Gikan sa Among mga Magbabasa

Sobra ka Mapanalipdanong mga Ginikanan

Pagkatagsaon ang kamatuorang inyong gipahayag sa inyong artikulong “Mga Batan-on Nangutana. . . Nganong ang Akong mga Ginikanan Sobra ka Mapanalipdanon?” (Marso 22, 1985 sa Cebuano) Wala ko hisabti nganong ang akong Papa ug Mama mapanalipdanon kaayo kanako ug maglagot kanako kon maulahi ako sa pagpauli. Sa kaulahian ako nahimong inaina sa usa ka tin-edyer nga batang babaye ug sa wala madugay nasayod ako kon ngano. Kadto tungod kay sila nagmahal kanako.

G. H., Florida

Karong adlawa gibasahan ako sa akong inahan sa artikulong “Nganong ang Akong mga Ginikanan Sobra ka Mapanalipdanon?” Ako diyes anyos ug mopatim-awng ang akong mga ginikanan nabalaka kaayo kanako. Sa gibasahan ako sa akong inahan sa kataposang tudling-pulong, “Kini nagkahulogang ikaw gihigugma,” akong gigakos ug gihagkan ang akong inahan. Kadto nakatandog gayod sa akong kasingkasing. Salamat.

E. K., Arizona

Pagpauswag sa mga Grado

Buot ko lang pasalamatan kamo tungod sa artikulong “Mga Batan-on Nangutana. . . Sa Unsang Paagi Akong Mapauswag ang Akong mga Grado?” (Mayo 8, 1985 sa Cebuano) Ang tanan diha sa artikulo napadapat kanako. Ako 13 anyos ug anaa sa ikawalong grado. Lisod usahay nga makuha ko ang maayong mga grado. Ako sama gayod sa 770 ka estudyanteng giinterbiyo. Ako naghunahunang ako nagtuon na, apan wala diay. Ang TV mao ang akong suliran! Akong sundon ang inyong mga sugyot sa pagbutang ug mga tumong, sa pagpugong sa kaugalingon, ug pagpahilayo sa TV hangtod matapos ang akong homwork.

L. T., Kentucky

Impluwensiya sa TV

Ako naikag sa inyong artikulong “Mga Batan-on Nangutana. . . Aduna bay Akong Malantaw sa TV?” (Marso 8, 1985 sa Cebuano) Ugaling, akong lalison ang usa ka pasukaranang prinsipyo sa artikulo, nga gipahayag sa kataposang parapo: “. . . ang mga programa mahimong peligroso. Tun-i ang pagkontrolar niini [TV]. Kay kon dili, kini makakontrolar kanimo.” Ang kapeligrohan sa mga programa sa telebisyon bahin sa kagawian sa tawo wala gayod kapamatud-i. Kamo duol sa pag-isip sa mga tawo ingong mga makina sa inyong gipasabot nga ang telebisyon “makakontrolar” kanila. Ang mga tawo gihatagan sa Maglalalang sa kagawasan sa pagpili. Kita dunay gahom sa pagpili kon sa unsang paagi ang atong gipili nga kalingawan mag-apektar o dili sa atong mga aksiyon.

D. H., Colorado

Tinuod, ang mga programa sa TV makakontrolar sa usa kon iyang itugot kana. Usab, adunay mas daghang impluwensiya sa mga lihok sa usa kay sa TV. Apan dili realistiko ang dili pagpanumbaling sa kusog nga impluwensiya sa mga programa sa telebisyon tungod sa ilang epektibong giprogramang kombinasyon sa panan-aw ug sa tingog. Matuod, ang mga tawo dunay kagawasan sa pagpili, apan kon ilang pun-on ang ilang mga hunahuna sa mangil-ad nga mga buhat sa kapintasan, anaa ang impluwensiya. Ang ebidensiyang gihatag diha sa taho sa Britanikong tigdukiduki si William Benson, ang mga konklusyong nakab-ot sa National Institute of Mental Health (U.S.), ang panukiduking gihimo ni Dr. Leonard Eron sa University of Illinois, ingon man ang bag-o pang mga pahayag ni Dr. Leonard Berkowitz, propesor sa sikolohiya sa University of Wisconsin, ngatanan nagapamatuod sa negatibong impluwensiya nga ipahinabo sa mapintasong mga programa sa TV diha sa regular nga tumatan-aw.—ED.