Panganunsiyo—Kinahanglanon Ba?
ANG asul nga peacock sa India kalit nagpasundayag sa anindot nga kolor. Ang mga balhibo, nga lima ka pilo sa gitas-on sa lawas niini, nga magilakon tungod sa daw-mata nga mga puntik, mibukhad sa iyang luyo nga mikinlaw sa kahayag sa adlaw. Usa ka labing nindot nga talan-awon, siya inanay miparada atubangan sa umaabot niyang paris, ang bayeng peacock. Unsaon kaha niya pagsalikway sa butang gibatbat nga “labing tahom . . . nga anunsiyo sa kalibotan”? Ang panganunsiyo maoy tibuok-kalibotang katingalahan. Ang among serye nagasusi sa motibo ug mga epekto niini, sumala sa pagsabot sa koresponsal sa Pagmata! sa Britanya.
Sa panguna, unsa man ang panganunsiyo o advertising? Kini mao ang buhat sa pagpahibalo sa usa ka butang. Sa kinaiyahan kini kasagarang kinahanglanon aron matipigan ug mosanay ang kinabuhi.
Pananglitan, ang nagatiyabaw nga mga lobo nagaanunsiyo sa ilang presensiya aron malikayan ang wayhinungdang mga pakigtagbo sa ubang pundok samtang ang matag usa mangitag pagkaon. Ang bayeng kabakaba makatiktik sa pila ka molekula sa pheromone, usa ka kemikal nga substansiya, nga gipagawas sa milyamilyang gilay-on sa usa ka laki sa iyang espisye nga nagaanunsiyo alang sa usa ka paris. Ang mga manunukob maalamong molikay sa cinnabar caterpillar, kansang tin-awng dalag ug itom nga mga badlis nagaanunsiyo nga kini dili lamang mangil-ad kondili makahilo.
Komosta kitang mga tawo? Kita miabanteg usa ka tikang ug nagkomersiyo sa arte sa panganunsiyo o advertising. Tagda ang pila ka pananglitan.
Komersiyal nga Panganunsiyo
Usa ka Ehiptohanong papiro nga nadiskobrehan sa Thebes tingali mao ang labing karaang komersiyal nga panganunsiyo nga nagalungtad. Kini, nga gisulat sa kapig tulo ka libong katuigan kanhi, nag-anunsiyo sa usa ka ganti sa pag-uli sa milayas nga ulipon.
Ang publikong mga tigbandilyo sa karaang Gresya, nga sa ulahi nailhang mga tigbandilyo sa lungsod sa Uropanhong kasiyudaran, sa pagkamatuod nagbalhinbalhing mga tawong nagmantala, nga nagdani sa pagtagad nganha sa ilang mga pamahayag.
Sa Inglaterra sa edad media, ang simbolo sa tulo ka nagbitayng bulawang bola, nga gikuha gikan sa coat of arms o eskudo sa Italyanong Medici nga pamilya sa mga kapitalista, nag-anunsiyo sa mga tigpautang. Karong adlawa, kana mismong ilhanan nagapadayon sa pagpaila sa prendahan.
Kapig 250 ka tuig kanhi, si Dr. Samuel Johnson sa London, mireklamo: “Ang mga anunsiyo karon daghan kaayo nga sila dili na kaayo tagdon sa pagbasa. . . . Ang patigayon sa panganunsiyo karon hapit nang mahingpit nga lisod ang pagsugyot ug kauswagan.” Apan sukad niadto, dako gayod ang kausaban! Sa miaging 50 ka tuig, ang patigayon misulbong ngadto sa usa ka industriya.
Ang panganunsiyo dakong negosyo karon, dako kaayo. Ang mga peryodiko, mga billboard, sinawng mga panid sa magasin, mga sugang dagitabnon, mga komersiyal sa radyo ug telebisyon—tanan nagailog sa atong pagtagad sa waypuas nga pagbomba sa paghaylo, usahay prangka ug sa ubang panahon katingad-ang kleber ug malalangon.
Ang langgis nga dahunog sa modernong mga ayroplano nagadani sa atong panan-aw ngadto sa dagko kaayong galupad nga mga anunsiyo. Ang gugagmayng ayroplano nagaguyod ug mga eslogan latas sa kalangitan. Ang pagkadaiya daw walay kataposan! Apan kana tinuod bang kinahanglanon?
Sa unsang paagi nagalihok ang panganunsiyo? Kon menos kana, kita ba, ang mga pumapalit, magmaayo—o madaot? Unsa ang bahin niana sa atong mga kinabuhi?
Sa atong matag-adlaw nga kinabuhi, kita kanunay maladlad sa panganunsiyo. Sa telebisyon ug radyo, sa mga magasin ug peryodiko, ingon man sa ubang paagi, kita gitanyagan sa mga produkto ug mga serbisyo niadtong maikag sa pagbaligya kanila. Unsa ang maayong mga puntos sa panganunsiyo, ug unsa ang mga daotang puntos? Sa unsang paagi kining tanan magaapektar kanimo?