“Mga Droga? Pakiglamano na Lang Kang Satanas!”
Unsa ba ang epekto sa paggamit sa mga droga “alang sa kalingawan” diha sa lawas sa tawo? Tagda si Charles. Siya 15 anyos sa dihang gipailaila sa mga droga pinaagi sa iyang magulang nga babaye. Sa sunod 15 ka tuig, siya migamit sa marijuana, cocaine, ug heroina sa lainlaing mga kombinasyon. Siya nasulod sa daghang koreksiyonal nga mga institusyon tungod sa ginagmayng mga pangawat ug armadong panulis. Ang paggamit niyag droga misangpot nga siya natakdan sa AIDS. Nga nakurat sa labihan sa giingnang siya nagdala sa virus sa AIDS, gisud-ong niya nga waymahimo samtang ang iyang taas, kusgan, maskuladong lawas nagkakupos hangtod nahimong samag tukog na lamang. Basaha ang iyang makapasubong estorya ug dayon suknaa ang imong kaugalingon, ‘Takos ba kini?’
“IMONG ginadaot ang usa ka kahibulongang lawas. Ug ikaw dili na makapahimulos sa daghan kaayong butang, tungod sa paghugawhugaw uban sa mga droga aron makapabilin ang pagbati sa kalalim. Nahauna, ikaw dili na makadula uban sa imong anak babaye. Ikaw dili na makaitsaitsag bola kauban niya, dili na makadalagan uban niya. Ako wala na makapahimulos sa pagtan-aw sa bugtong nakong anak lalaki nga mitubo gikan sa pagkamasuso, milakaw ug sa mga butang susama niana. Dili na ako makadala sa akong asawa sa sayaw kay ako dili na makasayaw. Dili na ako makadula sa kadaghanang mga dula kay dili lang naminhod ang akong lawas apan kini hinay nang molihok sama sa robot.
“Ang akong mga kamot dili na makatrabaho sama sa nangagi. Dili na ako makabalbas o makaporma sa akong bungot o makatupi sa akong buhok sama sa nangagi. Dili na ako makailis sama sa nangagi. Dili na gani ako makabutones sa akong mga sinina. Dili ako makagamit sa banyo nga mag-inusara. Usahay dili gani ako makakuhag pilok gikan sa akong mata kay ang akong mga tudlo dili makalihok. Dili na ako makaluto sama sa nangagi. Ang akong propesyon ingong tigbutang sa tisa ug alpombra gikuha na gikan kanako tungod sa maong virus, tungod sa mga droga.
“Ang tanan kinahanglang magsilbi kanako. Ako samag bata. Ang akong utok dili na moobra sama sa nangagi. Ako malimot. Pananglitan, kinahanglang hunahunaon ko pa ang ngalan sa akong magbalantay sa balay. Balikbalikon sa akong asawa ang mga butang, ug ako kanang makalimtan. Ug ang suliran mao, kini nagkagrabe.
“Ang tibuok lawas masakit, matag segundo sa adlaw. Ang kasakit makapahilak sa usa ka lalaking kusgan, bisan kinsa ka man. Ang mga pildora sa sakit nga ilang ihatag kanimo—kana mokutkot sa imong estomago, ug makapaulser. Busa ikaw dili makatomar sa mga pildora sa sakit sa tanang panahon. Ug ikaw maghinugo ug moubo nga mogawas ang dugo gumikan sa ulser sa estomago. Kon ako masamad, kinahanglang mabalaka ako sa impeksiyon. Nipis kaayo ang akong panit. Dili na ako makadumogay ug makadula uban sa akong anak lalaki.
“Abi nakog nabuntog ko ang pakigbisog. Napulog-lima ka tuig nga paghugawhugaw uban sa mga droga—abi nakog nakalingkawas ako niana. Ug karon ako nagbaton sa virus sa AIDS. Ambut kon kanus-a ako mamatay.
“Busa kon adunay gustong mobaylo kang Jehova niana, pahibaloa sila. Mga droga? Pakiglamano na lang kang Satanas kay kana ang iyang galamiton!”
Tapos makakat-on sa kamatuoran sa Pulong sa Diyos, gihunong ni Charles ang bisyo sa droga ug nahimong bawtismadong Saksi ni Jehova. Samtang didto sa ospital, siya misangyaw nga walay hunong ngadto sa mga doktor, mga nars, ug kaubang mga pasyente. Ugaling, tulo ka tuig ug tunga tapos sa iyang bawtismo, si Charles namatay, Enero 27, 1990, nga 37 anyos sa edad.