ang kaukyab niadtong gutloa. Miligidligid ako sa kasagbotan, ang akong kahinam sinagolan sa mga bakho sa kalipay. “Ang langit! Ang langit! Makita ko na ang langit! Salamat sa Diyos!” Ako misinggit nga balikbalik. Kaming tanan gihuptang binihag sulod sa unom ka adlaw. Ang mapait nga kasinatian natapos na, apan ang tensiyon ug kalisod nakahimog kadaotan.

Oo, nagpasalamat gayod ako nga ako buhi pa, apan karon, kapin ug upat ka tuig sa ulahi, ako may labaw pang hinungdan sa pagpasalamat kaniya. Pasaysaya ako kon ngano.

Gihimong Binihag!

Ang akong ngalan mao si Ali Asghar Tabatabai. Ang akong apelyido nga Tabatabai nagapamatuod nga ako ginaisip nga laktud nga kaliwat sa propetang Muhammad, sa akong kahimtang pinaagi sa banay sa akong amahan ug akong inahan.

Niadtong 1980 ako miadto sa London, Inglaterra, isip usa ka eskolar sa kurso sa banking. Sa buntag sa Miyerkoles, Abril 30, samtang ako nagdagandagan aron makaapas sa akong sakyan nga tren ako nasayod nga diha ang puliki nga adlaw sa akong unahan. Kon wala pa unta ako magdali pag-ayo ug nagpaabot ug pila ka minutos alang sa sunod nga tren, malikayan ko unta ang makalilisang nga mga kasinatiang misunod niadto. Apan walay paagi nga kana hisayrang daan!

Nahauna, ako miagi sa Iranianhong embahada sa paghapit sa pila ka mapa alang sa usa ka lektura nga akong igapahayag sa bangko. Igo ra akong nakalingkod aron magpaabot kanila sa pila ka gutlo nga akong nabatian ang kagubot sa entrada sa embahada. Unya unom ka tawong may maskara ug armado midali sa pagsulod ug mimando nga kaming tanan mosaka sa itaas. Sa minutos lamang, 26 ka tawo, apil ang polis nga nagbantay, gihimong binihag. Kadtong tanan dali kaayong nahitabo nga kadto dili katuohan.

Ako sukad dili aktibo sa politika, ug ang akong relihiyosong pagtuo, bisan tuod gituohang sinsero, dili dako. Ang tinuod kong interes maoy diha sa akong pamilya ug sa akong trabaho. Ang trabaho sa bangko sa London kahimut-anan, ug mipatim-aw nga mauswagon ang akong kinabuhi samtang akong gipadayon ang akong mga pagtuon. Wala gayod ako makaamgong sa dili madugay ang tanang akong gibarogan mabutang sa pagsulay.

Samtang ang kapolisan nangabot ug nagtak-op sa tinukod, may nasayran kami bahin sa mga tawong nagbihag kanamo. Gisultihan nila kami nga ilang giilog ang embahada sa pagpasiugda sa mga suliran diha sa ilang yutang-natawhan ug kaming tanan ilang patyon sa udto sa sunod adlaw kon dili ihatag ang ilang mga pangayo.

Pagkinabuhing Gihulga sa Kamatayon—Apan Ngano?

Sa paglabay sa unang adlaw, natataw nga ang mga sulugoon sa balaod nagpalanganlangan ug sila dili andam mosugot sa mga pangayo sa mga tawong armado. Ang kakulba midako nga makalilisang. Sulod nianang panahona, kaming tanan naningkamot sa paghupot sa among kadasig. Gihatagan ako sa ngalang “Si Ali ang Bangko” ug gibuhat ko ang akong maarangan sa paglingaw sa akong kaubang mga binihag sa paghupay sa kakulba. May mga panahong akong ilisan ang gihanduraw nga mga tseke o mugnaon ang mga tanghaga aron sulbaron sa mga binihag. Kadto nakabulig sa pagpalabay sa mga oras, apan sa gihapon daghan kaayo ang oras ug kami wala gayoy mahimo niana.

Samtang midako ang pagbati sa kapakyasan sa mga tawong armado, mausbawong natataw nga ang kinabuhi namong tanan nameligro ug dako. Kanunay nila kaming hulgaon nga patyon ang tanan, ug kay sila armado sa bug-os dayag nga kadto dili kay tiawtiaw nga bahad. Ang kakulba dili na maantos. Matag oras o kapin pa usa sa mga binihag modanguyngoy—kadto makapakulba sa hilabihan. Kay ako larinong mosulti sa Iningles, ako kadaghanan nakaarang sa pagpataliwala, ug kadto nakapahilayo sa akong kaisipan gikan sa kahimtang. Apan usa ka adlaw akong giablihan ang akong pasaporte ug didto sa sulod akong nakita ang mga letrato sa akong minahal nga asawa ug mga anak. Ako mihilak usab. Igkita ko pa kaha sila pag-usab? Sa unsang paagi ang akong asawa makasagubang sa kinabuhi diha sa langyaw nga nasod? Mawad-an kaha ang akong gamay nga batang lalaki sa iyang amahan sama kanako sa linghod kaayong panuigon? Dili ko buot mamatay—daghan kaayo ang hinungdan sa pagpakabuhi!

