Mga UFO—Karaan ug Moderno

Sukad sa labing karaang mga panahon, ang mga tawo nagtaho nga nakakitag katingad-ang mga butang sa langit. Giingon nga ang usa ka Paraon nakakita ug nagdilaab nga mga lingin sa kalangitan, ug ang Amerikanong mga Indian may mga kasugiran bahin sa naglupad nga mga baroto. Ang unang mga Romano nagtaho nga nakakitag naglupad nga mga kalasag. Sumala sa pila ka interpretasyon sa Aztec nga mga kinulit, ang diyos nga si Quetzalcoatl giingon nga miabot sa yuta nga nagsul-ob ug may-sungo nga helmet sa wanang ug nagsakay sa samag-halas nga salakwanang.

Niadtong 1561 ug 1566, sumala sa karaang mga asoy, “mga kapid-an” nga molupyo sa Basel, Switzerland, ug Nuremberg, Alemanya, gikataho nga nakakitag talagsaong mga talan-awon sa langit. Bisan pa niana, sa 1896 ug 1897, ang labing talagsaong butang nahitabo sa Tinipong Bansa. Ang mga tawo sa tibuok nasod gikataho nga nakakitag sakyanan sa kahanginan nga mitadlas sa kahitas-an. Gikaingon kini: “Wala pa sukad masinati sa Amerika ang samang kaukyab nga gipatungha sa misteryosong sakyanan sa kahanginan.” Ang maong mga pagkakita nahitabo sa dagkong mga siyudad ug kabalangayan usab sa tibuok Tinipong Bansa, sugod sa California. Ang makaikag nga punto mao, matud sa librong The Great Airship Mystery, nga “ang nasayrang kasaysayan sa paglupad wala maghisgot sa layog-abot nga sakyanan sa kahanginan sa Tinipong Bansa sa hinapos sa katuigang 1890.”

Usa sa labing makutihon ug kaylap namantalang mga estorya naggikan sa usa ka gamayng lungsod sa Kansas, T.B.A, niadtong 1897. Ang asoy nag-ingon nga ang usa ka lungsoranan sa dapit, si Alexander Hamilton, nagbatbat sa usa ka sakyanan sa kahanginan nga mitugpa diha sa lugar sa iyang mga baka. Sa dihang sa kataposan milupad ang sakyanan, gidala sa tripulante ang usa sa mga nating baka. Sa ulahi, lima o unom kilometros sa dalan, ang usa ka silingan “nakakita sa panit, mga tiil ug ulo diha sa iyang uma.” Hinuon, daghang katuigan sa ulahi, ang estorya gipatik pag-usab ug giyagyag nga bakak.

Ang mga estorya, sama sa ibabaw, kon kaha tinumotumo o giingong tinuod, gipatik na usab diha sa bag-ong mga basahon bahin sa ulohan. Daghan sa mga taho gikan nianang yugtoa una sa pagsugod sa ika-20ng siglo mahimong nahikalimtan na diha sa giabogan nga mga payl sa mantalaan gawas sa pila ka talagsaong susamang hitabo nga nagsugod pagkahitabo kapin sa 40 ka tuig sa ulahi. Maoy niadto nga ang mga tawo nagsugod sa paghinumdom ug pagsusi niadtong unang mga hitabo ug nagsugod sa pagmatikod sa iladong mga kaamgiran.

Mga UFO sa Modernong Panahon

Ang ulohan nabuhi na usab sa mas modernong panahon sa Gubat sa Kalibotan II sa dihang ang Alyadong mga pilotong tigbomba mitaho nga sila nakakitag “katingad-ang mga bola sa kahayag ug pormag-disk nga mga butang [nga] nagsunod kanila samtang nagpalupad sila ibabaw sa Alemanya ug sa Hapon.” Ang Amerikanong mga piloto nagtawag kanila nga foo-fighters, usa ka termino nga kinuha gikan sa Pranses nga pulong feu, alang sa “kalayo.” Bisan tuod ang Gubat sa Kalibotan II (1939-45) natapos na ug uban niana ang mga foo-fighter, ang mga estorya sa katingad-ang mga talan-awon padayong gisugilon.

