Mga UFO—Mailhan ba Sila?

Giunsa pagpatin-aw sa mga siyentipiko ang mga UFO? Si anhing Dr. Donald H. Menzel, usa ka astronomo sa Harvard, ug si Philip Klass, kanhi senyor nga editor sa Aviation Week, naapil sa mga nagtuon sa ulohan kabahin sa mga pagkakitag UFO. Sila mipamatuod nga ang mga UFO sa pagkamatuod maoy mga IFO (identified flying objects). Sa giimbestigar, ang mga UFO misangpot nga mga butang o mga epekto nga mailhan, sama sa mga balon sa panahon, mga ayroplano sa anunsiyo sa magabii ug mga helikopter, mga bulalakaw, o sun dogs.a

Gibatbat ni Philip Klass ang mga UFO ingong mga katingalahan sa kinaiyahan o sayop nga mga pag-ila. Ingong pananglitan, sumala pa niya, ang pila ka UFO gikatahapan nga usa ka matang sa bola sa kilat, o usa ka plasma. Bisan pa niana, ang iyang mga kritiko mipahayag dayon nga ang mga plasma, o highly ionized gases, mahimong may mugbo kaayong kalungtaran ug dili igong makapatin-aw sa gumonhap. Siya miingon nga ang pila ka UFO nga nakit-an sa radar maoy mga mugna sa talagsaong mga hitabo sa panahon. Bisan pa niana, sumala sa pila ka operetor sa radar, kining katin-awana dili makasaysay sa daw intelihenteng kalihokan nga mapanid-an usahay. Ang pagtuo ni Klass mao nga ang mga tawong kalit maladlad sa hinanali wala-damhang panghitabo “mahimong masayop pag-ayo sa pagsingkamot sa pagbatbat sa tukma sa ilang nakit-an.”

Sa iyang librong Pseudoscience and the Paranormal, si Terence Hines miingon nga “ang mainampingong imbestigasyon misangpot sa deretso kinaiyanhong mga katin-awan alang sa daw dalayegon kaayong paminawon nga mga taho sa UFO. . . . Kining tanan nga kaso nagatin-aw sa halos bug-os nga pagkadili-katuohan sa mga taho sa nakasaksi. Sa halos tanang kaso, ang mga taho sa mga saksi lahi kaayo sa aktuwal nga butang nakapukaw, apan sa diyutay ra gayong kaso nga tinuyong nagbakak ang mga saksi. Ang ilang kahibalo sa kon unsay ‘angay’ nga dagway sa mga UFO nag-impluwensiya sa ilang mga taho, uban sa mga epekto sa mga gihanduraw nga nakita.”

Mga UFO​—Giniyahan sa mga Linalang nga Gikan sa Kawanangan?

Ang usa ka popular nga teoriya mao nga ang mga UFO basin nalangkit sa intelihenteng mga linalang gikan sa wanang. Si anhing Dr. James McCampbell maoy usa nga nanguna sa mga nakadangat nianang konklusyona. Siya mipasidaan: “Mopatim-aw nga ang labihan ka intelihente langyawng espisye nagakahimong suod pang bahin sa silinganan sa atong yuta.” Si Major Donald E. Keyhoe, “usa ka retiradong opisyal sa Marine Corps nga nahimong nagkinaugalingong magsusulat . . . unang nagpabantog sa mga UFO ug miangkon nga sila dili taga-yuta nga salakwanang,” sumala kang Philip Klass, magsusulat sa UFOs​—The Public Deceived. Si Keyhoe miduso usab sa teoriyang “mga linalang gikan sa kawanangan” ug mipasidaan: “Kon ang katuyoan sa mga langyaw mao man ugaling ang paglalin nganhi sa Yuta, kana makapasugod sa mosulbong nga kahadlok ug kalisang.”

Ang laing ideya nga nakabihag sa interes sa pila ka imbestigador mao nga ang mga UFO maoy superyor nga mga linalang nga nagpuyo sa “kaubay nga uniberso.” Sumala niining teoriyaha, ang maong mga linalang tingali “makaarang sa pagmaneobra sa elektrikal nga mga sirkito sa kaisipan sa tawo.” Pinaagi sa maong katakos, sila gituohan nga makakontrolar sa tawhanong mga gobyerno. Nag-ingon ang pipila nga basin konektado sila sa “mga intelihensiya [nga naglangkit] sa pangunang mga kalihokang relihiyoso sa kalibotan, mga milagro, mga anghel, mga multo, mga engkantada, mga tiaw, ug ang susama.”​—UFO and The Limits of Science, ni Ronald D. Story.

