Nangita sa Hinungdan sa Kamatayon, Akong Nakaplagan ang Kinabuhi

Ang sugilanon sa usa ka patologo

“NAGLAOM ako nga dili na gayod mamatay,” miingon ang akong higala. Makantalitahong mipahiyom ako niini. Apan sa samang higayon nakapukaw kini kanakog dakong tinguha sa pagsusi. Suheto ako sa akong higala. Nagkauban kami sa pag-eskuyla, ug wala gayod siya makahatag kanakog mga rason sa pagduhaduha sa iyang kabuot. Ingong usa ka patologo pamilyar ako sa kamatayon, ug sa daghang hinungdan niini, apan ang ideya sa walay kataposang kinabuhi wala gayod mosulod sa akong hunahuna.

Human sa kolokabildo, gihatagan niya ako duha ka libro: Ang Kamatuoran nga Motultol sa Kinabuhing Dayon ug Tinuod ba nga Pulong sa Diyos ang Bibliya? Mao kana ang akong unang kontak sa mensahi nga giwali sa mga Saksi ni Jehova gikan sa Bibliya. Kadtong duha ka libro mohatag unya kanako ug dakong kausaban sa akong kinabuhi ug kausaban pa ngani sa direksiyon sa medikal nga pagdukiduki nga trabaho.

Nakagugol akog daghang katuigan sa oncological nga pagdukiduki​—ang pagtuon sa mga tumor. Ingong patologo interesado ako sa sinugdan ug hinungdan sa mga sakit. Ginaatubang nako adlaw-adlaw ang duha ka butang nga walay kabalhinan​—kinabuhi ug kamatayon. Nawili ako sa milagro sa kinabuhi ug sa misteryo sa kamatayon. Ug karon, wala dahoma, may nadunggan ako nga nagpamatuod nga tingali dili na gayod siya mamatay sanglit naglaom siya nga moabot ang Gingharian sa Diyos sa iyang panahon.​—Mateo 6:9, 10.

Ang Akong Karera sa Medisina

Nagdako ako sa panimalay nga dili kaayo relihiyoso. Ang akong amahan, nga usa ka intelehenting tawo ug himasa kaayo tingali nasayod bahin sa relihiyosong mga lider sa Espanya nga gumikan niini nawad-an siyag interes sa pagtudlo sa ilang mga ideya diha kanamo. Pinugos ang relihiyosong instruksyon niadtong adlawa sa eskuylahan. Sa miabot ako sa panuigong 15 ug misugod sa pagtuki bahin sa doktrina sa Katoliko, mihukom ako sa pagbulag sa simbahan.

Sa usa ka higayon naghunahuna ako ug karera sa militar, apan sa kataposan sa akong bachillerato (hayskol) nga pagtuon ang pagpili miabot kanako tali sa engineering ug sa medisina. Daghan akog nabasa bahin sa mga doktor ug kanunayng makadungog sa akong amahan nga madapigong maghisgot sa iladong mga doktor nga Katsila sama kang Santiago Ramón y Cajal, nakadaog sa Nobel prize sa medisina. Busa sa kataposan gipili nako ang makawiwiling siyensiya sa medisina.

Misulay sa Pagkombertir Kanako ang Katolikong Teologo

Sa milabay ang panahon misamot ang akong pagsupak sa Katolisismo, hangtod sa punto nga nahimong agnostiko. Makigdebate ako kanunay batok sa mga doktrina sama sa Trinidad, impiyerno, ug sa pagkadili-masayop sa papa.

Sa usa ka adlaw niana, sa panahon sa lantugi uban sa mga higala sa National Library sa Madrid, gidapit ako sa usa kanila sa pakigkita sa usa ka iladong teologong Katoliko kinsa, gisultihan ako, makapatin-aw sa akong mga pagduhaduha ug sa pagtubag sa akong mga argumento. Akong gidawat ang hagit, ug nianang adlawa mismo among giadto ang balay sa pari.

