Tam-is nga mga Kinaham Gikan sa Kakahoyan

Ang mga Indian sa Amerika del Norte mao ang unang nagpakita sa mga tawong puti kon unsaon paghimo niana—pagkuhag tam-is nga mga kinaham gikan sa kakahoyan. Gitudloan sa mga Indian ang unang Uropanhong mga molupyo sa Canada sa arte sa paggamag tam-is nga latik gikan sa duga sa kakahoyang maple. Apan sa tuig 1706 na lamang nga ang unang napamatud-ang rekord sa Canadianhong latik sa maple ug paggamag asukar nagsugod. Karon kini multimilyong-dolyar nga industriya sa Canada.

Aniay duha ka tam-is nga kinaham nga tingali buot nimong sulayan:

MAPLE FUDGE

2 tasang latik sa maple

1 tasang yano o crunchy peanut butter

1 kutsaritang vanilla

Inita ang latik sa maple sa 112° C. hangtod ang usa ka tinulo mapormang humok nga lingin sa bugnawng tubig. Sa dihang bugnawbugnaw na, idugang ang peanut butter ug vanilla. Batila kini hangtod mosugod kini sa pagtibuok, dayon idali pagbubo sa usa ka hulmahan. Kon bugnaw na, hiwaa nga mga kuwadrado.

MAPLE PUDDING

2/3 tasang bugas humay

Diyutayng nutmeg

2 itlog, binatil kadiyut

1/4 kutsaritang asin

2/3 tasang latik sa maple

1/2 tasang waylisong pasas

1 1/2 tasang gatas

Lutoa ang humay sa inasinan nga tubig hangtod mahumok; kuhai sa bug-os sa tubig. Ibutang ang mga itlog ug latik sa maple ug sagolag maayo. Idugang ug ukayon ang gatas, nutmeg, ug asin, dayon ang kan-ong humay ug pasas. Ibutang ang mga ingrediente sa minantekilyahang sudlanan ug lutoa sa kasarangan ang kainit nga hurnohan, 177° C., hangtod nga motibuok (60-70 minutos). Idulot sa 6 o 8 ka tawo.

[Hulagway sa panid 25]

Gawas nga lamian, ang latik sa maple tugob sa carbohydrates ug nagbaton sa mapuslanong minerales nga calcium, phosphorus, iron, ug potassium

[Tinubdan]

U.S. Departamento sa Agrikultura