Mga UFO​—Mailhan ba Nato Sila?

Sumala sa amo nang napahayag, ang pila ka imbestigador positibo kaayo nga mailhan nila ang tanang UFO ingon nga kinaiyanhong mga butang o nasayran talagsaong mga hitabo. Ang uban, hinunoa, nagpadayag sa ilang espesyal nga mga teoriya mismo.

Maoy samtang gikabalak-an pa sa publiko ang Condon Report ug ang ulohan sa mga UFO nga gihatag sa Pagmata! ang subling-paghisgot sa ulohan uban ang paghisgot sa pila sa mas katingad-anang mga kaso.b Nakab-ot sa Pagmata! ang konklusyon nga “ang kadaghanan sa tanang taho sa [UFO] naggikan sa samang mga matang sa mga butang nga ginganlan sa Project Blue Book [sayosayong pagtuon sa gobyerno]: Mga planeta, mga ayroplano, mga balon, mga bulalakaw, mga handuraw.”

Ang artikulo nagpadayon: “Ang mas bug-os nga imbestigasyon [nga gisuma sa Condon Report] nagtin-aw sa bahin nga gidula sa mga pagkadaot sa lawas ug sa hunahuna. Kini nagpatin-aw nga ang ordinaryong mga butang, nga hikit-an diha sa langit sa mga tawo nga dili makaila kanila ubos sa tingali talagsaong mga kahimtang, masaypan sa pag-ila, malabwan sa pag-estorya, masobrahan sa dugang diha sa mga mantalaan, ug mosangpot nga mga salakwanang nga naglusad sa gagmay berdeng mga tawo gikan sa Mars.”

Ang opisyal nga Condon Report ug ang mga konklusyon sama sa itaas, inubanan sa nagkamenos nga mga taho bahin sa UFO, daw nagtapos sa ulohan alang sa daghan. Bisan pa niana, kawhaan ka tuig sa ulahi atong madiskobrehang ang mga UFO nakadani gihapon sa pagtagad sa publiko. Sumala sa gihisgotan sa among unang artikulo, ang usa ka magsusulat sa usa ka iladong magasin miingon nga nahadugang ang usa ka bag-ong elemento. Kita nagkinabuhi nga naa sa luyo ang “dulot ug apokaliptikanhong mga kahadlok” samtang nagsingabot kita sa tuig 2000.

Ang dugang pang kawalay-piho naugmad gikan sa mga pangangkon sa bag-o pa nga sa nangagi ang Tinipong Bansa ug bisan ang ubang mga gobyerno tingali wala magkabana o nagtago pa sa pila ka ebidensiya sa mga UFO. Ang awtor sa usa ka 1988 nga basahon nagpahimulos sa Freedom of Information Act, nga gitukod sa 1966 sa Tinipong Bansa, uban ang mga tinubdan sa ubang kanasoran, sa paghipos sa impormasyon nga sumala kaniya “nagapamatuod sa walay pagduhaduha nga may dako kaayong paglipodlipod bahin sa ulohan sa UFO.”​—Above Top Secret, ni Timothy Good.

Si Gary Kinder, diha sa iyang librong Light Years, nagpatunghag mga pangutana bahin sa kon unsang pamatuod ang gikinahanglan aron makombinsir ang mga awtoridad sa paglungtad sa mga UFO. Siya miingon nga ang usa ka maniniid nangutana: “Unsa ang mahimong pamatuod [sa mga UFO]? Kinahanglan bang ang UFO molusad sa Suba nga Entrada sa Pentagon, duol sa Mga Opisina sa Magkaubang mga Hepe sa Estado? O usa ba ka pamatuod sa dihang hitiktikan sa usa ka estasyon sa radar sa yuta ang UFO, mopalupad sa usa ka jet aron pahunongon kini, makita kini sa piloto sa jet, ug trangkahan kini pinaagi sa iyang radar, nga unya ang UFO moikyas sa katingalahang katulinon?”

Sa laing bahin, si Propesor Hines miergo nga ang 997 ka panid sa mga dokumentong giluwatan, nga nagkobre sa yugto gikan sa 1949 hangtod sa 1979, wala magpadayag sa paninguha sa pagtago sa gobyerno. Siya mipahayag: “Ang pagsusi sa sekretong kasulatan sa CIA ug mga dokumento bahin sa mga UFO nagpadayag sa usa ka ahensiya nga interesadog diyutay sa katingalahang butang apan maduhaduhaon sa teoriya bahin sa dili taga-yuta. Ang maong mga dokumento . . . nagasupak usab sa kanunay-gisubling mga pangangkon sa pagtago sa gobyerno sa ‘kamatuoran’ bahin sa mga UFO.”

