Aduna bay Atua Didto?

ADUNAY usa ka tawo sa Massachusetts, U.S.A., si kinsa ingong bahin sa iyang trabaho kada adlaw, nagasusi sa pagtan-aw kon may mga mensahe bang miabot. Sa sunodsunod nga adlaw, walay miabot. Sa daghan nang katuigan karon, walay miabot. Apan siya regular gihapong nagasusi, ug siya regular nga nahiubos. Dili ba siya popular? Naguba ba ang iyang makinang nagatubag.

Wala bisan hain niana. Siya nagasusi sa usa ka makina, apan siya dili konektado sa linya sa telepono. Kini usa ka kompiyutir nga konektado sa usa ka dako kaayong elektronikong dalunggan nga gitunong sa itaas, halayo sa atong kalibotan, ngadto sa halayong kawanangan; usa ka radyo teleskopyo. Kining tawhana nagaabag sa usa ka pundok sa mga siyentipiko sa pag-aninaw sa mga bituon alang sa mensahe gikan sa intelihenteng mga dili-yutan-on o extraterrestrials, mga linalang gikan sa gawas sa atong kalibotan.

Ang uban, sama kaniya, namati usab sulod sa 30 ka tuig na karon. Niadtong 1960 ang astronomong si Frank Drake nahimong unang tawo nga namati alang sa mga timailhan sa intelihenteng mga dili-yutan-on pinaagig radyo teleskopyo. Sukad niadto, ang tawo, sa pagkamatuod, nagdaitol sa iyang mga igdulongog sa wanang. Mga 50 ka lainlaing tagdugayng mga pakisusi sa langit ang nahimo na sa pagkakaron.

Ang mga radyo teleskopyo sa tibuok nga kalibotan miduyog sa pagpangita​—sa Pransiya, Pederal Republika sa Alemanya, Netherlands, Australia, Unyon Sobyet, Argentina, Tinipong Bansa, ug Canada. Sumala sa giingon sa usa ka tawo: “Ang SETI [Iningles nga pinamubong ngalan alang sa Search for Extraterrestrial Intelligence sa katawhan] nagakahimong internasyonal sama sa wanang mismo.” Ang usa ka tigom bahin sa ulohan nakadanig mga 150 ka siyentipiko gikan sa 18 ka nasod nga nakatag sa tanang kontinente.

Ang labing ambisyosong proyekto sa SETI, hinunoa, igalansad pa sa 1992. Ang NASA, ang National Aeronautics and Space Administration of the United States, nagaplano sa paggamit sa gamhanang bag-ong himan nga mopaposible sa pagsiksik sa minilyong radyo frequencies sa samang panahon. Ang pagpangita giplano nga molungtad ug napulo ka tuig sa gastos nga $90 milyon. Kini mahimong napulo ka libong milyong beses nga mas bug-os kay sa tanang nangaging pagpangita nga tingbon.

Apan sa dihang ang tawo mangutana sa dako kaayong uniberso, “Aduna bay atua didto?” gikinahanglan niya ang labaw pa sa abanteg-teknolohiya nga kasangkapan sa pagkaplag sa tubag. Sa daghang paagi kini usa ka espirituwal nga pangutana. Sa pagpangitag tubag, ang tawo nagapadayag sa pipila sa iyang labing gimahal nga mga paglaom: ang kataposan sa gubat, ang kataposan sa sakit, tingali ang pagkab-ot pa sa imortalidad mismo. Busa dagko ang nalangkit. Apan tapos sa kasiglohan sa pagkahibulong ug sa tinagpulong katuigan sa pagpangita, unsa ka duol ang tawo sa usa ka tubag?