Mga Dili-Yutan-on—Pagkaplag sa Tubag

NIADTONG Pebrero 17, 1600, usa ka tawong ginganlang Giordano Bruno gisunog nga buhi sa usa ka plasa sa Roma, Italya. Ngano man? Ang iyang mga sinulat nakapasuko sa simbahan. Apil sa ubang mga butang, nanudlo siya nga may daghang gipuy-ang kalibotan sa uniberso. Niadtong ika-11ng siglo, ang simbahan nagpahayag sa maong doktrina, ang pagkadaghag kalibotan, nga bakak nga pagtulon-an. Ang pagtudlo niana mao ang pagkamamatay. Si Bruno namatay.

Hangtod sa ika-19ng siglo, ang lantugi bahin sa kon kaha may kinabuhi sa ubang mga kalibotan nagpadayon diha sa natad sa relihiyon. Sa daghang siglo, ang relihiyosong mga pangulo ug mga siyentipiko nga ilalom sa ilang impluwensiya mipugos nga ang yuta mao ang sentro sa uniberso; nga ang uniberso gilalang sa 4004 W.K.P.; ug uban pa.

Nan, dili katingad-ang daghang siyentipiko ug uban pa diyutayg pagtahod sa relihiyon. Sa lakaw niana, hinunoa, daghan ang nawad-an usab sa ilang pagtahod sa Bibliya, kay naghunahuna nga kana ang tinubdan nianang tanang sayop nga mga pagtuo. Kana halayo kaayo sa kamatuoran.

Ang Bibliya wala mangangkon nga usa ka teksbok sa siyensiya. Bisan pa niana, kini dili ingong sayop kon nagahisgot kini bahin sa uniberso o sa bisan unsang siyentipikanhong butang. Pananglitan, ang Bibliya wala gayod mag-ingon nga ang yuta ug ang tawo mao ang sentro sa uniberso. Sa kasukwahi, ang inspiradong mga manunulat niini nagpakitag tin-awng pagsabot bahin sa pagkagamay sa tawo kon itandi sa luag kaayong uniberso.​—Salmo 8:3, 4.a

Busa, sumala sa Bibliya, aduna bay atua didto?

Ang Bibliya Nagatubag

Sumala sa Bibliya, ang kinabuhi sa gawas sa yuta dili lamang nagalungtad apan daghan kaayo sila. Kini mas makutihon, mas makaiikag, ug mas katuohan kay sa bisan unsa nga gimugna sa mga ebolusyonista, mga manunulat sa piksiyon sa siyensiya, ug mga tiggamag pelikula. Kon buot sabton, ang usa nga dili-yutan-on mao lamay usa ka linalang nga nagagikan sa gawas niining yutaa ug sa atmospera niini.

Ang mga siyentipiko nangahibulong kon kaha adunay mga dagway-sa-kinabuhi o life-forms nga dili nato matiktikan. Ang Bibliya nagapasalig kanato nga ang maong mga linalang nagalungtad gayod. Apan sila dili mga produkto sa ebolusyon. Sama sa tanang kinabuhi sa uniberso, sa bisan unsang dagway, sila naggikan sa Tuboran sa kinabuhi, si Jehova nga Diyos. Siya maoy usa ka Espiritu, ug siya nakalalang ug mga napulo ka libo ka napulo ka libong laing espiritu sa lainlaing mga matang: mga anghel, mga kerubin, ug mga serapin. Sila nagahimog lainlaing trabaho ug mga obra diha sa iyang makutihong langitnong organisasyon.​—Salmo 104:4; Hebreohanon 12:22; Pinadayag 19:14.

Komosta ang Kinabuhi Diha sa Ubang mga Planeta?

Ang pila ka impluwensiyal relihiyosong tawo nagpugos nga ang Diyos dili maglalang ug kalibotan nga walay katuyoan ug ang tanang mapuy-ang kalibotan sa ingon may nagpuyo. Kana ba ang ginaingon sa Bibliya? Dili. Ang Bibliya nagapaila nga dili gayod posible nga niining gutloa ang Diyos naglalang ug intelihenteng pisikal nga mga linalang diha sa ubang mga planeta gawas sa atong kaugalingong planeta. Sa unsang paagi matuod kana?

Kon ang Diyos naglalang sa maong mga linalang, kana iyang gihimo unta una niya lalanga si Adan ug si Eva. Ang maong mga linalang nagpabilin kahang matinumanon ngadto sa ilang Maglalalang, o sama kang Adan ug Eva, sila nakasala ug nahulog ngadto sa pagkadili-hingpit

Apan kon sila nahimong dili hingpit, gikinahanglan nila ang usa ka manunubos. Sumala sa giingon sa usa ka manunulat: “Ang usa nagbaton niining makalilisang nga hunahuna nga sa ma-Biyernes [ang adlaw nga gipatay si Jesu-Kristo], sa matag Biyernes, sa usa ka dapit sa uniberso si Jesus ginabitay tungod sa mga sala sa laing tawo.” Apan kana dili Kasulatanhon. Ang Bibliya nagaingon kanato nga si Jesus “namatay maylabot sa sala sa makausa sa tanang panahon.”​—Roma 6:10.