Mahigalaon kaayo siya sa among paghiabot ug miingon nga may libre siyang panahon alang kanamo. Malipay kaayo siya sa pagtabang kanako aron mahibalik sa Katolikong Iglesya. Human sa tunga sa oras sa pangatarongan ug paghimakak, kalit lamang niyang nahinumdoman nga siya adunay gikasabot! Nawad-ag kasibot ang akong higala sa pagtan-aw sa pagsibog sa iyang teologo.

Dili gayod nako madawat ang katunga-sa-kamatuoran nga gidayandayanan sa bakak tawhanong pilosopiya nga usahay mangahas sa pagkuha sa pagkapersona sa Diyos diha sa Trinidad ug sa pagpadayag kaniya ingong mapintas, malalangong tigdesinyo sa mga pagsakit sa impiyerno diin hawiran didto sa walay kataposan ang mga tawo. Dili gayod ako makadawat ug ingon nianang matanga sa Diyos.

Ang Akong Pagkawili sa Medikal nga Pagdukiduki

Daling milabay ang katuigan, ug nakapasar ako ingong doktor. Akong giespesyalisar ang internal medicine, nagpadayon sa akong karera nga may kaikag. Gusto akong motabang sa mga tawong masakiton. Sa usa ka adlaw niana gitawag ako sa pag-atiman sa bata nga may sakit nga leukemia. Natandog kaayo ako ning kasoha​—sa paghunahuna nga hapit na siyang mamatay. Gigukod kaayo ako niining makalilisang nga sakit nga makahatag-ug-wala sa panahon nga kamatayon sa daghan kaayong kinabuhi.

Sa mipauli ako sa balay nianang adlawa, miadto ako sa akong librarya, gikuha ang tanang libro ug mga publikasyon bahin sa maong ulohan, ug misugod ako sa masiksikong pagtuon niini. Buot nakong makita ang hinungdan sa sakit, ug gikan didto ang tambal. Akong gitun-an kini sa tibuok gabii.

Sa pagkakadlawon hilabihan nakong lipaya tungod kay nakalaraw ako ug hingpit nga teoriya sa posibleng hinungdan sa leukemia. Nakahukom ako sa pagpatik sa akong teoriya. Apan akong nahinumdoman ang tambag ni Santiago Ramón y Cajal: Laing butang ang paghimog teoriya; ug laing butang usab ang pagdemonstar sa teoriya. Dili paigo ang teoriya lamang. Kinahanglang maghimo ako ug eksperimento nga pagdukiduki aron mapamatud-an kini. Unsa ang resulta? Mihukom ako sa pagpahinungod sa akong kinabuhi sa medikal nga pagdukiduki. Busa mihukom ako sa pag-espesyalisar sa oncology, pathological anatomy, ug uban pang mga sanga sa patolohiya.

Miuswag ang akong pagdukiduki hangtod sa punto nga gihangyo ako sa pagpadapat sa mga resulta sa akong mga eksperimento diha sa mga mananap ngadto sa mga pasyente sa kanser. Mibalibad ako sanglit nakaeksperimento lamang ako sa usa ka matang sa tumor. Buot ko unang eksperimentohan ang laing matang nga akong nahibaloan usab pag-ayo. Kombinsido ako nga ang matag matang sa tumor nagkinahanglan ug espisipikong imunisasyon.

Naikag kaayo ako sa akong mga eksperimento ug nakapahimulos sa tinuig nga hinabang gikan sa asosasyon sa kanser sa Espanya ug sa World Health Organization. Apan dihay nahitabo nga wala damha. Gisultihan ako nga aron makapadayon sa pagdawat sa hinabang kinahanglang akong ihatag ang akong mga resulta sa akong pagdukiduki ngadto sa laing grupo sa tigdukiduki nga dili ubos sa akong pagdumala. Wala ako makaangay sa pagsunod ning maong polisa. Tungod ning medikal nga politika, gihunong nako ang akong pagdukiduki nga buluhaton.

