Itom nga mga Militante Nahimong mga Saksi ni Jehova

Usa ka Makinaadmanong Pagpangita Gikan sa Puwersa sa Itom Ngadto sa Pagkanawad-ag Kasibot ug Dayon sa Kahayag

ANG semana sa pagpasinati sa puting mga estudyante diha sa Tufts University sa dakong Boston nagpakakat-on bahin sa mga klase ug sa paglibot sa natad sa eskuylahan. Ang itom nga mga estudyante nakigkita sa mga tawo sama kang Angela Davis, Dick Gregory, mga Itom nga Muslim. Ug walay kalibotan ang mga awtoridad sa eskuylahan, mga kriminal gikan sa militante nga kalihokan. Sila miabot uban sa ilang mga bodigard sa pagpahibalo kanamo kon unsay nagakahitabo ug unsay buhaton sa pagsugod ug rebolusyon. Ilang gibuksan ang among mga mata sa daotang mga buhat ug gipukaw kami sa dinaliang panginahanglan sa black power o puwersa sa itom. Sa panuigong 17 dali kang mapukaw sa mga inhustisya, ug akong nakita ang panginahanglan nga magmapintas pa.

Tuig kadto kadto sa 1969 ug ang akong unang tuig sa Tufts. Ang usa ka kawsa nga masulayan ang akong pagkaitom haduol na. Usa ka dormitoryo ang gipatindog nga may pipila ka itom nga mga trabahante. Sa pagsubang sa adlaw diha na kami sa lugar sa kontruksiyon. May kauban kami nga gikan sa gawas sa among pundok nga miabot nga nagdalang mga posil ug ubang mga armas. Nanudlo kami ug mga kapitan. Ako ang kapitan sa usa sa mga estasyon. Tulo ka babaye ang akong kuyog. May mga walkie-talkie kami ug nagbarikada sa sulod.

Apan sa dihang miabot na sa pagtrabaho ang mga trabante, pastilan, nasuko kaayo sila! Alang kanila panghilabot na kadto sa pangabuhi. Walay kalabotan kini sa kolor. Apektado niini ang ilang pamilya. Gusto nila kaming tadtaron! Miabot ang mga polis sa tukmang panahon, nga nagsul-ob ug besting pang-away ug mga batuta nga mas taas ug usa ka piye kay sa naandan. Nahimo silang padir tali kanamo ug sa mga trabahante, ug natapos ang komprontasyon.

Duha ka kampus ang akong gisudlan niadtong tuiga. Nalista ako sa Tufts apan naapil sa programa sa Tufts sa pagbayloay ug mga estudyante sa Massachusetts Institute of Technology. Diha sa MIT giduol akog itom nga pisiko sa graduate school. Didto sa librariya sa MIT, daghan kaayog makuhang mga impormasyon mahitungod sa mga bomba ug mga bayanihong mga buhat sa militar. Buweno, giingnan ako niining itom nga pisiko: “Tan-awa ra, igso, kon gusto nimong lumpagon kini [ang dormitoryo nga gitukod], aw—makahimo ka kay enhinyero ka man, dili ba?” Miingon ako, “Oo.” Siya miingon, “Makamao akong mohimog bomba, ug malumpag nato kining tanan.” Apan dili ako andam niadto.

Ang akong ngalan mao si Larry Whitehead. Natawo ako sa Washington, D.C., ug gipadako sa Arlington, Virginia. Naagian ko ang daghang mga pagbiaybiay dagko ug gagmay, nga gipahamtang diha sa mga itom. Naeksperyensiyahan ko ang unang tuig sa pag-ubanay sa puti ug itom sa hayskol—nga misamot tungod sa presensiya sa Ku Klux Klan ug sa partido sa Nazi diha sa Virginia. Dako kaayo ang akong pagdumot sa mga puti, apan sa Tuft ako nakakat-on nga mahimong militante.

