Ang mga Steroid ug Football
NIADTONG 1987 ang NFL (Nasodnong Liga sa Football) sa Tinipong Bansa misugod sa pagtuki sa mga magdudula alang sa mga anabolic steroid, nga sintetikong gikuha sa hormone testosterone sa lalaki. Bisan pa ang mga pagtuki nagbutyag nga duolan sa 100 sa 1,600 ka magdudula sa liga naggamit sa mga droga, walay mga pagsuspender. Ang kahimtang nagpabilin nga sama ra sa 1988 nga dula—ang mga pagtuki una pa sa dula alang sa mga steroid nagyagyag sa kumon nga paggamit sa droga, apan sa gihapon walay mga pagsuspender. Apan wala madugay human misugod ang 1988 nga dula, gisugyot ang kausaban.
Ang paggamit sa mga steroid sa 1988 nga Olimpiada, uban sa gipahamtang bug-at nga mga silot, sa walay duhaduha mao ang hinungdan. Si Dr. Robert Voy, ang hepe medikal nga opisyal sa Komite sa Olimpiada sa T.B., nakamatikod sa kaylap nga paggamit sa mga steroid sa football. “Ang wala maamgohi sa kadaghanan sa mga tawo mao nga ang mga magdudula nga tiggamit ug mga steroid mahimong pintas ug mahagiton,” matod niya. “Ang ilang mga hinigugma ug mga asawa makatug-an kanimo niana.”
Dugang pa, ang mga steroid makahatag sa tiggamit kanila sa matuod nga bintaha. Usa ka bag-ong lineman sa NFL miingon: “Ako nakigdula batok sa daghang magdudula nga nahibaloan ko nga tiggamit ug mga steroid. Ako nakigdula kanila sa usa ka tuig, sunod tuig mibalik sila nga 15 ka libra nga mas bug-at, mas kusgan ug lahi ang ilang mga hitsura. Mas maayo silang modula ug kusog moigo. Kana ang usa ka butang nga nakatabang kanako sa akong desisyon. Buhaton nako ang bisan unsa aron mahimong labing maayong lineman sa N.F.L.”
Bisan pa niana, ang paggamit sa mga steroid may grabeng mga epekto, lakip ang kadaot sa atay, ug sa igong panahon sila makapatay. Busa, sugod sa 1989 nga dula sa NFL, gisugyot nga ang mga magdudula kinsa matukian nga positibo sa mga steroid sa daghan sunodsunod nga pagtuki did-an sa dayon gikan sa NFL. Ang kanhing komisyoner sa Liga nga si Pete Rozelle nagpatin-aw: “Kami nahibalo sa mga kapeligrohan sa mga steroid sa lawas ug buot namong buhaton ang tanan namong maarangan aron ang mga magdudula makapahimulos sa de kalidad nga kinabuhi human sa ilang mga karera sa football.”