Gikan sa Among mga Magbabasa
Makaayo ang Dugos
Dako gayod ang akong pasalamat sa inyong artikulong “Makaayo ang Dugos.” (Nobyembre 8, 1984 sa Ingles) Naglingkod ako sa silya sa bakol sulod sa 18 ka tuig tungod sa aksidente sa sakyanan. Sa matag karon ug unya matugkan akog hubag ug maghigda samtang tambalan sa nagkalainlaing mga haplas. Miabot ang inyong mga magasin, sanglit walay mapildi, misulay ako sa paghunad ug diyutayng dugos. Nakurat ako. Ang maalim sulod sa tulo o upat ka semana naayo lamang sa walo o nuybe ka adlaw. Kon nganong dugayng natago kining tambala, wala ako masayod.
V. M., Mexico
Akong Pakigbisog Hangtod sa Kataposan
Dili gayod ako makapugong sa pagpahayag sa akong dakong kalipay sa inyong artikulong “Akong Pakigbisog Hangtod sa Kataposan.” (Enero 8, 1985) Ako 18 anyos ug nag-antos sa usa ka sakit nga nakaapektog dako sa akong batiis ug sa akong bat-ang. Usahay bation nako ang grabe nga sakit. Kon manakit ang akong tiil, matumba ako sa salog ug magkamang na lang. Wala molampos ang mga doktor sa pagpangita sa hinungdan ug sa tambal. Sama ako kang Monika Siebert—kinsa dili gustong kaloy-an ug determinado sa pagbuntog sa iyang sakit—samtang magpadayon ako sa pagpaningkamot sa akong tumong sa bug-os panahong ministeryo. Salamat kaayo sa pagtaganag sama niining makadasig ug makalig-ong mga artikulo. Naglaom ako nga kining sulata makatabang sa pagdasig sa uban pang mga batan-on nga dili mawad-ag paglaom kon atubangon sa kalisod.
L. K., Denmark
Natabangan sa Kidney Machine
Ang inyong artikulong “Buhi! Sa Tabang sa Kidney Machine” (Hunyo 8, 1985) tukma kaayo sa panahon. Nadaot ang rinyon sa akong ugangang babaye sa miaging duha ka bulan. Karon nakakat-on na siya sa pagpaandar sa iyang kaugalingong makina sa balay. Ang artikulo nakatabang kanamo sa dugang pagsabot sa iyang giantos. Ang parapo bahin sa diyeta nakatabang usab. Karon nasayod na kami sa mga pagkaong likayan kon magsalog pangaon kaniya o sa pagpilig mga gasa kaniya.
L. K., Montana
Daghan kaayong salamat sa artikulong “Buhi! Sa Tabang sa Kidney Machine.” Sa nagpakasal kami sa akong asawa (1979), may tinguha kami sa pagpadayon sa bug-os panahong ministeryo. Sa milabay ang pito ka bulan, gisultihan ako nga aduna akoy grabeng sakit sa rinyon. Sa ulahi kinahanglang moagi akog dialysis treatment. Human sa duha ka operasyon gisukdan akog katiter aron masugdan ang padayong peritoneal dialysis. Sa mubong pagkasulti, kami sa akong asawa nakabaton ug masulayong mga panahon. Nagpaabot kamig mga artikulo sa Pagmata! nga makatabang kanamo sa pag-atubang ning sakita. Dayon sa paghiuli sa balay gikan sa among naandang 160-milya (260-km) idabuweltang pagbiyahe ngadto sa Lexington, Kentucky, alang sa akong duha ka bulang pagpatan-aw sa doktor, nakadawat akog isyu sa Pagmata! nga naundan ning artikuloha. Kon nasayod pa lamang kamo sa akong gibati sa nakita ko kini. Wala na ako mobating nag-inusara ug lahi. Akong gibati nga ang eksperyensiya ni Dorothy Bull gisulat alang gayod kanako. Ang pagbasa bahin sa iyang pag-antos nakapalig-on sa akong kaugalingong determinasyon sa pagpadayon sa pag-alagad kang Jehova bisan pa sa akong pisikal nga mga limitasyon.
W. R., Kentucky