Samtang gisugdan ko ang pagsulat sa akong testamento, misulay ako sa pagpangatarongan sa pangulo sa mga tawong armado. “Unsay mahitabo kon inyo kaming patyon?” ako nangutana. “Ang among mga anak manganhi ug magapatay sa inyong mga anak tungod kay kami inyong gipatay, ug kami walay sala!” “Kana ang balaod sa lasang,” mao ang mubo niyang tubag. “Ako usa lamang ka magbabangko,” gisultihan ko siya. “Ako wala makiglabot sa politika ug dili ko buot mamatay tungod sa mga politikanhong hinungdan.” “Hunong na sa pagpakiluoy alang sa imong kinabuhi!” misinggaak ang usa sa binihag nga mga diplomat. “Ako wala magpakiluoy,” ako mitubag. “Kamo mga diplomat. Kamo dagko kaayog mga suweldo aron motrabaho niining nasora ug moatubang sa kapeligrohan. Ako dili diplomat, ug dili ko buot mamatay tungod sa butang wala ako magtuo.” Akong napasabot sila.

Kon anaa sa seryosong suliran, ang mga tawo usahay magmainiton sa pag-ampo. Daghan sa akong mga kaubang binihag sa kanunay nag-ampo nga madungog, ug ang Allah nabatian nga subsob adlaw ug gabii. Tingali angay kong ipatin-aw nga ang Allah mao ang Arabeng pulong alang sa “Diyos.” Sa Persiano, ang akong pinulongan, among gamiton ang susamang pulong “Khuddah” alang sa “Diyos,” ang Maglalalang. Sa makadaghan ako miampo sa Khuddah, pero akong gibati nga ang akong mga pag-ampo dili dawaton kay ako wala man makapanghugas sumala sa gitudlo kanako nga akong pagabuhaton una moampo.

Ang akong mga hunahuna naglibog. Wala ko hisabti nganong ang Khuddah nagtugot nga mahitabo kadtong tanang makalilisang nga mga butang. Sa tibuok kong kinabuhi akong gibuhat ang akong maarangan. Unsang matanga siya sa Diyos nga tugtan niyang ako mapatay, ingon sa akong gibati nga tino? Bisan pa niana akong giangkong ang akong kinabuhi maoy kinabuhi sa kalingawan, nga nagpahimuot lamang sa akong kaugalingon. Unsa bay akong nabuhat alang sa Khuddah? Sa pagkamatuod, unsa bay akong nahibaloan bahin kaniya? akong gisukna ang akong kaugalingon.

Maoy sa usa niadtong mga gutloa nga ako nanaad sa Khuddah nga kon may paagi nga maluwas ang akong kinabuhi, tungod sa akong pamilya, ako maningkamot gayod sa pagpangita kaniya ug pag-alagad kaniya sa nahibilin kong kinabuhi. Gitininuod ko gayod ang akong gipamulong.

“Mamatay na Gayod Ako!”

Ang mga adlaw miaginod. Sa kataposan, tungod kay nawad-ag paglaom ang mga tawong armado mapintasong nagpatay sa unang binihag ug nagpagawas sa patay nga lawas sa atubang nga pultahan sa embahada. Katingad-anan, kadto ang diplomat nga nagmando kanako sa paghunong sa pagpangaliyupo alang sa akong kinabuhi. Mipahayag ang mga terorista nga kon dili gihapon tagdon ang ilang mga gipangayo, patyon nila ang tanan nga uban sa 45-minutos nga kalang! Sa dihang kadto nahibaloan, ang SAS misulong—tapos gayod sa alas siyete sa gabii sa ikaunom nga adlaw. Ang ilang tulin nga aksiyon gisud-ong sa telebisyon sa tibuok kalibotan.

Sulod sa embahada, diha ang kaguliyang. Ang pagbunal sa mga bentana, pagbuto sa mga granada ug rapidong pagpabuto sa mga masinggan mipuno sa kahanginan. Dihadiha tulo sa mga terorista midali pagsulod sa among kuwartong prisohan ug sa mga gutlo mirakrak nga walay pili samtang kami nanghupo sa salog. Ang akong nahunahunaan dayon mao, ‘Mamatay gayod ako!’

Akong nakita ang tawong armado nga miliso ngari kanako. lyang giisa ang iyang pusil ug miluthang. Ako nakabati ug wala akoy gibati, apan sa segundos ang akong sinina napunog dugo. Ako mikupot sa akong jaket sa paningkamot intawon sa pagsalipod sa akong kaugalingon. Siya mipuntiriya sa ikaduha ug ikatulong pagtiro direkta kanako—apan sa akong katingala ako wala mamatay. Sa unsang paagi kadto nahitabo?

