Mga Kahoy nga Nagasilot sa mga Kawatan

Sa ubang mga yuta ang Christmas tree giisip nga hinungdanon sa pagsaulog sa Pasko, apan dili ang tanan nga gusto sa usa ka kahoy andam nga mobayad niana. Ang mga parke ug gipaanindot nga mga katungod-sa-alagian sa daghang mga dalan sa Tinipong Bansa gisulong sa mga kawatan sa kahoy. Sa pagpangita ug tilinguhaong fir, spruce, o pine nga mga kahoy, ang mga kawatan nagputol kanila ug naghakot kanila walay sapayan kon kinsay tag-iya sa maong yuta.

Ang pipila ka mga estado misugod sa pagpakigbatok. Sa panahon sa pasko sa miaging tuig, ang mga awtoridad sa nagkalainlaing mga rehiyon sa amihanan nagsugod sa pag-esprey sa pipila ka mga kahoy sa linain nga kemikal. Kini dili himatikdan sa gawas tugnaw nga palibot, apan sa dihang ang kahoy luwas na nga anaa sa init nga sala sa kawatan, ang kemikal magpaila sa pagkaanaa niini. Sumala sa The Wall Street Journal, kini manimaho “sama sa usa ka paktorya sa abono.”

Ang direktor sa parke alang sa Monroe, Connecticut, nagbanabana nga ang lungsod nawad-an sa ginatos ka mga kahoy tungod sa mga kawatan sa milabay nga mga tuig. Apan sukad nga ang mga opisyal sa lungsod nagbutang ug mga notisya sa lokal nga mantalaan nga nagpahimangno sa mga gustong mangawat nga ang anindot nga mga kahoy, sa ingon, manimaho ug mga bomba, ang mga pagpangawat mius-os.