Usa sa kinalabwang mga hinungdan sa kawalay pamatuod mao nga walay UFO ang sukad gipasundayag sa publiko, ni may dili-yutan-ong mga linalang ang sa opisyal gipadayag aron mailhan sa publiko. Dugang pa, si Propesor Hines nagpatuo, “walay letrato sa UFO ang maisip nga tinuod nga nagapadayag dili lang sa hanap nga mga porma o sa mga puntik sa kahayag.” Sa makadaghan, ang mga eksperto nagpaila nga ang mga UFO maoy sayop-pagkabadbad nga mga pagkakita sa Venus o sa ubang langitnong planeta. Dayag nga walay kasulbaran sa gumonhap sa UFO ang nakapatagbaw sa tanan.

Sa panahon nga nabaniog ang Condon Report, usa ka tigtampo sa Pagmata! nakighisgot sa pribado sa pipila sa mga resulta uban sa usa sa mga siyentipiko nga nagtrabaho sa Boulder, Colorado. Daw maoy hunahuna sa siyentipiko nga sa dili-ikapatin-awng mga kaso, ang mga kasinatian sa UFO naglangkit sa usa ka matang sa “mga pag-ila sa hunahuna.” Busa, bisan tuod daghang pagkakitag UFO ikapatin-aw sa siyentipikanhong paagi ingong pisikal nga mga butang o sayop nga mga pag-ila, ang pila tingali naglangkit sa mga kasinatian o mga pag-ila sa hunahuna.

May Okulto Kahang Impluwensiya?

Sa dihang sublion ang mga kasinatiang diha sa hunahuna sa pipila nga nagtahong nakakontak sa mga UFO, posible usab nga mailhan ang mga kaamgiran uban sa espiritiskanhon o ubang supernatural nga katingalahan. Usa ka panig-ingnan niini mao ang pamatuod ni John H. Andrews diha sa iyang librong The Extraterrestrials and Their Reality. Sa iyang mga pagpasalamat sa tabang sa paggama sa libro, siya miingon: “Ang dakong pasalamat mahiadto usab sa upat ka tawo sa kawanangan [“ET’s diha sa pisikal tawhanong mga lawas nga nakigbuylog sa atong taliwala nga wala himatikdi”] nga nagsugilon kanako sa ilang mga estorya ug buot dili magpaila, ngadto sa ubay-ubayng espiritista ug mga alagian nga mitabang nako sa daghan kong eksperimento, ngadto sa mga dili-yutan-on tungod sa ilang daghang matulon-anong mga mensahe.” Mahitungod niining “mga tawo sa kawanangan,” siya miingon: “Silang tanan intelihente kaayo; ang tanan maoy mga alagian sa dili-makitang mga kinabuhi.”​—Itandi ang 1 Samuel 28:7, 8; Efeso 6:12.

Giangkon usab ni Andrews ang pagkadawat ug mga mensahe gikan sa mga dili-yutan-on. Gilista niya ang pipila kanila sama sa: “Walay kamatayon. . . . Walay maayo o daotan. [Itandi ang Genesis 3:3, 4.] . . . Ang kalalangan, ebolusyon, ug reinkarnasyon maoy balidong mga palakaw nga nagalihok sa Uniberso. . . . Kami (ang ET’s) wala moanhi aron sa pagkontrolar o pagmando kaninyo, kondili aron sa paggiya kaninyo. . . . Ang Yuta sa dili madugay makasinatig dako kaayo, malaglagon nga kausaban. Sa dihang makompleto na kining mga kausabana, walay 1/1,000 sa populasyon karon ang buhi pa unya!”

Ang Bibliya naghisgot usab bahin sa mga dili-yutan-on, espiritung mga linalang, sama sa masinundanong mga anghel ug sa masukihon, rebelyosong mga anghel nga nahimong mga demonyo. Latas sa tibuok kasaysayan sa Bibliya, ang Diyos sa daghang panahon migamit sa matinumanong mga anghel sa pagpakigkomunikar sa mga tawo. (Genesis 22:9-18; Isaias 6:1-7) Si Satanas nagagamit gihapon sa iyang demonyong mga sumusunod sa pagpasalaag sa mga tawo pinaagi sa tanang matang sa mga pilosopiya, mga uso, mga mensahe, mga komunikasyon, ug mga kulto nga makapawahing sa pagtagad gikan sa mensahe nga ang Gingharian sa Diyos, ang iyang langitnong kagamhanan, sa dili madugay magmando ibabaw sa napasig-uling yuta.​—Itandi ang Lucas 4:33, 34; Santiago 2:19; Pinadayag 12:9; 21:1-4.

