“Misyon Inglaterra”—Usa ka Nalabyang Higayon
Sinulat sa koresponsal sa “Pagmata!” sa Britanya
NGA igahin sa Britanikong mga mantalaan ang kapig 50,000 ka pulgada sa kolumna sa pagtaho sa relihiyon—sa bisan unsang relihiyon—maoy usa ka rekord. Ang “Misyon Inglaterra,” usa ka krusada nga nagpasiugda kang Billy Graham ug Luis Palau panahon sa ting-init sa 1984, nabutang gayod sa mga pangunang-ulohan. Ang mga tigom sa unom ka pasukaranang siyudad sa tibuok nasod gihiusa sa usa ka kampanya sa London sa pagdanig tinagpulo ka libong tawo. Nganong gihukom nga gikinahanglan ang usa ka krusada? Unsa ang sanong sa Britaniko ngadto sa Amerikanhong estilo sa ebanghelismo? Unsa gayoy nalampos sa “Misyon Inglaterra”?
Sulod sa napulo ka tuig ang ideya sa pagdapit kang Dr. Graham sa Inglaterra gipalandong na, apan bisan hangtod sa 1980 ang iladong mga pangulo sa iglesya wala magtago sa ilang pagsupak. Sa walay duhaduha sila nakahinumdom sa kataposang dakong krusada ni Billy Graham sa 1967, nga tapos niadto gipadayag sa usa ka surbi nga 5 porsiento na lang niadtong mihimog publikong deklarasyon ug misugod sa pagtambong sa simbahan ang nagbuhat pa niana usa ka tuig sa kaulahian.
Bisan pa niana, tungod kay ang Britanya anaa sa espirituwal nga pag-us-os, gihatag sa uban ang walay-pag-ukon-ukong pagpaluyo sa mga plano. “Gikinahanglan sa Britanya ang espirituwal nga pagbag-o,” miawhag ang Metodistang tsirman sa “Misyon Inglaterra,” si Lord Tonypandy. Si David Sheppard, Obispo sa Liverpool, mipunting: “Adunay daghang katawhan, sakop kaha sa mga iglesya ug anaa sa daplin sa mga iglesya . . . ang kinahanglan nianang hagita sa pagkawas sa pagduhaduha ug pagkomitir sa ilang kaugalingon nga mahimong mga sumusunod ni Jesu-Kristo.” Busa unsa may mawala? Sa kataposan, sumala sa gipunting sa The Times, “Ang Misyon Inglaterra” nahimong “usa ka karomata nga niana nalipayng mosakay ang kadaghanang pangulo sa iglesya.”
Apan bisan pag nagpadayon na ang misyon, walay hunong ang pagsaway sa mga klerigo. Ang Sunday Telegraph mitaho nga si Richard Jones, pangulo sa Metodistang Iglesya sa East Anglia, mireklamo bahin sa “dili-pino nga doktrina” ug “dili-pino nga estilo” nga gipresentar ni Graham ug ni Palau. Midugang ang Metodistang pangulo si Lord Soper: “Wala gayod ako makaangay sa ilang mga paagi ug pagpaanunsiyo.” Ngano man? Unsa ang mga suliran?
Promosyon ug mga Personalidad
Alang sa aberids nga Ingles ang relihiyon maoy personal kaayong butang. Kini panagsa kaayong hisgotan bisan sa pribado, ug tagsaon ang publikong mga debate. Busa, ang pag-organisar sa usa ka publikong krusada sa pagpasiugdag relihiyon dili kinaiya sa nasod. Ang mapahiuyonon sa linangkob nga Liverpool Daily Post ngani mikomento: “Ang pasundayag sa gabii sa Sabado—kay mao man gayod kana—maoy walay kaulaw Amerikanhong estilo sa ebanghelismo, nga gisabot sa ubang dapit ingong lunlon nga pasundayag.”