Miduyog Kanako si Madeline sa Tufts

Sa pagkasunod tuig miabot si Madeline sa Tufts—baga kaayog buhok nga Afro, may mga poster nga nagpasundayag sa mga kumo nga itom, ug uban pang mga dayandayan sa Puwersa sa Itom. Iyang giasoy kon sa unsang paagi midangat kini kaniya:

“Lahi ang akoa. Sa dihang miabot ako sa Tufts, militante na ako. Nagdako ako sa puti nga kasilinganan; halos puti ang tanan sa hayskol; ang kadaghanan nakong mga higala mga puti. Apan sa akong ika-11 ka tuig, dihay kagubot nga nahitabo sa kapiteriya—gibuno si Martin Luther King, ug nagbukalbukal ang kasuko sa daghang mga dapit. Busa nag-away ang mga itom ug puti diha sa kapiteriya. Napugos sila sa pagsira sa eskuylahan. Nakurat ako sa dihang ang akong higalang mga puti nga kadungan nako sa pagdako nagpakitag dakong kasilag ug pagdumot. Nasuko ako niini. Kalit nga mihimo akog kausaban. Giputol nako ang akong buhok, gihimo kining Afro ug mainiton kaayo alang sa Puwersa sa Itom. Sa dihang miabot ako sa Tufts, kabutohon na ang akong kasuko batok sa mga puti.”

Kami ni Madeline nahimong aktibo sa mga kalihokan sa itom diha sa Tufts. Yugto kadto sa dagkong mga kausaban. Kaylap ang dagkong mga kalihokan diha sa mga kampus. Mainit nga isyu ang gubat sa Vietnam. Aktibo ang mga Estudyante Alang sa Demokratikong Sosyedad. Misugod sa pagkaylap ang paggamit ug droga. Kami ni Madeline wala mogamit ug droga, apan dili lamang migamit ang among kauban ug droga kondili namaligya pa gayod niini.

Ang eskuylahan sa Tufts mas daghan ang puti, apan ilang gitugotan ang itom nga mga estudyante sa paglain ug grupo, ug kami usab adunay Afro Society Black Orientation. Nahimo akong presidente sa Afro-American Society ug sa praternidad sa tibuok-siyudad. Ang pagpatay kang Martin Luther King maoy nakapukaw sa kadaghanan sa mga kalihokan sa itom, ang kamatayon ni Malcolm X nakadugang sa kalig-on niini, ug sa dihang gipatay si Jack ug Bob Kennedy (sila mao ang tagsaon “maayong mga tawong puti”), mibati ang itom nga nakabsan sa paglaom.

Gusto namo nga may kaugalingon kami nga pag-ila. Misugod kami sa pagbasa sa sinulat ni Marcus Garvey, Back to Africa, ug sa sinulat ni James Baldwin. Ang mga salida nga among tan-awon nagpasundayag sa mga paagi sa terorista, mga itom nga anaa sa kawalad-on ug gipihig. Gipakita niini ang mga babaye ug mga anak sa Arabo nga makasulod sa mga lugar nga dili mahimong kasudlan sa uban, busa mosulod sila nga may bombang gibakos diha nila ug gipabuto ang lugar—ilang gihalad ang ilang kinabuhi alang sa kawsa. Busa natudloan kami sa pagbuhat usab sa ingon.

Nanudlo Kami ug “Relihiyon sa Itom”

Nagtuo na ako ug Diyos, nagapangita kaniya. (Buhat 17:27) Apan bug-os nga nawala nako siya sa 1970. Nanudlo kamig kurso diha sa Tufts nga gitawag Relihiyon sa Itom. Sa pagkatinuod atake kadto sa Bibliya. Ang mga Itom nga Muslim maoy dakong impluwensiya niini, ug sila miingon nga mga demonyo ang mga puti nga moduol kanimo nga magdalag Bibliya. Ilabina kadtong may asul ug mga mata ug bulagawng buhok. Si Jesus, sa laing bahin, itom nga tawo nga samag balhibo sa karnero ang buhok.

Mao pay among pag-abot ning puntoha sa kurso sa dihang nahibalag ko si Tim Sieradski. Dako siyang tawo, bulagaw ang buhok, ug asul ang mga mata, ug nagdalag Bibliya—puti, demonyo nga asul ang mga mata nga nagdalag Bibliya kong nakakita man akog usa! Sa hunahuna ko. Usa siya sa mga Saksi ni Jehova. Sa dihang mitungha siya sa akong pultahan, naghunahuna ako: ‘Tan-awa ra kining dako, asul ug matang demonyo nga manudlo kanako bahin sa Bibliya.’ Apan akong nahibaloan sa ulahi nga nahibalo gayod siya sa Bibliya, ug gusto kong ipakita niya kanako diha sa Bibliya kon diing dapita nga giingon nga samag balhibo sa karnero ang buhok ni Jesus.

