Dag-a ang Piot nga Puy-anan!

‘KINAHANGLAN ko ang dugang lugar!’ Pila ka higayon nimong nadunggan​—o gibungat​—kanang komun nga reklamo? Ang tubag ba mao ang mas dako nga balay o apartment? Lagmit dili. Ang kadaghanan kanato sa yano dili makaarang sa pagbalhin. Ug bisan pag may makaarang kanato sa pagbalhin, makakaplag sa mubo lang nga panahon nga ang problema sa luna magpatim-aw na usab sa iyang ulo.

Ang tinuod mao, bisan unsa pa ka gamay sa atong gipuy-ang lugar, duna gayoy igong luna alang sa mga butang nga atong gikinahanglan. Ang kadaghan sa butang mao ang nakamugna sa problema. Ug kon ang balay nagkalamukat ug nagkatag, kini mahimong tinubdan kanunay sa pagkawala sa kaharuhay, kalagot, ug tensiyon. Busa, atong tagdon ang tulo ka paagi aron “makaplagan” ang dugang lugar sa mismong dapit nga imong gipuy-an​—ang imong balay!a

Num. 1: Idespatsar ang Wala-Kinahanglang mga Butang

Diha sa kadaghanang mga balay ang tingpamulak o tinghunlak nga paghinlo sa balay maoy usa ka rituwal sa pag-irog-irog sa mga butang, paghinlo ug unya pagbalik sa mga butang sa nahimutangan niini. Apan nganong dili gamiton kining higayona sa pagdispatsar sa mga butang nga wala kinahanglana?

Batasan na ba nimo ang pagtipig ug karaang mga mantalaan ug mga magasin? Sulayig gunting ang mga artikulo nga imong gustong tipigan (isulat diha ang ngalan sa basahon, petsa, ug numero sa panid alang sa umaabot nga reperensiya) ug unya ilabay ang nahibilin sa mantalaan o magasin. Ikaw matingala kon unsa ka dakong lugar ang mamugna niini!

Tan-awa usab, ang muwebles nga imong gipanag-iya. Aduna bay pipila ka muwebles nga walay kagamitan kondili nakadugang lang hinoon sa kapiot? Basin ug dakog kagamitan kini alang sa usa ka higala. Ug komosta ang imong mga kabinet? Puno ba kini sa mga senina nga wala na nimo gamita sa daghang tuig? Nganong dili idispatsar ang bisan unsa nga wala na nimo masul-ob sulod sa usa ka tuig o kapin pa?

Tugotan ta, daw dako kaayo kining trabaho, ug mahimong tinuod kini. Busa himoa kini nga usa ka proyekto sa pamilya. Iapil ang mga bata ug ang imong kapikas. Sa dihang maikag ang imong mga anak sa maong proyekto, basin sila sa kinabubut-on malipay sa pagdispatsar sa ilang pipila ka butang nga wala kinahanglana. Ang resulta? Tingali ang sinugdanan sa tibuok-kinabuhi nga sumbanan sa kahinlo.

Num. 2: Gamita ang Tanang Bakanteng Lugar

Mosuroy ta karon sa imong balay ug susiha ang tanang luna nga magamit nga tipiganan. Apil niini ang mga bungbong, istante, mga pultahan, agianan, mga kabinet, ug mga kisame. Ang baratohong mga bukag o patonganan mahimong isab-it diha sa mga bungbong sa agianan o sa mga pultahan nga katipigan ug mga sapatos, mga toalya, ug uban pa. Ang mga kahon o mga alat magamit ingong mabalhinbalhing butangan alang sa mga libro, dulaan, mga album sa letrato, ug ubang mga butang nga gusto nimong tipigan. Pinaagi sa pagbutang niining mga sudlanana diha sa imong mga kabinet, imong magamit ang nausik nga luna sa salog.

Ang mapilopilo nga mga lingkoranan nakaokupar ba ug dakong lugar? Tingalig matago kini ilalom sa sopa o sa likod sa imong mga kurtina. Ang bililhon bang lugar sa sala giokupar sa gagmayng mga istante sa mga libro? Nganong dili, ingong kapilian, magpataod ug gikan salog ngadto sa kisame nga butanganag libro diha sa may agianan? Kon imong taoran kinig mga sira, magamit usab kini sa pagtipig ug ubang mga butang gawas sa mga libro.

Ayaw kalimti ang luna ilalom sa imong katre. Ang plastik o karbord nga mga kahon mabutang dinha aron katipigan sa mga habol nga dili pa magamit. Ug komosta ang imong mga bungbong? Ang dagkong mga ispiker sa stereo mahimong itaod sa bungbong aron makadaginot ug luna sa salog. Kon ang dulaan nagkalamukat sa salog sa lawak sa imong anak, sulayi pagpataod ug mubong mga patonganan sa bungbong. Kini makataganag maabot dayon nga hiposanan sa mga dulaan sa imong anak, inay idasok kini diha sa dakong kaban. Ang mga dulaan makita sa mga bata, ug ang mga patonganan mapatas-an diha sa bungbong sa magkadako ang bata. Ang mga patonganan dako usab ug gamit sa imong banyo aron katipigan sa mga toalya, sabon, ug mga gamit sa banyo.

Num. 3: Ipahimutag Maayo ang Imong Puy-anan Pag-usab

Ang lugar nga puy-anan mamugna pinaagi lamang sa pagplastar pag-usab sa pipila ka butang. Daghang mga ginang sa balay nagbutang sa ilang muwebles sa kilid sa bungbong, gipasagdan ang tunga sa lawak nga hawan. Sulayi pagbutang ug duha ka istante sa libro o lamesa nga luyoluyo aron magsilbing dibisyon sa lawak. O kaha magpataod kag gikan salog ngadto sa kisame nga butanganag libro nga magsilbing tipiganan o dibisyon sa lawak. Karon ang mao nga lawak magamit sa duha ka katuyoan​—usa maoy luna alang sa pagtuon, ug ang lain alang sa kasagarang kalihokan sa panimalay. Ang mga dibisyon sa lawak ilabinang mapuslanon kon ang mga anak nag-ambitay sa usa ka lawak. Nakahatag silag dugang pribasiya sa menos nga gasto.

Kon kulang ang lugar nga puy-anan, hinunoa, usahay bisan ang labing dakong paningkamot sa pagpaigo dili mopatunghag resulta nga imong gusto. Tingali makamugna kag lugar nga dakong tan-awon pinaagi sa paggamit ug mga salamin sa bungbong o pagpintal pag-usab sa imong balay ginamit ang hilaw nga mga kolor. Ang pagbuhat sa bisan hain niini makamugnag mas dakong luna sa imong balay.

Kon suliran ang gamayng lugar, nganong dili sulayan kining yanong mga sugyot? Tingalig imong makita nga kon ang imong balay hapsay ug organisado, kini makadugang sa kahamugaway ug kalinaw sa hunahuna sa tibuok pamilya​—usa ka angay nga ganti tungod sa pagdaog sa piot nga puy-anan!

[Footnote]