Kanus-a ba Matapos Kining Tanan?
ANG pag-apil sa makapapreskong pisikal nga kalihokan kahimut-anan ug makapaayo sa lawas. Apan ikasubo, ang pagka entrante o bisan tumatan-aw ra sa usa ka bangga sa dula kasagarang nagkahulogan nga masuyop sa bangis kaayo, ug kadaghanan hupong-sa-droga, nga kalibotan.
Ang modernong-adlaw nga dula usa ra ka ekspresyon sa maong bangis nga kalibotan. Sa paghisgot sa mga panghitabo sa Belgium sa 1985 nga nakaingon sa kamatayon sa 39 ka tawo diha sa mga lingkoranan sa usa ka potbol nga estadyum, ang pilosopong si Emanuele Severino miingon: “Gikauyonan sa kadaghanan nga ang mga bangga nga sama sa usa didto sa Brussels nahitabo tungod sa mausbawong kakulang sa pagtuo sa mga tawo sa pila ka paninugdang prinsipyo sa atong katilingban.” Dayon siya midugang: “Ang kabangisan sa atong panahon wala maggikan sa kawalay mga prinsipyo kondili sa presensiya sa bag-ong mga prinsipyo.”
Bag-ong mga Prinsipyo sa mga Dula
Unsa ba kining bag-ong mga prinsipyo nga gihisgotan ni Propesor Severino? Ang usa mao ang sobrang paghigugma sa kaugalingon sa mga magdudula nga nagahimo sa mga kampeyon nga “mga diyosdiyos.”
Unya anaa ang nasyonalismo ug ang mosangpot politikanhong mga kalangkitan. Ang magasing L’Espresso nagaingon: “Ang dula nahimong dakong agianan alang sa pag-asenso sa katilingban. Kon mas daghan kinig kadaogan, dugang pagatagdon ang usa ka nasod.”
Ang salapi usa usab sa bag-ong mga butang gipabilhan nga nahimong bahin sa kalibotan sa dula. Ang dakong pinansiyal ug komersiyal nga intereses—mga katungod sa pagpasalida sa telebisyon, publisidad, mga loteriya, ug mga esponsor—nagapasalig sa “wayprinsipyong panag-indig,” bisan taliwala sa mga magdudula mismo. Ang usa ka kanhing magdudulag sakir miingon nga ang sakir “dili na usa ka dula. Kini negosyo na lamang.”
Ang kaylap nga prinsipyo mao ang pagdaog bisan unsay mahitabo, ug sumala sa bag-ong mga prinsipyo karong adlawa, kini nagkahulogan sa tanang butang—gikan sa kabangisan diha sa nataran ug sa mga lingkoranan sa estadyum ngadto sa kabangisan nga ipahinabo sa mga magdadayeg una ug tapos sa dula, gikan sa doping ug sa makapatayng mga epekto niini ngadto sa kawalay-kaangayan ug pagkawalay-prinsipyo. Ang espiritu sa dula, nga gitawag nga makiangayong dula, daw butang na sa kagahapon. Mahibalik ba kini? Sa paghukom sumala sa giingon, ang mga tawo nagalaom niana, apan ang tinuod nga mga panghitabo dili gayod makapadasig.
Mga Droga ug Kabangisan—Matapos ba Gayod Kini?
Sumala sa giangkon ni Propesor Severino, ang kabangisan diha sa mga dula usa ra ka bahin sa labi pang malangkobong kabangisan nga nagasakit sa katilingban karon. Unsa ang hinungdan sa labihang kapintasan? Ang usa ka tagna sa Bibliya motabang nato sa pagsabot sa suliran. Sa paghisgot sa kataposang mga adlaw niining daotang sistema sa mga butang, gilista ni apostol Pablo ang mosunod nga mga kinaiya: ‘Ang mga tawo mahimong mahigugmaon sa ilang kaugalingon, mga mahigugmaon sa salapi, dili maunongon, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig-ulo, mapaburoton tungod sa garbo, mga mahigugmaon sa mga kalingawan.’ Ug siya midugang: “Ang mga tawong daotan ug mga impostor mosamot sa pagkadaotan.”—2 Timoteo 3:1-5, 13.
Kining kalibotan karon, nagasaysay ang Bibliya, “nahiluna sa gahom sa usang daotan.” (1 Juan 5:19) Si Satanas nga Yawa mao “ang usang daotan” nga nagadaot sa maayong mga butang, sama sa makapaayong mga dula. Siya mao ang nakaingon sa mabangisong espiritu. Siya usab ang nagasiba sa nasyonalismo, kahakog, ug kadalo nga nagdaot sa katilingban ug sa mga dula.
Apan ingong mga indibiduwal, dili kinahanglang mopadaog kita sa maong demonyohanong espiritu. Kita, pinaagi sa pagpadapat sa mga prinsipyo sa Bibliya, “makahukas” sa atong daang pagkatawo uban sa daotang mga bisyo, apil ang mabangisong mga kagawian, ug isul-ob “ang bag-ong pagkatawo,” nga nagapatungha sa madaitong mga bunga.—Colosas 3:9, 10; Galacia 5:22, 23.
Ugaling, may kataposan kaha ang kabangisan ug ang doping sa mga dula? Tinong aduna! Kanus-a? Sa dihang ang kabangisan ug pag-abusar sa droga diha sa katilingban matapos. Ang pag-uswag karon sa pagkadaotan nagapaila nga duol na ang maong panahon!—Salmo 92:7.