Apan naghisgot hinoon siya bahin sa kataposan sa kalibotan, nga nagpamatuod diha sa Kasulatan. Sanglit usa ka enhinyero, akong napamatud-an sa siyentipikanhong paagi nga naglungtad ang Diyos. Wala kaayo akoy kaayoran sa Bibliya—wala gayod makatuon niana. Apan may gibasa si Tim sa Bibliya nga nakapukaw kanako: “Siya nagbuhat tanang nasod sa katawhan gikan sa usa ka tawo, aron papuy-on sa tanang dapit sa yuta.” (Buhat 17:26) Busa namati akong kang Tim.

Apan dili gustong mamati si Madeline! Pasagdi siya sa pagsugilon kon ngano: “Bug-os akong nawad-ag kaikag sa relihiyon,” miingon siya. “Sa dihang miabot ako sa panuigong 16, nakita kong pagminaut kini. Nahibalo ako nga dili maayo ang akong pagkinabuhi—niining panahona nag-ipon kami sa pagpuyo ni Larry—busa dili ako gusto moadto sa simbahan ug magminaut bahin niana. Busa matag-abot ni Tim, nga bulagaw ang buhok ug asul ang mga mata ug nagdalag Bibliya, dili ako motingog kaniya. Inig-abot niya molakaw ako.”

Wala na kami makabalita kang Tim. Dili pa kami andam sa pagbulag sa kalihokan sa Puwersa sa Itom. Mihikay ang Afro-American Society sa pagduaw ug sa pakigkita sa pundok nga gitawag The Last Poets o Ang Kataposang mga Magbabalak. Mga itom kini sila nga nagakomposog mga balak aron himoong musika. Rebolusyon kanunay ang ilang hisgotan: ‘Mga itom mag-usa, magpakusgan; pukanon ang katilingban sa puti, ug himoon ang kinabuhi nga mas maayo.’ ‘Magtinabangay, magdinuyogay’ maoy garay sa ilang balak. Busa kami ni Madeline midesisyon nga makig-atubang lamang sa mga itom.

Pagduhaduha Miturok ug Mitubo

Mihatag kamig deposito alang sa apartment nga mga itom ang tag-iya. Tapos naghulat sulod sa tulo ka bulan ug namati sa daghang mga pasangil, ilang gisultihan kami nga ilang gipaabangan kini sa lain. Sa wala pa kadto, may apartment ako diha sa kasilinganan sa itom, ug gilungkab kini sa mga itom ug gikawat ang tanan nakong butang. Usa ka gabii didto ako sa usa ka tindahag sorbetes nga nakigsulti diha sa telepono sa long distance sa akong inahan. Tulo ka itom ang misulod ug nangawat sa maong lugar. Wala ako makamatikod hangtod nga nadunggan ko kining tawong itom sa akong likod nga nag-ingon, “Relaks lang, igso.” Milingi ako, ug may dala siyang .45 awtomatik nga posil nga gition sa akong likod. Igso nakong itom, ha!

Among nakita ang mga itom nga among-amongan sa mga itom sama sa puti. Dili sa kolor, dili sa rasa; anaa lang kini sa tawo. Makapasubo ug makapawala kini sa kasibot. Among gitan-aw pag-usab ang mga itom nga among nakauban sa Tufts. Diha sa mga praternidad ug sa mga sororidad, walay makitang tinuod nga panag-igsoonay, ni nakita usab namo kini diha sa Afro-American Society. Ang uban nakong mga kauban wala maglisod sa pagdaot sa itom nga mga babaye. Moeskuyla ang itom nga mga babaye. Nag-antos ang ilang mga ginikanan sa daghang mga tuig aron makakuwarta sa pagpatungha kanila didto. Dayon ipailaila sila sa itom nga mga lalaki sa mga droga. Ang uban midangat sa pagsulay sa paghikog.