Usa ka Bag-ong Natad sa Pagdukiduki

Mao kana ang akong kahimtang sa akong unang nahibalag ang akong higalang Saksi. Bag-o pa ako ug akong asawa nakabaton ug Bibliya, ug nakabasa sa pipila sa “Bag-ong Tugon.” Napukaw pag-usab ang akong interes sa espirituwal nga mga tema. Nianang gabhiona misugod ako sa pagbasa sa librong Ang Kamatuoran nga Motultol sa Kinabuhing Dayon.

Hapit nang mibanagbanag sa dinha​—human sa malinawon, tulokibon, ug sa samang higayon kulbahinam nga pagbasa​—hapit nako matapos pagbasa ang libro. Kinahanglang matulog una ko. Apan, una, sa dakong kalipay, pagtahod, ug dulot nga emosyon, miampo ako sa Diyos. Mipahayag ako ug pasalamat sa mga butang nga akong nakat-onan nianang gabhiona bahin kaniya dili lamang ingong Maglalalang kondili ingong buhing Diyos nga adunay katingalahang mga hiyas sa gugma, kaalam, hustisya, ug gahom. Mao kini ang Diyos nga akong kahatagan sa pagtahod ug pagsimba.

Akong gibasa kini ug ang librong Tinuod bang Pulong sa Diyos ang Bibliya? sa duha ka adlaw. Sa pagkasunod adlaw akong giteleponohan ang mga Saksi sa pagpadala kanakog dugang libro nga gianunsiyo. Ila dayon kining gihatod, lakip sa libro bahin sa ebolusyon. Akong gihurot sila sa pagbasa ug mihimog konklusyon nga ang mga Saksi ni Jehova lamang ang nakabaton sa kamatuoran bahin sa pagsimba ug sa pag-alagad sa tinuod nga Diyos, si Jehova. Wala pa ako sukad makabasa ug sama niini nga basahon sa relihiyon​—larawan kini sa pagkasimple ug pagkatin-aw.

Sanglit naanad ako sa pagbasag siyentipikanhong mga pamatbat uban sa ilang matukiong mga bibliyograpiya, nakadayeg ako sa mga sukdanan sa mga Saksi. Diha sa ilang publikasyong Did Man Get Here by Evolution or by Creation? may listahan sa 248 ka bibliyograpikong mga tuboran! Tataw nga dakong pagdukiduki ang nahimo nianang libroha.

Nakigsulti ako sa akong asawa sa akong mga konklusyon bahin sa Bibliya ug sa mga Saksi. Dayon iyang gibasa ang librong Kamatuoran ug miuyon sa pag-apil sa sistematikong pagtuon sa Bibliya uban sa mga Saksi. Duha ka Bibliya ang among gigamit, ang Catholic Nácar-Colunga ug New World Translation sa mga Saksi. Sa usa ka higayon nakatuon kami makatulo sa usa ka semana. Wala magdugay misugod kami sa pagtambong sa mga tigom sa Kingdom Hall sa Madrid.

Sa dugang gitun-an ang Bibliya, dugang kong naamgohan nga ang medisina dili gayod makahatag tinuod nga mga tubag sa problema sa mga tawo. Tingali makahimo kita ug mga kauswagan batok sa pipila ka sakit, apan ingong doktor kanunay akong mosangko sa dili makab-ot: sa pagwala sa kamatayon. Walay sanga sa medisina ang makapamulong sa puwersadong mga pulong nga makita sa Bibliya: “Lamyon sa walay kataposan ang kamatayon” ug “mawala na unya ang kamatayon.” Ang Diyos lamang, ‘nga dili arang makabakak’ ang makagarantiya sa katumanan ning paglaoma, nga gipangandoy sa kadaghanan.​—1 Corinto 15:​54; Pinadayag 21:​4; Hebreohanon 6:18.

