‘Kada Adlaw Laing 274 ka Wala sa Panahong Kamatayon’

Ubos niana nga ulohan ang publikasyon sa Toronto nga The Journal di pa dugay mitaho nga ang Medikal nga Asosasyon sa Britanya nagpasiugdag kampaniya batok sa mga paagi sa paanunsiyo sa industriya sa tabako. Ang artikulo mikutlo kang Dr. John Havard, nga sekretaryo sa asosasyon, nga nag-ingon: “Ang industriya sa tabako nakagastog minilyong mga libra [sterling] sa pagsuhol sa paanunsiyo, relasyon sa katilingban, ug promosyonal nga mga eksperto sa pagtabang kanila sa pagtuboy sa produkto nga atong nahibaloan​—ug angay nga ilang mahibaloan​—nga maoy hinungdan sa sakit, balatian, ug kamatayon.

“Ang paanunsiyo, mga dula ug mga pag-isponsor sa mga arte, mga bangga, mga besti nga adunay iladong mga marka, ug mga bakasyon maoy bahin sa tanang pagsulay sa industriya sa paglimbong sa ilang mga pumapalit sa pagtuo nga ambongan, makaayo sa panglawas, ug tilinguhaon ang pagtabako.

“Kining maong mga pumapalit maoy among mga pasyente, ug kami nahibalo sa kamatuoran​—nga ang pagpanabako mopahinabog makalilisang nga mga sakit ug busa daghang wala kinahanglanang mga kamatayon nga ang numerong 100,000 ka wala sa panahong kamatayon sa usa ka tuig daw dili gayod masabot.

“Ang mga kompaniya sa tabako mao ang responsable sa dakong pagtabon nga gihimo sa tibuok-yuta pinaagi sa industriya nga sa pagkawalay puangod nagsalikway sa medikal nga mga kamatuoran.”