Ang Hunahuna sa Bibliya

Mga UFO—Mga Mensahero Gikan sa Diyos?

SAMTANG naghinapos ang ika-20ng siglo ug ang mga kahimtang sa yuta padayong nagakadaot, ang pagtuo sa mga unidentified flying object (UFO) ug ilang mga pasahero, mga linalang nga dili-yutan-on, nagpadayon sa pagkaylap. Ang mga UFO ba maoy bunga lamang sa handurawan, usa ka panglimbong, usa ka panglansis sa mga tawo nga buot mokatawa sa pagkamatuotuohon sa publiko?

Kadtong nag-angkon nga nakakita ug mga UFO o sa ilang dili-yutan-ong mga pasahero naglakip sa daw normal, kasaligang mga tawo; sa pagkatinuod, kadtong nagtuo niining maong mga bisita gikan sa laing mga planeta naglakip sa edukadong mga propesor ug mga siyentipiko. Sila nakombinsir nga ang mga dili-yutan-on nagapaniid sa katawhan ug, usahay, makigkomunikar kanila. Ang gitawag nga dili-yutan-ong mga support group anaa aron tabangan ang mga tawo nga nag-angkon nga nakigkontak sa mga bisita gikan sa kawanangan.a

Plano sa mga Dili-Yutan-on sa Pagluwas ug Kinabuhi

Sa Aliens Among Us, si Ruth Montgomery miinterbiyo sa pipila sa nagatubong gidaghanon sa katawhan nga kombinsidong sila maoy mga bisita gikan sa kawanangan nga nanagpuyo sa tawhanong mga lawas. Ang pipila niini kinsa nag-angkon nga nagpakatawong mga dili-yutan-on nagtagna nga sa tuig 2000, adunay “usa ka kosmikong hitabo nga gipangandaman sa mga herarkiya sa mga manulonda ug sa mga magmamando.” Ang pipila ka tawo nagtuo nga ang mga dili-yutan-on naggamit sa mga UFO sa pagkolekta ug pagtipig ug mga espesimen sa tanom ug hayop o nga ang mga UFO gamiton ingong tigluwas nga mga salakwanang aron ipahilayo ang minilyong tawo gikan sa nagasingabot nga kalaglagan sa yuta. Human sa dakong kalaglagan, ang mga tawo ibalik sa yuta aron sa pagsugod sa “Bag-ong Panahon ug Bag-ong Kahikayan” sa espirituwal nga kaamgohan. Ang usa ka batan-ong lalaki gikan sa Colorado, T.B.A., nga membro sa usa ka grupo nga nagtawag sa ilang kaugalingon nga “Mga Batan-ong Taga-Wanang,” namulong sa Pagmata! sa tumang kaugdang: “Ang akong mga higala ug ako nanaghulat sa among dili-yutan-ong mga katigulangan nga mopasakay kanamo sa tigluwas nga mga salakwanang.”

Pipila niadtong nagpatuo nga sila maoy mga dili-yutan-on nag-angkon nga sila gitultolan sa Diyos, ug ang uban nag-angkon nga gawasnon silang nakigsulti kaniya alang sa tambag sa pagtabang sa katawhan. Ang Diyos ba nagagamit sa mga bisita gikan sa ubang mga planeta sa pagluwas sa katawhan gikan sa nagasingabot nga katalagman sa kalibotan?

Pakigkomunikar sa Diyos Uban sa Katawhan

Sayo sa kasaysayan sa tawo, ang Diyos nakigkomunikar sa katawhan. Ang rekord sa Bibliya nagbatbat sa mga pakigsulti sa Diyos uban kang Adan ug Eva, Noe, Abraham, ug uban pa.b (Genesis 3:8-10; 6:13; 15:1) Ang mga damgo, mga tingog, ug mga panan-awon gigamit sa pagkomunikar sa kabubut-on sa Diyos ug sa pagsulat sa Bibliya. Bisan pa niana, human makompleto ang Bibliya, may panginahanglan pa ba sa direktang langitnong pakigkomunikar uban sa katawhan? Wala, sanglit ang Bibliya nag-ingon nga ang Balaang Kasulatan maghimo ‘sa tawo sa Diyos . . . nga bug-os makasarang, kompleto nga masinangkapan alang sa tanang maayong buhat.’ (2 Timoteo 3:17) Sumala sa Bibliya, ang giya alang niining malisod nga kapanahonan maggikan sa sinulat nga Pulong sa Diyos. Bisan pa niana, may katarongan ba nga motuo nga kita makadawat ug komunikasyon o linaing mga instruksiyon nga direkta gikan sa Diyos pinaagi sa usa ka dili-yutan-ong tigpamaba? Wala, kay si apostol Pablo nag-ingon: “Bisan pa kon kami o usa man ka anghel gikan sa langit maoy magpahayag kaninyo ug butang ingon nga maayong balita nga nahisaylo sa kon unsay among gipahayag kaninyo ingong maayong balita, ipahimo siyang tinunglo.”​—Galacia 1:8.

