Gikan sa Among mga Magbabasa

Kauswagan sa Pagkakat-on

Buot kong pasalamatan kamo sa pagpatik sa mga artikulo nga dili lamang makaiikag kondili matulon-anon usab ug mapuslanon. Ako nagahunahuna ilabina sa “Ang Imong Anak ba May Suliran sa Pagkakat-on?” (Septiyembre 8, 1983 sa Cebuano), “Ang Akong Anak Sobra ba ka Aktibo?” (Nobyembre 8, 1984 sa Cebuano), “Mga Batan-on Nangutana . . . Sa Unsang Paagi Akong Mapauswag ang Akong mga Batasan sa Pagtuon?” (Enero 8, 1985 sa Cebuano), ug “Ikaw Mahimong Mas Maayong Magbabasa!” (Enero 22, 1985 sa Cebuano). Ako nagatungha sa unibersidad sa gobyerno sa Mexico aron magmaestro. Kinahanglang magtuon ako alang sa pasulit, ug daghan ang materyal. Apan sa pagpadapat sa inyong mga sugyot sa mga batasan sa pagtuon, ako ang una sa 6 ka estudyante nga nakapasar sa pasulit, nga gikuha sa 25 ka estudyante. Buot kong isugyot sa tanang batan-on nga nagadawat sa Pagmata! nga dili sayloan bisan ang usa ka artikulo. Kini mobulig sa pagpauswag sa inyong pagkinabuhi.

J. B. G., Mexico

Pagtan-awg TV

Ako nagasulat maylabot sa inyong artikulong “Mga Batan-on Nangutana . . . Duna bay Akong Malantaw sa TV?” (Marso 8, 1985 sa Cebuano) Inyong gikutlo ang magsusulat si Vance Packard nga miingon: “Ang mga ginikanan nga nagabutang sa ilang mga TV sa pulangki lagmit nagapasobra sa pagsanong.” Buot kong isugid ang kasinatian sa among pamilya. Mga duha ka tuig nga miagi kami may TV nga may mga salida nga imong malantaw sa bisan unsang oras sa adlaw o gabii. Among nadiskobrehang kana ang among gibuhat. Unya sa pagmenos sa among gastos, among gihukom nga ang kable putlon ug gihiposan usab ang TV. Karon kaming tanan maikagong magbabasa. Ngani, ang akong anak babaye ang labing maayong magbabasa sa iyang klase. Usab, kami nagtokar sa mga tulonggon. Ang akong bana nagatokar sa piano ug ako sa banjo. Ang among kinamanghoran, nga karon dos anyos, may kaugalingong estilo sa pagtokar sa piano. Busa dili lamang nga kami nagadaginot sa kuwarta kondili nasuod ingong pamilya ug nakadiskobre sa daghan kaayong mapuslanong butang nga buhaton sa among panahon, ug wala gayod mapuol.

J. A. U., California

Panglimbong sa Siyensiya

Akong nakaplagan ang inyong mga artikulo mahitungod sa bantog nga mga siyentipiko, sama kang Newton, Galileo, ug sa uban pa, nga dili maluluton ug kataw-anan. (Septiyembre 22, 1984 sa Cebuano) Ang usa ka tawo dili makalaom sa maayo ug makataronganong kalibotan kon iyang sawayon kadtong si kinsa, sa siyentipikanhong paagi, dakog nahatag sa tanan. Ako natingala nga kamo, kinsa kanunay nagtuo nga kamo husto, makapatik sa maong mga artikulo nga mapanamastamason niadtong si kinsa mihatag sa tanan nga ilang naangkon sa kaayohan sa katawhan.

G. G., Italya

Ako nahibulong kon si Mendel sad-an gayod sa pagpilig mga impormasyon sa dihang siya misulay sa sinugdan sa pagpatin-aw sa labing yanong kaso ug dili pagtagad sa mas komplikadong mga pananglitan.

A. J. P., Inglaterra

Wala namo sawaya kadtong mga siyentipikong ginganlan tungod sa ilang mga kahimoan sa kaayohan sa siyensiya. Bisan tuod ang ulohan gidebatehan pa, ang dungganong siyentipikanhong mga basahon sama sa “Scientific American,” “Science,” “Science Digest,” ug “Science News,” ingon man ang librong “Betrayers of the Truth,” ni William Broad ug Nicholas Wade, nagataganag daghang ebidensiya nga aron sa pagpaluyo ug pagpasiugda sa ilang mga teoriya ang pila ka ilado ug respetadong mga siyentipiko sa nangagi migamit ug mga paagi nga nakabsan sa pagkadili-madapigon, dedikasyon, ug bug-os nga pagkamatinud-anon.​—ED.