Gikan sa Among mga Magbabasa

Repormang Katoliko Nagtuo ako nga inyong artikulo sa relihiyosong kasaysayan (Agosto 22, 1989) maoy sa katibuk-an maayong pagkasulat. Apan, maoy akong pagtuo nga kamo nakahimog dakong sayop sa inyong pagpahigawas kang Martin Luther gikan sa “Katolikong batok-​Semitismo.” Si Martin Luther nakahimog dulumtanong pahayag batok sa mga Hudiyo, nagtawag kanilang “mahilayon ug daotang mga tawo” ug gani “mga yawa.”

E. W., Tinipong Bansa

Ang artikulo nagpunting sa salawayong mga batasan sa Katolikong Simbahan, dili sa mga kasaypanan sa Protestanteng mga repormador. Si Luther sa sinugdan supak sa anti-​Semitismo o batok Hudiyo. Apan, ang Aleman nga librong “Die Juden und Martin Luther​—Martin Luther und die Juden,” (The Jews and Martin Luther—​Martin Luther and the Jews), ni Heinz Kremers, nagbatbat: “Sa sinugdan si Martin Luther maoy mahigalaon sa mga Hudiyo, sanglit siya naglaom nga sila makombertir sa Kristiyanidad sa dihang ang putling ebanghelyo igamantala ngadto kanila. Sa dihang kini nga paglaom napakyas, siya nahimong bangis nga kaaway sa mga Hudiyo.”​—ED.

Satanismo Nakurat ako sa hapin sa isyu sa Oktubre 22, 1989! Akong nakaplagan kanunay nga ang mga magasin makapadasig kaayo. Apan kining isyuha nakapakurat ug nakalibog kanako. Dili ba daotan nga magbaton ug Satanasnong mga simbolo diha sa balay sa bisan unsang porma?

P. W., Tinipong Bansa

Ang ulohang Satanismo sa pagkatinuod makapalisang gayod. Bisan pa, kami mibating obligado sa pagpasidaan sa mga magbabasa sa ‘mga lipat-lipat ni Satanas,’ ug usahay kini naglakip sa pagpresentar ug mga ulohang hayan nakita sa pipila nga makadaot. (2 Corinto 2:11) Apan, ang teksto ni ang mga ilustrasyon—apil ang paghulagway sa Satanasnong mga simbolo— wala gipresentar sa paaging nagpasiugda sa Satanismo o nagpukaw sa pagkamaukiton niini. Hinunoa, kini nagtabang sa mga magbabasa, apil ang mga batan-on, nga dumilian ug likayan ang Satanasnong mga kalihokan.​—ED.

Nagbasa ako nga nalisang ug kahibulong sa inyong paghisgot sa ulohan bahin sa Satanismo, ug akong gipabilhan ang inyong pagkuha niining grabe nga sala sa pagtagad sa inyong mga magbabasa. Wala akoy nakitang ebidensiya sa Satanismo sa akong dapit, apan ako, bisan pa, magbantay sa posibleng pagtungha niana.

M. V. H., M.D., Tinipong Bansa

Kuto sa Ulo Ingong nars sa tunghaan, ang paghisgot sa ulohan bahin sa kuto sa ulo sa regular nga paagi, ako uyon sa halos tanan sa inyong artikulo. (Agosto 22, 1989) Ikasubo, inyong gisugyot ang pag-upaw sa ulo ingong usa ka epektibong paagi sa pag-atiman sa bata. Akong nakita nga dramatiko ra ug dili kinahanglang upawan ang ulo sa bata aron sa pagwala sa kuto. Ako usab dili morekomendar sa paggamit ug gas diha sa bagolbagol. Kini makahilo ug masunog, ug sa tinuod nga ang ginatos ka kaso sa kuto sa ulo mas maayo pa kay sa usa ka nasunog nga bata.

C. M., Inglaterra

Among gipabilhan kining mga komentoha. Ang “Pagmata!” wala magrekomendar sa medikal nga mga pagtambal. Apan sanglit kay ang among basahon giapod-apod man sa tibuok-yuta ug ginabasa sa mga tawo nga tingali walay mabatonang modernong pagtambal, kami yanong nagtaho sa pagpanambal sa balay nga giangkon sa pipila nga miobra sa pagtambal sa kutoon. Ang modernong medikal nga mga awtoridad, hinunoa, dili morekomendar sa pag-upaw sa gikutong buhok, naglantaw niini ingong makadaot sa hunahuna ug wala kinahanglana. Ang pagputol sa buhok girekomendar lamang sa dihang ang buhok taas na kaayo o nga gubot ang buhok diin malisod ang pagsudlay. Dugang pa, ang medikal nga mga awtoridad karon dili morekomendar nga ang gas gamiton diha sa bagolbagol. Pananglitan, si Propesor David Taplin sa University of Miami School of Medicine nag-ingon sa “Pagmata!” nga iyang gilantaw kini nga paagi nga kinaraan.​—ED.