Gikan sa Among mga Magbabasa

Dihang Masayon ang Pagsag-ulo

Buot ko lang ipahayag kon unsa ka mapuslanon sa inyong artikulo bahin sa pagsag-ulo. (Hulyo 22, 1987 sa Ingles) Ang akong kuwatro-anyos nga anak nagauban kanako sa ministeryo sa pagpamalaybalay. Aron dili siya laayan, akong gipasag-ulo kaniya ang Salmo 83:18, nga malipay niyang ipahayag diha sa pultahan, uban sa iyang Bibliya nga bukas diha niana. Sa pila lang ka semana, akong nabasa ang inyong artikulo bahin sa pagsag-ulo ug midesider sa pagtabang kaniya sa pagkakat-on pag dugang sa kasulatan. Karong bulana iyang ginapahayag ang Juan 17:3 diha sa pultahan kon angay. Karong semanahona mibalibad ang tawo sa akong pagbasag teksto sa Bibliya kaniya, ug dihang isira na unta niya ang pultahan, ang akong kuwatro anyos nga anak nga babaye miingon: “Mahimo bang basahan ko ikaw ug teksto?” Dihadiha miingon siyag oo ug gibuksan pag-usab ang pultahan.

B. C., Tinipong Bansa

Paglaom Alang sa Masakiton sa Utok

Sulod sa 12 ka tuig biktima ako sa sakit sa utok, nag-antos ug daghang kasakit, pagkanawad-ag paglaom, ug kakulang sa pagsabot sa kabahin sa uban, bisan pa sa pag-atiman sa doktor ug atensiyon sa mahigugmaong asawa. Abi god ninyo, dili ko gustong dawaton ang kamatuoran nga may sakit ako sa utok apan ginapasangil ko ang akong sakit sa ubang mga hinungdan. Ang inyong mga artikulo “Paglaom Alang sa Masakiton sa Utok” (Pebrero 8, 1987) nakapukaw kanako sa pagbag-o. Nasabtan ko nga ang akong sakit dili gikan sa yawa, sumala sa gituohan nako, ug busa midawat sa kapiliang katin-awan ug misugot sa medikal nga pagtambal. Pagkadako sa akong pasalamat sa Pagmata! sa tabang nga nahatag niini kanako ug sa daghan pang mga butang!

A. A. C., Brazil

Pagsinabtanay sa Igsoong Lalaki ug Babaye

Buot kong pasalamatan kamo alang sa artikulong “Mga Batan-on Nangutana . . . Nganong Lisod Kaayong Magkasinabtanay Ako ug ang Akong Igsoong mga Lalaki ug Babaye?” (Hulyo 22, 1987) Ako 16 anyos ug dunay duha ka igsoong lalaki. Maglagot usahay ako nila, ug may mga panahong gipanghinaot kong may daotang mahitabo kanila. Apan, ako nasayod nga sa akong kinasuloran gimahal nako sila. Dakong paningkamot ang akong gihimo aron dili ako masuko dihang ila akong sungogon. Ang kataposang mga parapo sa artikulo bahin sa sub-ulohang “Mas Paborito Ka ni Mama!” ug “Pagbuntog sa Kasina” nakatabang kanakog dako. Akong nakita karon nga sama ako sa mga igsoon ni Jose nga nasina kaniya.

S. L., Guadeloupe

Buot kong pasalamaton kamo sa artikulong “Mga Batan-on Nangutana . . . Nganong Lisod Kaayong Magkasinabtanay Ako ug ang Akong Igsoong mga Lalaki ug Babaye?” Duna koy magulang nga igsoong lalaki nga ginaaway nako kanunay, apan miarang-arang na ang akong pakig-atubang kaniya karon. Ug kay nakabasa sa inyong artikulo, maningkamot pa gayod ako. Salamat kaninyo pag-usab.

L. M., Inglaterra

Mga Artikulo Bahin sa Papa

Ingong Katolikong mga Kristohanon, among gibasa ang inyong daghang impormasyong mga magasin nga may kaikag, ug nagpasalamat kami kaninyo sa pagpresentar ug tinuod nga impormasyon bahin sa papa. (“Mga Pag-ampo Alang sa Kalinaw—Kinsay Nagapamati?” Junyo 8, 1987; “Ang Pagduaw sa Papa sa Australia—Balaanon ba Lamang nga Pagduaw?” Julyo 8, 1987) Bisan pag ang inyong mga pagtulon-an lahi sa Katolisismo, nalipay kami sa pagtan-aw sa pagkatimbang sa inyong pag-atubang sa matang ulohan.

P. O., Federal Republic of Germany