Ang uban misaway sa dakong pasiugda sa mga personalidad. “Si Dr. Graham mao ang gipahibalo ingong bituon ug dili ang unod sa iyang mensahe,” mireklamo ang klerigo sa Iglesya sa Inglaterra si Jack Burgoyne sa dihang hapit nang sugdan ni Graham ang iyang mga tigom sa Ipswich. “Siya gihimong usa ka personalidad sa kulto pinaagi sa iyang organisasyon.” Ang bisitang mga mamumulong, mga mag-aawit sa ebanghelyo, ug bisitang mga dagkong tawo giabiabi aron sa pagdani sa mga panon. Apan sa kataposang analisis, si Palau ug si Graham mao ang sentro sa pagtagad. Sa usa ka mapanagan-ong pagsaway, ang Church Times mihinapos: “Adunay dakong pagpanuko bahin sa bug-os nga estilo sa mga tigom ni Graham ug ni Palau—bahin sa paggamit sa musika, sikolohiya sa panon ug personal nga kalarino sa pagmugna sa usa ka pamugos nga ‘abante kamo’ sa usa ka linaing gabii.” Makataronganon ba ang kabalaka sa Church Times?
Pagkakomitir—Alang Kang Kinsa?
Sa naghinapos ang “Misyon Inglaterra,” ang usa ka pag-ihap mipadayag nga duolag usa ka gatos ka libo ang ‘miabante’ aron himoon ang ‘pagkakomitir kang Kristo’ sa hulhog ni Graham ug ni Palau. Apan, katingad-anan nga ang kinabag-an nakig-uban na sa usa ka iglesya. Ang usa ka banabana mihatag nga 15 porsiento mao ang bag-ong mga membro. “Si Dr. Graham literal bang nagsangyaw ngadto sa mga kinabig?” nangutana ang Church Times. “Magaingon ka gayod nga ang potensiyal nga mga kinabig . . . iladong minoriya. Busa, kadto okasyon gayod sa pagdasig sa mga sundalo.” Nganong gikinahanglan ang maong pagdasig?
“Ang dagkong mga tawo sa iglesya nabalaka kaayo,” mipahayag ang Sunday Mercury sa Birmingham, kay ang bug-os gidaghanon sa mga magsisimba sa Iglesya sa Inglaterra “nagaus-os ngadto sa makapabalakang gidak-on.” Si Bill Flagg, usa ka obispo ug tsirman sa “Misyon Inglaterra” alang sa North-West, miila: “Ang mga iglesya hapit nang mosurender bahin sa ebanghelismo sa katuigang 1970.” Sa ilang mga membro, ang panawag ni Billy Graham sa yano mao: “Tingali kamo nabawtismohan na. Tingali kamo kompirmado na, o tingali kamo nagatambong sa simbahan. Apan sa kahiladman kamo dili matarong uban sa Diyos.”
Balik sa Iglesya
“Ang tanan nga mosanong itudlo nga mobalik sa usa ka iglesya,” mipatin-aw ang usa ka ayudante ni Dr. Graham. “Kon moabante ang usa ka tawong walay relihiyosong kagikan among sulayan ang pagpangitag usa ka iglesya nga niana siya mahimong makig-uban.” Dayag ang doktrina sa iglesya dili hinungdanon. Ang Catholic Herald mikomento: “Ang mga Katoliko gibansay tapad sa mga Pentekostal, mga Baptist, mga Anglikano ug Brethren ug uban pa” aron mahimong mga magtatambag sa pagtabang ug pagtambag niadtong miabante. Ang kamatuorang nalangkit ang mga Romano Katoliko nakapaisa sa pila ka kilay ug nakapukaw sa kasuko sa Britanikong Konsilyo sa Protestanteng Kristohanong mga Iglesya nga alang niana ang maong panagsandurotay maoy pagluib gayod sa pasukaranang Kristohanong doktrina.
Bisan pa niana, kon unsa ka lalom ang mga pagkakomitir magpabilin gayod nga lantugionong isyu. Usa ka taho nagpaila nga 500 ‘miabante’ nga mipatim-awng aron lamang dili “makapahiubos sa usa ka bisitang bantog nga tawo.” Apan komosta ang pagsundal niadtong mihimo nianang pagkakomitir? “Ang mga iglesya wala hisangkapi alang sa bag-ong mga magtutuo . . . Ang pila ka iglesya makapuol kaayo nga dili ko gustong motambong,” misugid si Anthony Bush, South-West rehiyonal nga direktor sa “Misyon Inglaterra,” sumala sa gitaho sa The Sunday Telegraph.