Sa Kasadpang Uropa ug sa kanasorang Scandinavian, ang walay-pako nga sakyanan nga gitawag ghost rockets gikatahong nakita. Sila kasagarang gibatbat ingong giguyod nga mga siga tadlas sa langit. Ingong sanong sa maong mga taho, bisan ang Tinipong Bansa “mibating napugos sa pagpadalag duha ka hawod nga sekreta ngadto sa Sweden.” Ang mga estorya sa itaas sinugdanan lamang. Ang asoy nga daw nakapakugang sa kalibotan ug nakapasugod sa panahon sa flying saucer giasoy ni Kenneth Arnold, usa ka pribadong piloto ug negosyante. Niadtong Hunyo 24, 1947, gikataho nga iyang nakita “ang kutay sa siyam ka katingad-ang ayroplano nga nagsingabot sa Mt. Rainier [Washington State, U.S.A.].” Sila gibatbat ingong “mga butang nga samag platito” ug “lapad samag hulmahan sa pie ug sinaw kaayo nga gibanaag nila ang adlaw sama sa salamin.” Gitahong iyang giorasan ang ilang katulinon “sa mga 1,900 kilometro matag oras. Kadto tulin pa kaayo kay sa paglupad sa ayroplanong jet niadtong panahona.

Ang paggamit sa pulong “saucer” o platito nakakuha sa handurawan sa prensa ug misangpot sa kasagarang termino karon nga “flying saucer.” Tapos imantala ang maong estorya sa tibuok kalibotan, daghan nga nakakitag katingad-ang mga butang sa langit misugod sa pag-asoy sa ilang lainlaing mga estorya. Kadto, uban sa uban pang nakit-an, nakadani sa pagtagad sa militaryong mga awtoridad.

Misusi ang Gobyerno sa Tinipong Bansa

Lagmit tungod sa rekomendasyon sa usa ka taas-katungdanang militaryong opisyal, ang mga UFO sa kataposan nakadawat sa opisyal nga pagtagad sa gobyernong U.S. Ang resulta mao ang pagtukod sa Project Sign, nga misugod sa trabaho niadtong Enero 22, 1948. Ang maong grupong tig-imbestigar giasayn sa pagtrabaho ilalom sa pagdumala sa Air Technical Intelligence Command, nga nahimutang duol sa Dayton, Ohio, U.S.A. Halos wala pa makasugod ang proyekto sa dihang nahitabo ang trahedya. Si Kapitan Thomas Mantell, usa ka militar nga piloto, nawad-an sa iyang kinabuhi sa usa ka pagkahagsa sa ayroplano samtang naggukod sa niadto wala-hiilhing butang. Mahimong siya nawad-ag panimuot samtang nagpataas kaayo nga wala makabenepisyo sa suplementaryong oksiheno. Sa ulahi, nasayran nga tingalig siya migukod sa usa ka balon sa panukiduki sa Skyhook.

Bisan pa niana, ang usa ka bag-ong pagkakita sa duha ka piloto sa Eastern Airlines, inubanan sa pagkamatay niadtong piloto sa Air Force, dugang nakapasilaob sa mausbawong kaikag bahin sa mga UFO. Sumala sa taho, ang usa ka ayroplano sa Eastern Airlines migikan sa Houston, Texas, ug nagpadulong sa Atlanta, Georgia, sa dihang sa kalit ang piloto napugos sa kalit nga paglikay aron dili mabangga sa “waypakong B-29 lawas sa ayroplano” nga miagi sa iyang tuo. Ang usa ka pasahero ug ubay-ubay nagsukad-sa-yutang mga maniniid daw nakahatag kamatuoran sa estorya.