Sumala sa naasoy na, kami giluwas tapos sa daklit, grabe nga bugnoay ug gidali pagdala sa ospital. Sa pagkakita sa akong kahimtang, ang tanang doktor nagtuo nga ako samdon nga grabe. Apan ang duol nga pagsusi nagpadayag nga wala akoy samad—gawas nga igo lang mikaras sa akong bukobuko ang usa ka bala (lagmit ang ikaduhang pagtiro) nga dili ikapatin-aw nalikit sa akong polo. Nan nganong may daghang dugo? Akong nasayran sa ulahi nga sa unang pagtiro kadto misirit gikan sa binihag nga naghupo tapad kanako. Unsa na man sa ikatulong pagtiro? Sa dihang ang kapolisan namalik sa embahada, ilang nakaplagan ang bilin sa akong jaket ug sa usa sa mga bulsa ang grabeng pagkalupyak 50-pence nga kuwarta. Kadto nagluwas sa akong kinabuhi. Dili katingad-anang ako gitawag sa payl sa kapolisan nga tawong misteryoso. Sa unsang paagi si bisan kinsa makalabang sa tulo ka gipunting nga pagtiro sama sa nahitabo kanako! Ako naghunahuna, “Salamat gayod sa Khuddah!”

Pagtuman sa Akong Panaad

Ako nahibalik sa akong mahigugmaong pamilya, ug kami mihukom sa pagpabilin sa Inglaterra. Apan kanunay kong banhawon ang mapait kong kasinatian. Lisod kaayo nga mahibalik sa unang kahimtang, apan pagkamapasalamaton ko gayod nga ako buhi! Nan, komosta ang akong panaad sa Khuddah? Kinahanglang may himoon ako—apan unsa man? Ako walay ideya.

Nga wala ko hisayri, sulod sa pila ka bulan ang akong asawa, si Shirin, nagdawat nga regular sa mga kopya sa The Watchtower ug Awake! kay iyang nadiskobrehang kana makatabang ug dako kaniya sa pagkakat-on sa Ingles. Sa kaulahian dihang usa ka membro sa lokal nga kongregasyon sa mga Saksi ni Jehova miduaw aron makigkita kanako, ako matinahorong nanimati. Ako naikag sa mga reperensiya sa Bibliya ug gisusi kadto sila sa Persianong kopya. Apan sa gisultihan ako nga ang Diyos, ang Khuddah, may ngalan, kadto butang lahi! Oo, ako dunay ngalan ug ako magarbohon sa akong ngalan, ug niadtong panahona gipakitang tin-aw kanako sa Bibliya nga ang Khuddah dunay personal nga ngalan—si Jehova! Sa maikagon ako nagtuon sa tanan nga akong maarangan bahin kaniya gikan sa akong mga pagtuon sa Bibliya.

Niadto ako nakasabot! Ang Khuddah dili ra usa ka Diyos nga pagayukboan ug simbahon sa tinong mga panahon sa adlaw, kondili siya usa ka indibiduwal, personal nga Diyos, nga may mahigugmaong katuyoan alang sa katawhan. Dili usa ka Diyos nga yanong nagapangayo nga simbahon, kondili usa nga matinagdanon kanato sa tinagsatagsa—kanako ug sa akong pamilya, sa personal! Kompleto na ang akong hulagway. Malipayon kong alagaron si Jehova!

Sukad niadtong puntoha, kusog ang pag-uswag, ug karon ang akong asawa ug ako bawtismado nang mga Saksi ni Jehova. Samtang kami gidawat sa tibuok-kalibotang asosasyon sa katawhan ni Jehova, ang kalulot ug pagkamanggihatagon nga gipahayag nganha sa akong pamilya milabaw sa bisan unsang pagdahom nga posible. Dili lamang mihatag sa ilang panahon ang among bag-ong mga igsoong lalaki ug babaye sa espiritu sa pagtudlo kanamo sa kamatuoran sa Pulong sa Diyos kondili sila mihatag usab kanamo sa dagayang materyal nga mga panginahanglan samtang among gisugdan pagtukod na usab ang among mga kinabuhi.

Sa paglabay sa mga adlaw, mahanaw ang mga madumdoman, matuod. Pero ang makalilisang unom-ka-adlaw nga atake nagapabilin gihapon nga tin-aw sa akong alimpatakan. Hinuon, karon ako nakaamgo nga ang maong makapasubong mga hitabo sa dili madugay mahimong mga butang sa kagahapon sa walay kataposan. Gawas pa, sa Bag-ong Kahikayan sa pagkamatarong nga iya ni Jehova nga karon haduol na, kanang makapasubong mga handumanan dili na gayod “kahinumdoman, ni motungha pa sa kasingkasing.” (Isaias 65:17) Tungod nianang talagsaong mga saad ang akong pamilya ug ako karon mapasalamaton ug nagadayeg kang Jehova.

[Footnote]

[Blurb sa panid 22]

Ang kalulot ug pagkamanggihatagon nga gipahayag nganha sa akong pamilya milabaw sa bisan unsang pagdahom nga posible

[Letrato sa panid 18]

Ako mihilak sa dihang akong nakita ang letrato sa akong asawa ug mga anak

[Letrato sa panid 19]

Kay nawad-ag paglaom ang mga tawong armado mapintasong mipatay sa unang binihag

[Letrato sa panid 21]

Ang 50-pence nga kuwarta sama niini nagluwas sa akong kinabuhi