Komosta man kon ang maong mga linalang nagpabiling hingpit? Aw, sa nakasala si Adan ug si Eva, sila, sa pagkamatuod, naglalis sa katungod sa Diyos sa pagmando sa usa ka kalibotan sa intelihente pisikal nga mga linalang. Kon naglungtad pa ang laing planeta niadtong panahona, usa ka kalibotan nga punog intelihente pisikal nga mga linalang nga nagpuyong may harmoniya ug maunongon ilalom sa pagmando sa Diyos, dili ba unta sila tawgong mga saksi sa pagpamatuod nga ang pagmando sa Diyos tinuod nga molampos? Ang maong konklusyon daw dili kalikayan, sanglit gigamit na niya bisan ang dili-hingpit nga mga tawo ingong mga saksi alang kaniya sa mao mismong isyu.​—Isaias 43:10.

Nan, nagkahulogan ba kana nga gilalang sa Diyos kanang tanang dimaihap nga milyonmilyong adlaw (ug mga planeta kon sila nagalungtad) sa wala lamay katuyoan? Dili gayod. Bisag kita nasayod, sa pagtagad sa pagkalinain ni Jesu-Kristo, nga ang yuta mao lamang ang bugtong gipuy-ang planeta sa uniberso sa pagkakaron, ug bisag kita nasayod, usab, nga kini sa walay kataposan mopabiling linain ingong ang planeta diin ang Maglalalang nagbayaw sa pagkamatarong sa iyang pagmando, kon unsay umaabot kita wala masayod.

Kita Wala Mag-inusara

Sa adlaw-adlaw, sa tuig-tuig, ang SETI nga mga astronomo nagapadayon sa pagsiksik sa kalangitan alang sa mga signal gikan sa intelihenteng kinabuhi. Gibati nila nga ang ilang pagpangita tingali mokabat sa laing napulo ka tuig, o basin mokabat sa usa ka siglo. Pagkakataw-anan! Sila nagagugol sa ilang mga kinabuhi, ilang mga paglaom, ug daghan kaayong salapi nga nangitag signal nga nadawat na sa katawhan mga siglo kanhi. Kay ang Bibliya mismo maoy usa ka mensahe gikan sa usa ka Intelihensiya gikan sa gawas sa yuta, ug kini labaw sa tanang paagi kay sa mga signal nga gihanduraw bisan sa labing malaomong mga siyentipiko.​—Tan-awa ang kahon sa panid 10.

Unsay sanong sa katawhan ngadto sa bugtong tinuod nga mensahe nga gikan sa gawas sa yuta? Unsay pagsanong sa mga tawo, sa katibuk-an, ngadto sa Bibliya? Wala sila magtagad niini. Tinuyo silang nagapadapat nga sayop niini sa ilang kaugalingong mga katuyoan. Giinsulto nila ang Nagpadala niini pinaagi sa makalilisang nga han-ay sa way-pasikaranan ug matuotuohong mga pagtulon-an. Gitawag gani nila kining usa ka limbong ug wala tuohi ang paglungtad mismo sa Nagpadala niini. Dili na mistil isulti pa, ang atong Maglalalang wala gayod mahimuot sa sanong sa katawhan. Bisan pa niana, siya nagapadayon sa pagkomunikar. Pinaagi sa iyang Pulong, siya nagaedukar sa milyonmilyong tawo karong adlawa diha sa mga dalan sa pakigdait. Ang maong katawhan nagahawas kang Jehova ug nagadala sa iyang komunikasyon ngadto sa kalibotan. Apan diyutay ra kaayong tawo ang nagapamati kanila. Ang kalibotan sa katibuk-an nagpakabungol.​—Isaias 2:2-4; Mateo 24:14.

Ikalipay, hinuon, ang matag usa kanato makakomunikar uban sa labing dakong Persona sa uniberso, ug kini dili pinaagig gastoso kaayong teknolohiya, nga dili magpaabot sa daghang panahon aron ang mga mensahe molatas sa kawanangan. Ikaw makapamati karon pinaagi sa pagtuon sa imong Bibliya ug pagpamatuod sa imong kaugalingon kon kaha kini nagagikan ba gayod sa labaw-tawhanong Tuboran. Makatubag ka pinaagi sa pag-ampo ug sa paagi sa imong pagkinabuhi. Kita wala mag-inusara. Ang atong Maglalalang nagsaad nga “siya dili halayo gikan sa matag usa kanato.”​—Buhat 17:27; tan-awa usab ang 1 Cronicas 28:9.

Siya wala magtapos sa pagpakigkomunikar sa katawhan. Siya nagsaad nga usbon gayod ang dagan sa kasaysayan sa kalibotan, sa pagpugong sa kusog nga pagpadulong sa katawhan sa kalaglagan-sa-kaugalingon pinaagi sa bug-os nga pagguba niining dili-mosaler nga sistema sa mga butang ug pagpuli niini sa usa ka kagamhanan nga iyang binuhat, usa ka kagamhanan nga moobra gayod sa kaayohan sa tanan. (Daniel 2:44; Isaias 9:6, 7) Oo, ang sunod nga komunikasyon gikan sa labing dakong Intelihensiya sa gawas sa yuta umaabot sa dagway nga lihok, dili mga pulong.​—2 Tesalonica 1:6-9.

[Footnote]

[Kahon sa panid 10]

Ang mga Mensahe nga Ang Mensahe nga

Gilaoman sa mga Siyentipiko Wala Nila Tagda

sa Ilang Pagpangitag ​—Ang Pulong sa Diyos,

Intelihensiya sa Gawas sa Yuta: ang Bibliya:

[Hulagway sa panid 11]

Kita makakomunikar sa labing dakong Persona sa uniberso