Ang grupong Project Sign sa kataposan miisyu sa usa ka taho nga nakapahiubos sa pipila. Sa ulahi, giilisan ang pila ka kawani nga pabor sa punto de vista nga ang mga UFO tinuod, ug ang usa ka bag-ong titulo, “Project Grudge,” gihatag sa proyekto. Bisan pa niana, sa maong yugto, ang pagtuo sa paglungtad sa mga UFO nakaabot sa bag-ong kinatas-ang punto sa dihang ang retiradong medyor si Donald E. Keyhoe misulat sa usa ka artikulo nga nag-ulohang “Tinuod ang mga Flying Saucer.” Ang asoy gipatik sa Enero 1950 nga isyu sa magasing True, ug ang isyu nakapahimulos sa dakong sirkulasyon. Unya, sa pagdugang sa kaylap nang interes, ang True mipatik sa usa ka dugang artikulo pinaagi sa komandante sa Navy si R. B. McLaughlin. Ang maong artikulo nag-ulohang “Kon Giunsa sa Pagsunod sa mga Siyentipiko ang mga Flying Saucer.” Wala magdugay ang kadasig​—ang ubang magasin, ang Cosmopolitan ug Time, mipatik sa mga artikulo nga nagyagyag sa kabakakan sa mga UFO. Tungod sa maong bag-ong mga artikulo ug temporaryong paghunong sa mga pagkakita, ang interes mikalma. Dayon miabot ang 1952, usa ka talagsaong tuig sa kasaysayan sa UFO.

1952​—Ang Tuig sa mga UFO

Ang pinakadaghan nga pagkakita sa UFO nga nadawat sa U.S. Air Technical Intelligence Command natala niadtong 1952: 1,501. Sayo sa Marso 1952, tungod sa midaghang pagkakita, gihukom sa U.S. Air Force nga mugnaon ang separadong organisasyon nga gitawag Project Blue Book. Panahon niadtong tuiga sa dakong kalihokan sa UFO, nagkadaiya ug daghan ang mga pagkakita.

Usa sa serye sa ilado ilabinang mga pagkakita nagsugod sa Washington, D.C., panahon sa mga oras sa tungang gabii sa Hulyo 19 ug 20. Gitaho nga “ang usa ka grupo sa wala-hiilhing naglupad nga mga butang mipatim-aw sa duha ka radarscopes sa Air Route Traffic Control Center sa Washington National Airport. Ang mga butang hinay nga naglupad sa sinugdan . . . dayon misutoy sa ‘katingalahang mga katulinon.’” Ang mga pagkakita sa mata mitumbas sa mga report sa radar. Gitaho sa dugang nga gisulayan ang pagpugong, pero “ang mga butang nangawala sa dihang nagsingabot ang mga jet.”

Niadtong 1966 si Gerald R. Ford, nga kongresista niadto nga taga-Michigan, gipasidunggan nga maoy miawhag sa laing pederal nga imbestigasyon sa mga UFO. Kadto maoy pagsanong sa ubay-ubayng pagkakita sa UFO sa iyang estado. Ang resulta mao nga gitukod ang laing pagtuon sa University of Colorado. Si Dr. Edward U. Condon, usa ka iladong pisiko, maoy midumala sa buluhaton. Niadtong 1969, sa pagkatapos sa pagtuon, ang Condon Report giluwatan. Apil sa uban pang butang, kini nag-ingon nga “walay misangpot gikan sa pagtuon sa mga UFO sa miaging 21 ka tuig nga nakadugang sa siyentipikanhong kahibalo . . . nga dili ikapamatarong ang dugang dakong pagtuon sa mga UFO sa paglaom nga ang siyensiya mapauswag pinaagi niana.”

Kadto nagtapos sa opisyal nga pagkalangkit sa gobyernong U.S. sa pagtuon sa mga UFO ug, dugang pa, nakapabugnaw sa kamausisaon sa mga tawo. Bisan pa niana, kadto wala magtapos sa lantugi sa UFO, ni kadto nagtapos sa mga pagkakita sa UFO. Sumala sa usa ka taho, “20 porsiento sa kasiyamag-lima ka kaso nga gihisgotan sa dokumento nagpabiling ‘wala ikapatin-aw.’”

Ang kaikag sa mga UFO daw nagdako ug nag-us-os duyog sa sunodsunod nga mga pagkakita. Talagsaon ang mga tuig 1973 ug 1974, sa dihang nakit-an ang mga UFO. Sa pag-abot sa katuigang 1980, ang mga taho nabutang na usab sa balita. Apan unsay nahinapos sa mga siyentipiko ug sa ubang eksperto sa dili pa dugayng katuigan?

[Hulagway sa panid 5]

Ang pipila naghunahuna nga ang Aztec nga diyos si Quetzalcoatl miabot nga nagsakay sa samag-halas nga salakwanang