Dayon among gitan-aw ang tanang mga batan-on sa among palibot, itom ug puti. Ang uban namaligya o giyanon sa mga droga, ang uban mga alkoholiko, ug ang kadaghanan kanila puliki kaayo sa kaugalingon. Ug mao ba kining kaliwatana nga kanila nasandig ang kaugmaon sa kalibotan? Bisan asa kami molingi, kami walay nakitang mga tubag, gikan sa mga itom o sa mga puti.

Misugod ang Pagkawala sa Kasibot

Ang mga pagkamahay nahimong pagkawala sa kasibot. Gibatbat ni Madeline ang iyang nagakadakong problema: “Anaa kanamo ang tanang mga tigom, ug diha niana magpunay silag sulti nga dili kinahanglan ang mga lagda. Ang tanang butang nga gusto nimong buhaton okay lang. Anarkiya kana. Wala kay mahimo nianang paagiha.”

Miuyon ako. Ang dugay ko nang gipangita mao ang mga giya nga pagakinabuhian sa katawhan. Sa sinugdan akong gibati nga kon itom pa kitang tanan, ug ang tanan gikan sa usa ra ka dapit, nahiusa sa usa ka komung kawsa, nan maayo unta ang lakat sa tanan. Apan among nakita nga walay kalainan ang mga itom sa mga puti—dili maayo, dili daotan, may sagol nga maayo ug daotan. Kinahanglang adunay pasukaranan ang panaghiusa gawas pa sa rasa.

Sa matin-aw, kinahanglang mohimo kamig mga kausaban. Dili maayo ang among lakat. Usa ka gabii niana nakahinumdom ako: “Dihay salida sa Tufts nga nagpasundayag sa gidak-on sa uniberso, ang kahusay niana. Natingala ako niini, ug nahinumdoman kong nagpalandong ako niadtong panahona nga dili kana mahitabo nga sulagma lamang. Kon naglungtad kanang matanga sa kahusay sa tibuok nga uniberso, aduna gayoy mga giya nga gihatag sa Diyos alang sa katawhan.”

Mibiya kami sa Tufts, nagpakasal, ug misugod sa among pagpangita sa Diyos nga naglalang ug mahusayng uniberso, sa planetang Yuta, ug sa katawhan nga anaa niana.

Sa panahon sa among pagpangita, mitambong kami ug pagtuon sa Bibliya diha sa simbahan sa African Methodist Episcopal. Among gidala ang librong Aid to Bible Understanding nga gibilin ni Tim kanamo sa pipila ka bulang miagi. Ang diskusyon maoy mahitungod sa mga siyudad nga dalangpanan. Walay nahibalo kon unsa kana hangtod nga akong gibasa kini gikan sa librong Aid. Nalipay ang tanan hangtod nga ilang nahibaloan nga ang libro gipatik sa mga Saksi ni Jehova. Hilom kaayo ang lawak. Ug pagtuon ba diay kini sa Bibliya?

Kahayag Nagbag-o sa Among mga Kinabuhi

Migawas kami ug wala na mobalik. Nagpakita kini kanamo nga ang nahibalo lamang sa ilang gipanulti mao si Tim ug ang mga Saksi ni Jehova. Nahinumdoman nako ang apelyedo ni Tim, akong gitan-aw ang numero sa iyang telepono, ug gitawag siya. Gisugdan niya kami ug pagtuon sa Bibliya sa balay. Ug karon bisan si Madeline nalipay sa pakigsulti kang Tim—dili na siya “bulagaw, asul ug mata nga demonyo.”

Makaikag nga mga butang ang nahitabo. Nagtrabaho ako sa dakong enhinyeriya nga kompaniya sa Boston. Gipatawag nila ako sa opisina ug gisultihan ako nga kon moundang ako sa pagkahimong Saksi ug mobalik sa pagtungha sa kolehiyo ug mokuhag master’s degree, himoon nila akong bise presidente sa korporasyon. Mibalibad ako. Kami ni Madeline gibawtismohan sa 1975 ingong mga Saksi ni Jehova, ug misugod si Madeline ingong regular bug-os panahong payunir.

May makalipay akong eksperyensiya diha sa enhinyeriya nga kompaniya. Nagtrabaho ako uban kang Mike, usa ka itom nga enhinyero, didto. Maayo siyang modebate, ug ang iyang paboritong ulohan mao ang ebolusyon. Niining partikular nga adlaw, dihay lima pa ka enhinyero nga presente, nangisog gayod siya sa pagpamatuod sa ebolusyon. Dayon milingi siya nako ug miingon: “Dili ba tinuod kana, Larry?”

