Gikan sa Among Magbabasa

Salipod nga Ozone Salamat sa inyong matulon-anong artikulo. (Enero 22, 1989) Nasayod ako niining sulirana pinaagi sa nangaging mga isyu sa inyong magasin ug nakahukom nga kon posible, molikay ako sa paggamit sa mga substansiya nga mopagrabe niining sulirana, sama sa aerosols ug mga artikulong ginama sa esponghadong plastik.

G. C., Republika sa Habagatang Aprika

Angay tahoron sa mga Kristohanon karong adlawa ang komung silinganan sa katawhan. Hinuon, dili kanunay praktikal o posible gani nga molikay sa hingpit sa paggamit ug mga produktong makapolusyon. Ang bugtong layog-abot nga solusyon sa suliran sa polusyon mao ang pagdumala sa yuta pinaagi sa Gingharian sa Diyos. (Pinadayag 11:18)—ED.

Kingdom Recordings Akong gihunahuna nga angay kong ipadayag ang usa ka sayop diha sa inyong artikulo. (Enero 8, 1989) Usa sa mga musikero nga gikutlo diha niana miingon nga ang ilang binuhatan menos sa musikal nga paagi kay sa mahimo sa usa ka propesyonal symphony orchestra. Dili ako mouyon niana. Tingali dili kini propesyonal, apan sa akong paminaw kini susama niana—tinuod nga usa ka buhat sa arte.

R. L., Tinipong Bansa

Pasko Ang Pagmata! nagpatungha sa pangutana kon kaha ang Pasko Kristohanon ba. (Disyembre 8, 1988) Ang pipila, kinsa mga Kristohanon lamang sa ngalan, nagasaulog niini pinaagi sa mga bangga sa inom ug hudyaka-bahakhak, ug mouyon ako nga niining paagiha ang Pasko maoy pagano. Apan alang sa daghan, ang Pasko gisaulog pinaagi sa pagpakigbuylog sa mga higala diha sa simbahan. Sayop ba kini?

E. L. L., Brazil

Walay pagduhaduha nga daghan naningkamot sa pagsaulog sa giingong petsa sa pagkatawo ni Jesus sa hamiling paagi. Bisan pa niini, ang artikulo mihatag ug tin-awng ebidensiya nga (1) si Jesus wala gayod magsugo sa maong saulog, (2) ang pagkatawo ni Jesus nahitabo gayod sa Septiyembre/Oktubre (dili Disyembre), ug (3) daghan sa mga kostumbreng nalangkit sa Pasko tin-aw nga paganog sinugdanan. Busa ang isyung giatubang niadtong matinguhaon sa pagpahimuot sa Diyos diha sa ilang pagsimba mao, dili kon unsaon paghimo ang maong saulog, kondili kon kaha ang Pasko sa bisan unsang matang gikahimut-an ba sa Diyos.—ED.

Kapintasan Palihog ayaw idasig sa inyong mga magbabasa ang pag-instalar ug trangkang nagkinahanglag yawi nga gamiton gikan sa sulod o deadbolts. Kini lagmit makapatay enkasog may sunog sa dihang ang nagpuyo dili makaabot sa yawi ug/o walay panahon sa paggamit niana sa dili pa malumos sa kalayo o sa aso.

R. M., Buro sa Pagsusi sa Tinukod, San Francisco, California

Ang mga komento ni R. M., maylabot sa among Abril 22, 1989, nga isyu, mga panid 9 ug 10, gidawat. Mouyon kami nga ang kapeligrohang dili makagawas panahon sa sunog kadaghanan molabaw sa kapeligrohan sa mapintasong krimen. Pihong kini ang hinungdang ang mga trangka nga nagkinahanglag yawi aron makagawas sa usa ka kuwarto o tinukod gidili sa kadaghanang kalagdaan sa pagpanukod sa Tinipong Bansa. Kami sa ingon nasayop usab sa pagpakita niining matanga sa trangka sa among hulagway. Ang mga magbabasa gitambagan nga mas luwas ang pagbatog deadbolt nga trangka nga mabuksan gikan sa sulod nga dili mogamit ug yawi.—ED.

Gidagmalang mga Asawa Salamat kaninyo tungod nianang serye sa mga artikulo. (Nobyembre 22, 1988) Ingong usa ka trabahante sa usa ka dangpanan sa mga babayeng dinagmalan, gipaambit ko kining magasina sa magtatambag, kinsa karon nagagamit niining mga artikuloha diha sa iyang trabaho uban sa mga biktima. Nagustohan ko ilabina ang bahin nga “Balaod sa Diyos ug ang Kristohanong Hunahuna.” Daghan sa mga biktima mabalak-on kon unsay pag-isip sa Diyos sa ilang situwasyon. Nagpedido akog igong mga kopya niining magasina aron ikapanagtag ko sa tanang dangpanan sa panimalaynong kabangisan niining estadoha.

M. W., Ohio, Tinipong Bansa