Ang Edukasyonal nga Lumba sa Japan

Sinulat sa koresponsal sa “Pagmata!” sa Japan

“SA PAGKATINUOD, wala nay labing hinungdanon o labing dako sa kalamposan sa katilingban sa Japan,” miingon ang Propesor sa Harvard si Edwin O. Reischauer, “kay sa sistema sa edukasyon niini.”

Apan, karong bag-o, ang mga tunghaan sa Japan ginaatake. Ang reporter si Yoshiko Sakurai miingon: “Ang edukasyonal nga sistema sa Japan nahimong lumba aron makapasar sa mga eksamin imbes usa ka kasangkapan nga pinaagi niini matudloan ang mga estudyante.” Si Sasuke Kabe, nga usa ka prinsipal nga Hapones, gitaho usab nga miingon: “Sa naandan atong ginapasiugda ang pagbaton ug kahibalo kay sa pagpatunghag timbang ug daghag kahibalong mga tawo.”

Busa misupak ang daghang edukador nga nahimong edukasyonal nga lumba ang mga tunghaan sa Japan—usa ka mapioton, maindigong pagsulay. Nganong mitungha kining situwasyona? Tungod sa dakong pagpabili nga ginahatag sa mga Hapones sa pagtahod sa uban ug sa kalamposan. Ang pagbaton ug trabaho sa usa ka iladong kompaniya gipabilhan ug dako. Apan, sa kasagaran, aron makasulod niining matanga sa trabaho, kinahanglang graduwado ka sa usa ka inilang unibersidad.

Hinunoa, gawas kon nakatungha ka sa usa sa mga tunghaan sa hayskol, ang imong tsansa nga makaeskuyla niining piniling mga unibersidad gamay kaayo. Apan may kalagmitan nga dili ka makatungha sa inilang tunghaan sa hayskol kon dili ka makasulod sa inilang tunghaan sa junior hayskol, diin dili mahitabo kon diyutay rang estudyante niini ang makapasar sa eksamin aron makasulod sa pagtungha sa junior hayskol. Bisan ang kindergaten nga imong gitunghaan magatino usab sa imong pag-asenso sa kompaniya!

“Impiyerno nga Eksaminasyon”

Nan, dili ikahibulong, nga nakasulat ang kolumnistang si Kimpei Shiba nga “ang matinguhaon sa edukasyon nga mga inahan . . . [magsugod] sa pagdala sa [ilang] gagmayng mga anak nga 2 anyos pa lamang aron matudloan alang sa eksaminasyon para sa kindergarten aron makasulod sila sa mas maayong mga tunghaan sa elementarya.” Grabe kaayo ang kompetisyon nga usa lamang ka estudyante sa nuybe ang makapasar.

Tapos makasugod sa pagtungha sa elementarya, igugol ang sunod 12 ka tuig sa pagpangandam alang sa sunodsunod nga mga eksaminasyon nga gikinahanglan aron makasulod sa taas nga lebel sa pagtungha. Miingon ang kolumnistang si Shiba: “Grabe gayod kaayo ang kompetisyon nga ang ekspresyong ‘impiyerno nga eksaminasyon’ namugna. Inigsulod sa kabataan sa siksto grado sa tunghaang primarya, mag-apas sila sa pagpauli dala ang [homwork] nga nagkinahanglag mga 2 ka oras sa pagtuon. Dayon magdalidali sila sa pagkaon sa ilang paniudto sa dili pa moadto sa pribadong mga tunghaan nga gitawag ‘juku,’ nga nag-espesyalisar sa pagpaandam sa mga estudyante alang sa eksaminasyon aron makasulod sa pagtungha sa junior high, diin ang mga estudyante mapiotong tudloan sulod sa 3 ka oras sa 7 ka adlaw sa usa ka semana.”

Tingali magtuo ka nga, tapos makalabang niining makalilisang nga pagsulay, ang tanang entrante sa unibersidad maikagon sa pagtuon, hawod nga mga estudyante. Apan dili, miingon ang magsusulat si Kimpei Shiba. Iyang gibatbat ang kasarangang estudyante sa unibersidad ingong usa nga “nagaparelaks-relaks lang, nga magpunayng dulag madyong sa tunga sa adlaw sa oras sa pagtungha tungod kay nasayod siya nga seguradong makadawat siyag diploma. Ang importante lamang kaniya mao ang pagbaton sa gikinahanglang mga kredit.” Daw ang kadaghanan sa mga tigpaempliyo wala kaayoy pagtagad kon pilay nakat-onan sa mga graduwado. Alang lamang ang mga trabaho sa nakagradwet gikan sa iladong mga unibersidad.

Mga Bunga sa Kompetisyon

Dili ikahibulong, mitungha ang tanang matang sa kadaotan ug mga suliran niining maindigong palibot. Kada tuig hiphipan sa mabalak-ong mga ginikanan ang pagsulod sa ilang mga anak ngadto sa mga unibersidad, sa hayskol, ug sa junior hayskol nga mga tunghaan. Maghikay ang pila ka ginikanan ug palsipikadong mga diborsiyo aron ang usa ka ginikanan ug bata makarehistro sa ilang pinuy-anan sa teritoryo sa usa ka iladong tunghaan. Apan kon libolibo ka estudyante ang mag-ilogay sa ginatos lamang nga bakante sa tunghaan, mangabalo ang kadaghanan. Mitultol kinig paghikog sa pipila. Gipahungaw sa uban ang ilang kapakyasan pinaagi sa mga lihok sa kabangisan.

Tingali ang labing makapabalaka sa tanan mao ang mga epekto niining nagaunayay nga palibot sa mga estudyante. Makaikag, misugo ang Opisina sa Primero Ministro ug grupo sa pagsusi sa mga hunahuna sa mga batan-on, nga nagpanuigong 18 ngadto sa 24, sa 11 ka nasod. Ang pangutana nga gibangon mao, ‘Gusto ka bang mahimong adunahan?’ Nanguna ang Japan sa mga nasod nga mitubag ug oo. Sa laing bahin, gipangutana ang mga batan-on kon buot ba nilang motabang sa mga tawo sa buluhaton alang sa kaayohan sa katilingban. Nangiwit ang kabataang Hapones sa listahan. Busa bisan pa nga hawod sa akademiko ang mga tunghaan sa Japan, hatagan sila sa pipila ug mubong grado kon bahin na sa pagpatunghag timbang, matinagdanon, maayong mga personalidad.

Ang edukasyonal nga pilosopiya sa paglampos bisan sa unsang paagi aduna bay makadaot nga mga epekto sa mga estudyante? Tagda ang suliran nga mitungha sa mga tunghaan sa Alemanya.

[Blurb sa panid 5]

“Ang sistema sa edukasyon sa Japan nahimong lumba aron makapasar sa mga eksamin imbes usa ka kasangkapan nga pinaagi niini makakat-on ang estudyante”

[Letrato sa panid 5]

Sayo nga magsugod ang kompetisyon

[Tinubdan]

Japan Information Center