Ang Kristohanong apostol nga si Pablo mihatag ug nahiangayng pasidaan sa impluwensiya sa demonyo sa kataposang mga adlaw sa misulat siya: “Ang dinasig nga pahayag nagaingon sa tino nga sa ulahing mga yugto sa panahon ang pipila mangahulog sa pagtuo, nga magpatalinghog sa malimbongong mga dinasig nga pahayag ug mga pagtulon-an sa mga demonyo.”​—1 Timoteo 4:1.

Sa paghinumdom unsa ka duol na kita sa kataposan sa mga adlaw sa kataposan, dili maayo nga gugolon sa mga Kristohanon ang ilang bililhong panahon sa pagtugkad nianang matanga sa laglom nga mga butang. Hinunoa, angay nga magmatinagdanon kita sa labi pang hinungdanong hagit karon, nga mao, ang pagsugot sa sugo sa dili-yutan-on balaang anghel nga mipatugbaw: “Kahadloki ninyo ang Diyos ug ihatag kaniya ang himaya, kay miabot na ang takna sa iyang paghukom, ug busa simbaha ang Usa nga nagbuhat sa langit ug sa yuta ug sa dagat ug sa mga tuboran sa mga tubig.”​—Pinadayag 14:6, 7.

[Mga footnote]

[Kahon sa panid 10]

MGA UFO—Ang Siyentipikanhong Pagtuo

“Nalambiggit ang astronomiya ug mga UFO: kon ang mga tawo daghan pag nasayran sa astronomiya, diyutay ra kaayo unta ang mga pagkakitag UFO.”​—Astronomy, Disyembre 1988.

“Ang Venus mao ang pinakasanag sa tanang planeta sa langit sa magabii ug maoy nakaingon sa mas daghang taho sa UFO kay sa bisan unsang laing butang. . . .

“Ang modernong mga radar sa tugpahanan karon awtomatikong makaila sa tanang sakyanan sa kahanginan diha sa ilang dapit . . . Samtang ang mga radar mahimong mas makutihon aron tukmang makaila sa sakyanan sa kahanginan ug makapahigawas sa mga tinubdan sa sayop, ang gidaghanon sa mga taho sa radar sa UFO mius-os ngadto sa halos sero. Hinuon, kon tinuod ang mga UFO, ang usa makadahom . . . nga ang modernong radar magpauswag sa gidaghanon sa mga UFO nga makita sa radar. . . .

“Sa duolag kap-atan ka tuig nga imbestigasyon, walay nakuha nga usa ka tinuod nga letrato sa usa ka UFO ug walay nakaplagan nga usa ka buok tinuod nga tipak o ubang pisikal nga ebidensiya. Ang mga pagkakita nga talagsaong paminawon gitaho sa sunodsunod nga tuig ug, sa sunodsunod nga tuig, sa gisusig maayo, sila nangahanaw ngadto sa mga gabon sa sayop nga mga ideya, sayop nga mga pag-ila, ug sa kabakakan.”​—Pseudoscience and the Paranormal, ni Terence Hines.

“Ang kadaghanan sa suliran motungha gumikan sa kamatuoran nga ang langit nagpadayag sa halos waykataposang kadaiyahan sa katingad-anang mga talan-awon ug mga butang, nga pila ra niana ang lagmit masinati sa usa ka tawo sa tibuok kinabuhi. Ug inigkahitabo niini, siya basin malimbongan sa paghunahuna nga nakakita siyag butang talagsaon​—inay sa butang lang nga dili sinati. . . .

“Talagsa ra kaayo nga ang usa ka ulohan nahupngan sa limbong, kanerbiyos, pagkamotuo-dayon, relihiyosong kabuang, kawalay-katakos, ug kadaghanan sa ubang dili-nindot tawhanong mga kinaiya.”​—The Promise of Space, ni Arthur C. Clarke.

“Gusto ko gayong makita nga kining talagsaong mga pulong isulat diha sa pultahan sa tanang templo sa siyensiya: ‘Ang kinadak-ang pagkabuang sa hunahuna mao ang pagtuo sa butang tungod kay gusto niya nga kini mamao.’”​—Louis Pasteur, ika-19ng-siglo Pranses nga siyentipiko.

[Hulagway sa panid 8]

Depende sa anggulo sa panan-aw, ang mga balon sa anunsiyo sa magabii, mga ayroplano, ug mga helikopter masaypan nga mga UFO

[Credit Line]

Nite Sign, Inc.