Gikan sa Among mga Magbabasa
Sa Dihang Masayon ang Pagsag-ulo
Nagsulat ako kaninyo bahin sa artikulong “When Memorizing Comes Easy.” (Hulyo 22, 1987 sa Ingles) Dunay usa ka bahin sa ulohan nga may maayong epekto apan lakbit lang nga gihisgotan. Mao kana ang pagsumpo sa mga anak nga mahimong hambogiro tungod kay dali silang makasag-ulo. Nakaingon ako niini gikan sa akong kaugalingong eksperyensiya. Sa kuwatro pa ang akong edad, nasag-ulo ko ang mga teksto sa Bibliya; sa nag-edad ug singko nagapamalaybalay na ako diha sa ministeryo; ug sa nag-edad ug sayis nakahatag akog mga pakigpulong sa ministeryong tunghaan. Gipanghambog ko kana, ug nagtuo ako nga mao kadto ang labing maayo. Akong nakita karon nga pagkakataw-anan nako niadto. Dunay batang lalaki sa among kongregasyon nga nagahimo sa samang mga butang, ug pagkahambogiro niya! Palihog pasidan-i ang mga ginikanan sa dili pagtugot sa ilang mga anak nga mahimong magarbohon aron kadtong nahitabo kanako dili mahitabo kanila.
F. R., Brazil
Tinuod namong gipabilhan ang importansiya nga himoon sa mga ginikanan kutob sa maarangan nga maugmad diha sa ilang mga anak ang hiyas sa pagkamapaubsanon, kamakasaranganon, ug pagkamakataronganon. (Proverbio 11:2; Miqueas 6:8; Roma 12:3; Santiago 3:17; 4:6, 10) Apan ang artikulo nag-ingon: “Ang importante mao, dili kay nakapadayeg ang imong anak sa uban kondili nga ikaw ug siya dunay mainit, mahigugmaong panahon sa pagtuon sa gipadayag sa Pulong sa Diyos.” Apan malipay kami sa pagpadako nianang puntoha dinhi. Ang pangunang gipasiugda sa artikulo mao nga ang mga bata makakat-on sa sayo nga edad ug nga angay palamboon sa Kristohanong mga ginikanan kining abilidara pinaagi sa pagsugod ug sayo sa pagtudlo kanila sa bililhong mga butang, ilabina niadtong ginakuha sa Bibliya, nga mohatag dumalayong mga kaayohan sa mga anak ug sa ilang mga ginikanan usab.—ED.
Ang Paratong Ilimnon nga Makaluwas ug mga Kinabuhi
Salamat kaayo kaninyo alang niadtong maanindot nga artikulong “Ang Paratong Ilimnon nga Makaluwas ug mga Kinabuhi!” (Septiyembre 22, 1985) Ang among pinalanggang anak nga lalaki nagkalibang ug sa pagkahapon nagsuka ug naluya na. Ang iyang mga mata nanglawom, ug ang panit sa iyang tiyan dili na malubayon. Naghunahuna na kami nga maayong dad-on na namo siya sa hospital, apan nakahinumdom ang akong bana niadtong artikuloha, ug among nakit-an kini diha sa among payl. Among gitimpla ang ilimnon sumala sa artikulo ug among gipainom sa among anak. Pagkadili-katuohan nga miarang-arang siya. Sa pagkasunod adlaw halos naayo na siya. Mapasalamaton kaayo kami alang niining impormasyona.
M. S., Brazil
Nalipay kami sa pagkasayod nga ang simpleng tambal nakatabang. Siyempre, buot namong ipasiugda nga ang gisugyot nga tambal dili kapuli alang sa gikinahanglang propesyonal nga pag-atiman sa doktor.—ED.
Daghang salamat sa inyong artikulo “Ang Paratong Ilimnon nga Makaluwas ug mga Kinabuhi!” Dili pa dugay ang among iro gioperahan sa talodtod. Pagkahuman sa operasyon, ang mga komplikasyon sa sakit nga kalibang mitungha tungod sa reaksiyon sa giresitang mga tambal sa paghupay sa sakit. Walay tambal nga gisulayan sa beterinaryo ang nakasumpo sa iyang nagkagrabeng kondisyon. Nakahinumdom ang akong bana sa gihisgotan sa ibabaw nga artikulo. Human nga nakit-an kini, gibutangan dayon namog solusyon ang iyang imnanag tubig ug nagtan-aw kaniya nga maikagong miinom niini. Sa paglabay sa tibuok gabii nawala ang iyang kalibang, ug maayo na siya karon ug nagpahiuli sa lawas. Ang inyong artikulo tinuod gayod nga makaluwas ug kinabuhi alang sa tanan, mga tawo ug mananap.
S. M., Tinipong Bansa