“Dili Kana Akong Sala!”—Ang Panahon sa mga Pasangil

BUNG! Dali nga midalagan ang inahan sa batang si Johnny paingon sa kusina sa pagtan-aw unsa kadtong makuyaw nga saba. Diha, nabuak sa salog, anaa ang sudlanan sa biskwit. Si Johnny nagatindog, nga nagkuyot sa usa ka biskwit sa iyang kamot ug naningkamot nga makit-an nga maorag inosente. “Dili kadto akong sala!” siya misagbat.

ANG mga ginikanan nahibalo gayod nga ang kabataan maglisod sa pag-angkon sa ilang kaugalingong mga sayop. Apan karon ang hamtong nga katilingban aduna usab ing sama nga problema. Mas daghang mga tawo ang nagatuo nga ang awhag sa pagbaton ug katagbawan dili nila mapugngan.

Konsideraha, pananglitan, ang lalake nga milugos sa samang babaye makatulo ka beses. Siya niprotesta sa korte nga siya biktima sa iyang kaugalingong hormone; nga siya taas ug testosterone. Siya gibuhian. Usa ka politiko kinsa nadakpan nga namakak nagpasangil sa problema sa pag-inom. Usa ka tigpayuhot sa droga gibuhian pagkahuman nga siya miangkon nga usa ka biktima sa “action-addict syndrome.”

Sumala sa U.S.News & World Report, sobra sa 2,000 ka grupo ang magtagbo matag semana sa pagtambag niadtong nagkonsiderar sa ilang hunahuna nga mga giyanon sa sekso o gugma. Sobra sa 200 ka nasyonal nga mga organisasyon ang misunod sa Alcoholics Anonymous sa pagtabang sa mga “biktima” sa ubang mga “adiksiyon,” sama sa Batterer’s Anonymous, Gay Men’s Overeaters Anonymous, Gamblers Anonymous, Debtors Anonymous, Messies Anonymous, ug Workaholics Anonymous.

Pipila ka mga batid miduso sa ideya nga kining tanang porma sa makadaot nga lihok makagiyan, apan ang uban nakuyawan niining bag-ong porma sa adiksiyon. Sa giingon sa usa ka sikolohista: “Ang pagmugna ug usa ka kalibotan sa makagiyan nga mga sakit mahimong magkahulugan sa pagmugna ug usa ka kalibotan diin ang tanan madala lang sa pasangil.” Usa ka psychotherapist mipahimangno nga sa dihang ang mga tawo magatawag sa ilang kaugalingon nga dili-matabang nga mga biktima sa usa ka adiksiyon, sila mas lisod tambalan, ang ilang pasangil mahimong bahin sa ilang pagkatawo.

Si Dr. William Lee Wilbanks, usa ka propesor sa hustisya sa kriminal, mipahayag nga ang modernong urog sa adiksiyon nga terapiya maoy bahin sa upat-ug-letrang pilosopiya nga iyang ginatawag New Obscenity: “Dili nako matabangan ang akong kaugalingon.” Iyang gitamay ang “nagauswag nga tendensiya sa katilingban sa siyensiya sa paglantaw sa mga tawo ingong mga butang kinsa dili makakontrol sa mga puwersa sa sulod o sa gawas.” “Kini nga panglantaw,” siya nagadugang, “nagasugyot nga ang kagawasan-sa-kabubut-on nagadula ug gamay o walay gani ing bahin sa tawhanong batasan.”

Ang mga pakisusi nagasugyot nga ang tawo diay mas adunay impluwensiya bisan sa mas tradisiyonal nga adiksiyon. Pananglitan, mga 75 porsiyento sa mga adikto sa heroin napakyas sa ilang paningkamot nga mohunong sa maong buhat. Apan taliwala sa mga beterano sa Gubat sa Vietnam, ang porsiyento sa kalamposan mas taas​—duolag 90 porsiyento ang nakahunong. Ngano? Ang droga mao lang gihapon, ang adiksiyon managsama. Sa ginasugyot ni Wilbanks, kini tungod sa “ilang sistema sa pagpabili ug disiplina-sa-kaugalingon mitabang kanila sa ‘Pagsultig Dili’”? Dili ang mga butang sama sa depende sa kemikal o bisan ang kinaiyang tendensiya ngadto sa pipila ka mga problema dili tinuod. Sa gikaingon ni Wilbanks, ang maong mga hinungdan “basin makapahimo sa sangka sa tentasyon mas lisod. Apan ang sangka madaog pa gihapon.”

Mao gayod. Ang lamat sa dihadiha nga katagbawan mahimong kusganon, apan dili kini labing-gamhanan. Sama sa gipakita sa buhat sa mga Saksi ni Jehova sa tibuok kalibotan, mga adis-adis, alkoholiko, mananapaw, sugarol, ug mga homoseksuwal dili angay nga magtagbaw sa ilang mga tinguha. Uban sa paggamit ug kusog sa kabubut-on ug, ang mas hinungdanon, ang tabang sa balaang espiritu sa Diyos, sila makahimo sa pagbuntog sa ilang mga problema. Busa, bisan unsa pa ang isulti sa mga “batid,” ang atong Maglalalang nahibalo kanus-a kita responsable sa atong mga aksiyon. (Numeros 15:30, 31; 1 Corinto 6:9-11) Apan siya usab maluluy-on. Siya dili gayod magadahom ug sobra sa makataronganon, “nahinumdom nga kita mga abog.”​—Salmo 103:14.