Bisan tuod ang mga pangangkon bahin sa gituohang mga linalang gikan sa wanang daw mouyon sa mga tagna sa Bibliya nga ang yuta sa dili madugay mahiagom sa dagkong makatalagmanong mga kausaban, sila nagtanyag ug usa ka paagi sa kaluwasan nga nagasalig sa mga linalang. Ang Bibliya wala mag-awhag sa mga tawo sa pagkalagiw ngadto sa gituohang kasegurohan sa langyawng salakwanang o sa bisan unsang dapit. Hinunoa, kini nag-awhag kanato nga mangitag panalipod diha sa usa ka dedikadong relasyon uban sa Diyos, nga ang maong pahinungod simbolohan sa bawtismo sa tubig. (1 Pedro 3:21; itandi ang Salmo 91:7; Mateo 28:19, 20; Juan 17:3.) Ug si Jesus miingon nga “siya nga nakalahutay hangtod sa kataposan mao ang maluwas.”​—Mateo 24:13.

Dili ba kining maong mga kasulatan nagpasiugda sa espirituwal nga relasyon uban sa Diyos aron maluwas inay sa usa ka pisikal nga dapit sa kaluwasan? Busa, inay abagan ang katawhan nga maluwas, ang mga sugilanon mahitungod sa ‘dili-tawhanong mga linalang’ nagpaliso sa pagtagad sa mga tawo gikan sa aktuwal nga gibaod sa Diyos alang sa ilang walay-kataposang kaayohan.

Kinsa kaha ang naningkamot sa pagpalayo sa katawhan gikan sa iya sa Diyos nga paagi sa kaluwasan, apan nangangkon nga nagahawas sa Diyos? Si Ed Conroy, sa iyang librong Report on Communion, nag-ingon nga ang “seryosong mga ufologist [kadtong nagtuon sa mga UFO] nga gibansay sa sikolohikal ug sosyal nga mga siyensiya” naglakip diha sa ilang panukiduki sa matandiong mga pagtuon bahin sa “‘mga bisita sa lawak-katulganan,’ mga multo, sabaan nga mga abat, mga aparisyon, relihiyosong mga panan-awon, ug kadtong giisip nga mga demonyo.” Daghang ufologist ug kadtong nag-angkon nga mga dili-yutan-on nga nagpakatawo nag-ingon nga ang paggamit ug mga salakwanang aron sa pagbiyahe kasagaran kaayong dili kinahanglanon. Sila nag-ingon nga kining maong mga linalang mahimong mopanaw nga dili-makita ug mopakita bisan asa sa yuta nga dili moabot sakay sa salakwanang.

Ang Bibliya nagpasidaan nga maoy tumong ni Satanas ug sa iyang mga demonyo ang pagpahisalaag sa katawhan. Ilang gipahimuslan ang kaguol ug kawalay-paglaom sa tawo sa pagtanyag ug madanihon, apan bakak, nga mga solusyon. (2 Corinto 11:14) Busa, ang Bibliya nagpasidaan: “Sa ulahing mga yugto sa panahon adunay pipila nga mahulog gikan sa pagtuo, nga managtagad sa nagapahisalaag nga inspiradong mga pamulong ug mga pagtulon-an sa mga demonyo.”​—1 Timoteo 4:1.

Sa samang paagi karong adlawa, ang bisan unsang gituohang mga pagduaw ug daw makaayo nga giya gikan sa maong mga linalang kinahanglang isalikway, bisan unsang matanga kana. Kadtong buot mosunod sa tambag sa “mga dili-yutan-on” inay sa Pulong sa Diyos tinong malimbongan​—usa ka dakong sayop nga himoon niining malisod nga kapanahonan.

[Mga footnote]