Busa napugos ako sa pagpamatuod. Wala pa gayod ako nakapamatuod ug grupo sukad. Angay unta, apan tungod kay enhinyero ako, akong gitago kini. Busa napugos ako ni Mike. Busa akong gitubag si Mike: “Mike, dili ako makauyon niana.” Nasuko kaayo siya! Sa ulahi akong gihatagan siya sa publikasyon sa Watch Tower nga Did Man Get Here by Evolution or by Creation? Gibasag hurot ni Mike kadtong libroha! Karon usa na siya ka ansiano sa kongregasyon sa mga Saksi ni Jehova sa Richmond, Virginia.

Materyalismo Dili Igo

Sa dihang miundang ako sa enhinyeriya nga kompaniya sa Boston sa 1977, gipatawag nila ako ug gisultihan nga nagbinuang ako. Nahibalo sila nga moundang ako tungod kay gusto kong mahimog dugang pa ingong Saksi. Dili gayod nako kalimtan kining tawhana nga nagbarog sa bentana nga nagtan-aw sa siyudad, nga miingon: “Whitehead, posible nga madato ka, makasapi ka, makapalit kag mga awto.” Daghan siyag gisulti. Apan 21 anyos ako niadto ug nakapalit nag duha ka bag-ong awto ug balay. Nakab-ot ko na niadtong panahona nga gilantaw sa mga tawo nga makab-ot inig-abot nimog 40. Wala nay butang dinhi nga among kab-oton pa. Ang sistema wala nay ikatanyag sa materyal nga paagi.

Dili pa kadto igo. Wala ako matagbaw, sama sa gipasidaan sa Bibliya sa daghang kasiglohang milabay: “Kadtong nahigugma ug salapi dili matagbaw sa salapi, ni kadtong nahigugma sa bahandi, matagbaw sa kinitaan. Kini usab kakawangan man.”—Ecclesiastes 5:10.

Sa ulahi gipadala kami sa Watchtower Society sa lugar nga dako ug panginahanglan, sa Las Vegas. Mipuyo kami didto sulod sa lima ug tunga ka tuig. Kaming duha nag-alagad ingong bug-os panahong mga ministro sa matag karon ug unya. Dihay mga panahon nga kulang ang kalan-on, apan wala gayod namo pasagdi ang pangunang mga butang: pagtuon, pag-alagad, pag-ampo. Sama kang apostol Pablo, kami makamaong magkinabuhi sa kadagaya ug makamaong magkinabuhi sa kakabus.—Filipos 4:12.

Sa Las Vegas misugod ako sa pagtrabaho ingong panday, dayon ingong draftsman sa kompaniya sa telepono ug sa kataposan nahimong koordinator sa estado alang sa kompiyoterisadong proyekto sa Central Telephone Company. Mipauli ako sa ulahi sa Alexandria, Virginia. Mitrabaho ako sa Xerox ingong computer systems analyst, nga gipadala sa dagkong mga korporasyon. Ako karon adunay kaugalingong negosyo ingong computer systems analyst.

Ako ug si Madeline nag-alagad karon sa kongregasyon sa mga Saksi sa Alexandria. Ansiano ako didto ug sekretaryo sa kongregasyon. Kami ni Madeline mapasalamaton kang Jehova sa paghatag kanamog kahayag sa pagsabot nga walay puwersa sa tawo, itom o puti, nga maaoy tubag sa mga suliran sa katawhan. (Salmo 146:2, 3) Malipayon kami karon sa ‘pagpasidlak sa kahayag sa Iyang gingharian’ alang sa kahayag sa uban nga may mga mata nga andam nga motan-aw. (Mateo 5:14-16)—Sumala sa giasoy ni Larry Whitehead.

[Letrato sa panid 13]

Ang mga Whitehead uban kang Tim, ang ila kas-ang “bulagaw, asul ug matang demonyo”

[Letrato sa panid 14]

Nakita sa mga Whitehead nga magantihon ang pagkahimong aktibo sa Kristohanong ministeryo