Ang pagtudlo sa katawhan ngadto sa mga iglesya katumbas gayod sa pagsugo sa tawong gigutom ngadto sa walay-sulod nga tipiganan sa pagkaon aron sa pagkuhag pagkaon. Sumala sa gipadayag sa usa ka surbi sa Gallup nga gihimo una pa sa krusada sa Merseyside, dos-tersiya niadtong gisukna buot nga ang iglesya dili lamang “mohatag ug moral nga giya” kondili “motudlo usab sa Bibliya.” Sa susamang surbi sa Sunderland, ang hinungdanong mga ulohan nga giingon sa katawhang buot nilang hisayran mao: pakigdait sa kalibotan, pagsagubang sa mga suliran karong adlawa, Diyos, Jesus, ug, makausa pa, ang Bibliya. Unsay gibuhat ni Palau ug ni Graham sa pagtagbaw sa maong mga panginahanglan?
Usa ka Nalabyang Higayon
“Buot kong isulti ninyo sa inyong kaugalingon ‘Buot kong mahibaloan nga kon pananglit ako mamatay karong gabhiona, ako makaadto sa langit.’ Basin kini na ang inyong kataposang higayon, ang labing duol nga inyong maabot sa Gingharian sa Diyos.” Kadto ang hangyo ni Billy Graham alang sa pagkakomitir. Apan ang ingon nga pilosopiyang nalangkit sa kamatayon wala magtubag sa mga pangutana. “Ang mga batan-on nagapangitag butang pagatuohan,” mipahayag si Graham. Apan gikinahanglan sa mga batan-on ang paglaom ug hinungdan sa pagkabuhi, nga makombinsir nga ang kinabuhi adunay katuyoan ug ang Diyos molihok sa pagpanalipod sa ilang kaugmaon.
Sa pagkamatuod, ang Gingharian sa Diyos mao ang gikinahanglan kaayong hibatian sa mga batan-on—ug sa ilang katigulangan. Kining Ginghariana mao ang bugtong paglaom sa katawhan, ang usa ka tinuod nga kagamhanan nga pinaagi niana ang pakigdait, uban ang kinabuhing walay kataposan igapasig-uli sa katawhan. (Isaias 9:6, 7; Mateo 6:9, 10) Gitagna ni Jesus nga ang mga Kristohanon sa atong adlaw mapuliki sa pagsangyaw sa maayong balita sa Gingharian sa Diyos sa tanang nasod, usa ka buluhaton nga niana napuliki ang mga Saksi ni Jehova sa daghan nang dekada karon. (Mateo 24:14) Ang kampanya ni Palau ug ni Graham nakapadani sa kaliboan, apan silang duha napakyas sa pagpatin-aw sa tinuod nga bili sa Gingharian sa Diyos ngadto sa natigom nga mga panon. Usa gayod ka nalabyang higayon!
Apan, sa pagkamatuod dili nato madahom ang daghang sangpotanan sa maong krusada. Ang mga Kristohanon sa unang siglo wala mangampanya sa maong paagi, ni sila mihangyo sa katawhan nianang emosyonal nga paagi. Ang usa ka editoryal sa Church Times mipahayag nga panahon sa maong krusada, “imposible ang paghisgot sa daghang pangutana sa kalmado ug suod nga paagi . . . nga mao gayod ang anaa sa hunahuna sa mga magpatalinghog kon ang mamiminaw maoy hawasnon gayod.”
Ang maalamong tawo si Solomon miingon: “Si bisan kinsa nga walay kasinatian motuo sa matag pulong, apan ang usang maalamon magapalandong sa iyang mga lakang.” (Proverbio 14:15) Sa pagpangita sa kamatuoran, kinahanglang kita magmasinabtanon. Ang labing luwas nga dalan sa pagkakaron mao ang pagsunod sa panig-ingnan sa unang mga Kristohanon sa Berea nga gisangyawan ni Pablo. Sila gidayeg tungod sa ilang kakugi sa “mainampingong pagsusi sa Kasulatan” ug tungod sa paggamit niana ingong awtoridad sa ilang pagtuo. (Buhat 17:11) Ang mga Saksi ni Jehova kanunay nagasunod niining panig-ingnana. Pakigkontak kanila aron sa “paghisgot sa kalmado ug suod nga paagi” sa imong mga pangutana sa Bibliya. Walay mawala kanimo—apan dako hinuon ang imong mabatonan.
[Letrato sa panid 14, 15]
Kadtong misanong giawhag sa pagbalik sa mga iglesya nga ilang gibiyaan tungod kay wala sila makakaplag ug paglaom