Uban sa nausab nga panglantaw, mihukom ako sa pagbiya sa pagdukiduki sa kanser ug akong gidawat ang posisyong Director of the Pathological Anatomy Service sa siyudad sa Orense sa amihanang-kasadpan sa Espanya. Kon itandi sa trabahong pagdukiduki, daw wala kaayoy dungog kini diha sa medikal nga kalibotan. Apan laing butang nga nakaimpluwensiya sa akong desisyon mao nga ako nasayod nga nagkinahanglag tabang ang Konregasyon sa mga Saksi ni Jehova sa Orense. Sa kataposan gibawtismohan ako ingong Kristohanong saksi ni Jehova sa Mayo 29, 1971, sa Orense.

Nakasangyaw sa Rayna

Sukad niadto nakabaton ako ug daghang pribilehiyo sa kongregasyon. Nahimo akong ansiano sa katuigan na ug nakabaton usab ug kaakohan sa pagdumala sa First Aid Department diha sa daghang mga asembliya ug mga kombensiyon. Sanglit usa ka doktor ug patologo ako​—pinaagi sa radyo, telebisyon, ug sa prensa—​nakadepensa sa baroganan sa mga Saksi ni Jehova batok sa paggamit sa pag-abunog dugo. Lig-on ang atong mga katarongan sa Bibliya, ug adunay daghang ebidensiya sa medikal nga kalibotan sa pagpiot ning natara.​—Genesis 9:​4; Levitico 17:​14; Buhat 15:​28, 29.

Sa 1978 gidapit ako sa paghatag pakigpulong bahin sa “Blood, Medicine and the Law of God” diha sa Superior Council of Scientific Research sa Madrid. Sa miaging nuybe ka tuig, nakahatag ako ug pakigpulong bahin sa pagdukiduki sa kanser sa samang dapit. Pagkadako nga kalainan! Karon ang akong mga tumatambong maoy mga doktor, klero, lakip kang Queen Sophia sa Espanya nga mitambong ingong estudyante sa humanities. Usa lamang ka oras ang iskedyol sa pakigpulong. Sa pagkamatuod, ang diskusyon mipadayon halos tulo ka oras. Nakatubag ako sa daghang pangutana, ug sa kataposan malulutong gipahalipayan ako ni Queen Sophia. Malipayon ako nga nakahatag akog pamatuod sa kadayegan ni Jehova.

Karon sa magsid-ing ako sa akong mikroskopyo sa pagsusi sa hinungdan sa sakit ug kamatayon, mapukaw usab ako sa pagdayeg kang Jehova nga Diyos sa katingalahan ug sa pagkakomplikado sa mikroskopikong kalibotan. Ang milagro sa kinabuhi nagpadayon nga nahimong tuboran sa pagkaikag ug katingala, ug ang pagkatulokibon sa kamatayon karon adunay iyang malig-ong mga tubag​—ang kamatayon maoy suhol sa sala.​—Roma 6:23.

Akong nakita gikan sa akong pagtuon sa Bibliya nga ang tinuod nga paglaom sa mga patay mao ang pagkabanhaw nga gitudlo ni Jesus. Siya mismo miingon: “Ayaw kamo kahibulong niini, kay ang takna nagasingabot nga ang tanan nga anaa sa handumanang mga lubnganan makabati sa iyang tingog ug manggula.”​—Juan 5:​28, 29.

Mapasalamaton kaayo ako kang Jehova sa akong kahibalo sa kamatuoran, sa pagkasayod nga sa dili madugay ang panglawas ug kinabuhi ipasig-uli ngadto sa matinumanong mga katawhan. Ingong doktor ug patologo mawad-an unya ako ug trabaho, kay niana unyang panahona wala nay moingon, “Masakiton ako”; bisan ang “kamatayon mawala na unya.” (Isaias 33:​24; Pinadayag 21:​3, 4) Apan malipayon ako nga mawad-an nianang matanga sa trabaho. Busa, sama sa akong higala nga gipailaila sa sinugdanan sa akong sugilanon, ako, usab, makaabiabi sa paglaom nga dili na unya mamatay!​—Sumala sa giasoy ni Dr. Salvador González.

[Blurb sa panid 26]

Naikag kaayo ko sa milagro sa kinabuhi ug sa misteryo sa kamatayon

[Blurb sa panid 27]

Usa ka lahi nga tumong sa kinabuhi