Nukleyar nga Pagpugong—Oo kun Dili?
NIADTONG Mayo 1983, sa Tinipong Bansa, ang mga obispo sa Iglesya Romana Katolika pormal nga miawhag sa pagkunhod sa nagalungtad nga pondo sa nukleyar nga armas ug sa paghunong sa “pagsulay, paggama ug pagpahimutang sa bag-ong nukleyar nga mga armas.” Sila mipatin-aw: “Kinahanglan dili sabton nga sayop ang among dakong pagduhaduha sa moral nga pagkadinawat sa bisan unsang kagamitan sa nukleyar nga armas.”—Tan-awa ang Pagmata! sa Agosto 22, 1984, panid 4.
Sa usa ka sulat nga gihimo sa Lourdes, Pransiya, sa Nobyembre 8, 1983, ang Pranses nga mga obispo sa Iglesya Romana Katolika nagpadayag nga sila wala bug-os mouyon sa ilang Amerikanong mga kaubanan. “Ang mga nasod,” miinsistir ang Pranses nga mga obispo diha sa usa ka sulat nagpatin-aw, “sa angay makapangandam sa ilang mga depensa sa pagpaluya sa mga manunulong, bisan pinaagig nukleyar nga pagsangkap aron ipanghadlok.”
Sa ilang sulat ang Pranses nga mga obispo mipahayag: “Dayag, aron ang nukleyar nga pagsangkap ingong panghadlok sa moral madawat:
“kini kinahanglan gamiton lamang ingong lakang sa pagdepensa
“pagalikayan ang pagpauswag sa reserba; ang pagsangkap ingong panghadlok makab-ot dihang ang hulga sa balos mohimo sa bisan unsang gawas nga pag-atake nga dili makataronganon
“ang tanang panagana angay pagahimoon sa pagwagtang sa riyesgo sa nukleyar nga gubat nga mahimong ipahinabo pinaagig aksidente, pagkabuang, terorismo, ubp.
“ang nasod nga nagbaton sa riyesgo sa nukleyar nga pagsangkap ingong panghadlok angay, sa laing bahin, magsunod sa usa ka konstruktibong polisa sa pakigdait.”
Daghang Pranses nga Katoliko misupak sa binaba sa baroganan sa ilang mga obispo. Si Gg. Alain Woodrow, magsusulat sa relihiyon alang sa mantalaan sa Paris nga Le Monde, mikomento: “Ang mga pangatarongan sa mga obispo anaa sa ngilit sa doktrina bahin sa konsensiya. Bisan pag sila mopatin-aw nga ‘ang usa ka hulga dili mao ang paggamit ug kusog,’ ang kalainan malalangon kaayo, ug sila mismo nagaangkon nga aron katuohan ang depensa sa usa ka nasod, ‘kanang nasora kinahanglan mohukom sa paglihok kon dili molampos ang mga lakang sa nukleyar nga pagsangkap ingong panghadlok’.”
Makaiikag, ang punto de vista sa Pranses Protestanteng Konsilyo sa mga Iglesya mas duol sa iya sa Amerikanong Katolikong mga obispo sa dihang, sa pila ka adlaw sa ulahi, ilang gipahayag nga sila dapig sa “nukleyar nga pagpugong ingon nga unang tikang padulong sa pagbali sa pag-uswag sa armas, bisan pag kini sa usa lamang ka kiliran.” Kining pahayaga, sa baylo, gisupak sa maidlot gikan sa sulod sa Protestanteng Iglesya. Sa opinyon sa usa ka pastor, ang maong tinamdan nagadasig sa “pagsulong ug pagpukan gikan sa totalitaryanhong mga gobyerno.”
Nganong nagkalainlain ang mga opinyon sulod sa mga iglesya niining hinungdanong isyu sa ika-20ng siglo? Dayag tungod kay ang kadaghanang mga awtoridad sa iglesya nagaisip sa kahimtang sa kalibotan gikan sa politikanhon inay sa Kasulatanhong punto de vista. Tinong diha sa maong nabahing mga organisasyon ang katawhan dili makalaom nga makakaplag sa tinuod nahiusang mga disipolo ni Kristo, ang “Prinsipe sa Pakigdait.”—Isaias 9:6, 7; Juan 17:20, 21.