“Unidentified Flying Objects”—Unsa ba Sila?
Si Betty Cash ug si Vickie Landrum, kauban sa anak niyang lalaki nga si Colby, nagpatuo nga niadtong Disyembre 29, 1980, sila naladlad sa kainit, aso, ug mga siga sa usa ka UFO (unidentified flying object). Ang usa ka taho nag-ingon nga ilang gibatbat kini nga usa ka ‘dako pormag-diamanteng butang, nga naglutaw sa langit atubangan sa ilang sakyanan diha sa usa ka biniyaang karsada sa uma duol sa Huffman, amihanan-silangan sa Houston, Texas.’ Ingong sangpotanan niadtong panagtagboa, sila nagpatuo, ilang naagoman ang nagkadaiyang suliran sa lawas.—Miami Herald, Septiyembre 4, 1985.
Gihunahuna sa mga babaye nga nalangkit ang gobyernong U.S. kay “ang butang sa taudtaod milupad paingon sa amihanan, nga giubanan sa mga 23 ka tipo-militaryong mga helikopter.” Sa maong taho, usa sa mga babaye, si Vickie Landrum, miingon nga “naagoman nilang tulo ang mga butoybutoy, panglarot sa buhok, kalipong ug mga labad-sa-ulo. Nagtuo si Landrum nga gibuga sa kasangkapan ang usa ka matang sa radyasyon nga naghimo usab sa tutulo nga sensitibo sa kahayag sa adlaw.” Gikiha nila ang gobyerno tungod sa pagpasagad.
Tungod sa ibabaw ug sa ubang balita, ang mga UFO balikbalik nga nakakuha sa pagtagad sa publiko. Sumala sa gisulat ni Philip J. Klass diha sa UFOs—The Public Deceived: “Ang paglaom nga hikaplagan ang intelihenteng kinabuhi sa laing dapit madanihon sa tibuok nga kalibotan, ug ang pagpangita niini nakadani sa pagtagad, ug sa paningkamot, sa daghang may-katakos nga siyentipiko.” ‘Apan nganong karon man?’ nangutana si Edward Dolnik diha sa The New Republic sa Agosto 1987, ilalom sa ulohang “Close Encounters.” Ang iyang tubag mao: “Ang pangunang katin-awan karong adlawa may kalabotan sa dulot ug apokaliptikanhong mga kahadlok nga nalangkit sa pagsingabot sa milenyo,” nga mao, samtang nagkaduol kita sa tuig 2000.
Nagtuo ba ang Katawhan sa mga UFO?
Nagtuo ka ba sa mga UFO? May nakit-an ka ba sa langit sa gabii nga nakapalibog kanimo? Kon kaha gituklod sa apokaliptikanhong mga kahadlok o nadani sa ubang kasinatian, daghan karong adlawa nagtuo sa mga UFO. Sa iyang asoy, gihisgotan ni Dolnik nga ang usa ka Surbing Gallup nagpaila nga “57 porsiento sa nakakolehiyo nga mga Amerikano nagtuo sa mga dili-yutan-on.” Midugang siya: “Alang sa mga Amerikano nga wala makakolehiyo, ang gidaghanon mius-os ngadto sa 46 porsiento.”
Sa nangagi, ang mga taho bahin sa UFO kasagaran nagbatbat sa katingad-anan ug talagsaong mga talan-awon sa kalangitan o usahay sa duol. Hinuon, nga bag-o pa sila daw nasentro sa aktuwal nga pakigkontak sa tawo. Ang maong mga pakigkontak giingon usahay nga maoy uban sa “mga langyaw” nga giingong nagdagit ug mga tawo. Ang mga asoy nagapaila nga ang tuyo sa “mga langyaw” usahay naglangkit sa biyolohikanhon o genetikanhon pang pag-eksperimento sa mga tawo. Ang maong mga pagpatuo nakapasentro na usab sa pagtagad sa mga tawo nganha sa ulohan sa mga UFO.
Ang maong mga pangangkong nakakita ug nakatagbo maoy internasyonal sa gidak-on. Pananglitan, ang usa naglangkit sa usa ka lalaki sa Switzerland. Latas sa yugtong lima ka tuig, giangkon, siya “nakapatunghag ginatos ka masanagon, detalyadong mga letrato. Girekord usab niya ang mga tingog sa ‘mga beamship,’ nagtigom sa ubay-ubayng metal nga sampol, ug nakagamag mga pelikula sa paglupad sa salakwanang.” Ang kabatbatan nagpadayon: “Dinosenang mga saksi nakakita sa mga beamship ug nagpamatuod sa dikatuohang estorya [sa lalaki]. Ang iyang ebidensiya, nga gisusi sa usa ka pundok sa propesyonal nga mga tawo sa seguridad nga gipangulohan sa usa ka retiradong koronel sa U.S. Air Force, gisusi sa mga siyentipiko sa IBM, sa Jet Propulsion Laboratory sa NASA, Arizona State University, ug sa McDonnell Douglas aeronautics nga kompaniya.”
Ang maong mga estorya madungog gihapon. Usa sa labing makaiikag mipatim-aw sa The Tampa Tribune, Enero 30, 1989. Kadto nag-apil sa dekolor nga ilustrasyon sa usa ka “salakwanang” nga naletratohan sa duol sa Gulf Breeze, Florida. Ang asoy naglangkit sa mga kasinatian sa usa ka tawong gitawag si Ed. Ang kabatbatan sa unang pakigkontak nga nahitabo maoy sumala sa mosunod: “Sa dihang siya mitan-aw sa gawas sa bildong mga pultahan sa iyang lawak-higdaan, si Ed nag-ingon, iyang naatubang ang usa ka samag-batang linalang nga nagsul-ob sa abohong biste.” Ang maong lagmit nga mga pakigkontak nahitabo sa usa ka yugto sa panahon, nga si Ed mikuhag daghang letrato. Bisan pa niana, walay mga letrato ang gipakita sa mantalaan.
Tungod sa makapaukyab nga mga taho sa mga panagtagbo nga makita diha sa mga mantalaan, mga magasin, ug mga libro nga anaa sa himalitan-kaayong mga listahan, ang mga tawo nangutana, Bahin ba kini sa unsa? Ang mga UFO tinuod ba, o sila ba mga handurawan lamang? May rekord ba sa kasaysayan kanang mga butanga? Posible ba nga tingalig may mga katin-awan nga molapas sa siyensiya karong adlawa? Kini ug ubang pangutana pagahisgotan sa mosunod nga mga artikulo.