Pagpaniid sa Kalibotan
Mga Saksi Gitugot na sa Balaod sa Mozambique
Ang buluhatong pagsangyaw sa mga Saksi ni Jehova gitugot na sa balaod sa habagatan-sidlakang nasod sa Mozambique sa Aprika. Usa ka sulat gikan sa Ministri sa Hustisya, pinetsahan sa Pebrero 11, 1991, nag-ingon: “Ang mga Saksi ni Jehova, sama sa ubang relihiyosong mga institusyon, magapahimulos sa tanang mga katungod ug mga pasalig nga gihikay sa Batakang Balaod sa Republika sa Mozambique.” Kadto gipirmahan sa Direktor sa mga Kahikayan sa Relihiyon sa nasod. Kining maayong balita malipayong gidawat sa 5,235 ka Saksi nga nagtaho sa pagsangyaw sa mensahe sa Bibliya didto sa miaging Enero. Mapasalamaton usab sa pagdeklarar sa opisyal nga pag-ila ang 13,971 ka delegado nga mitambong didto sa “Putling Pinulongan” Distritong mga Kombensiyon nga dili pa dugayng gihimo sa Mozambique, diin 357 ang gibawtismohan.
Maayong Balita Gikan sa U.S.S.R.
Sa Marso 28, 1991, gitunolan sa Ministri sa Hustisya ang mga hawas sa Asosasyon sa mga Saksi ni Jehova ug usa ka dokumento nga naghatag sa asosasyon ug legal nga pag-ila diha sa Unyong Sobyet.
Mga Biktima sa Buchenwald
Ang ngalang Buchenwald mohatag kalisang sa mga hunahuna sa mga tawong mahinumdom sa Nazi Alemanya. Nahimutang duol sa Weimar, nga sa dili pa dugay mao ang East Germany, ang Buchenwald maoy usa ka konsentrasyong kampo nga gibaniog tungod sa tawhanong kabangisan ngadto sa ikaupat ka bahin sa usa ka milyong mga binilanggo. Karong adlawa, kini nagbarog ingong usa ka publikong handomanan ug museo sa mga biktima sa kadaotan, bisan pa nalimin gihapon kini sa kontrobersiya. Si Ulrich Schneider, bag-ong direktor sa handomanan, gitudlo sa pagbutyag sa ngalan sa 65,000 ka mamumuong mga ulipon nga nangamatay didto. “Angay na lang, pananglitan, nga handomon ang mga sundalong Sobyet nga namatay dinhi,” siya miingon. “Apan daghan kaayong mga Pranses, taga Belgium ug mga Olandes ang namatay usab dinhi ug gamay ra kaayong pagtagad ang gihatag kanila.” Iyang gihisgotan usab ang panginahanglan sa “paghimog labi pang kusganong pahayag” sa pagladlad sa mga inhustisya nga nahimo batok sa ubang mga pundok, apil ang mga Saksi ni Jehova.
Acupuncture Alang sa mga Binuhi
Sumala sa The Wall Street Journal, ang American Veterinary Medical Association karon miila sa acupuncture ingong usa ka madawat nga pagtambal sa masakitong mga hayop. Ang mantalaan miingon nga “giisip niadto nga popanambal lamang, ang acupuncture diha sa mga hayop gidawat ingong walay-drogang kapiliang pagtambal, nga maoy gamiton kon ang naandang mga paagi dili molampos.” Gigamit sa ubang mga beterinaryo ang laser nga menos ug kusog, ultrasounds, ug ubang mga paagi sa pagpaobra sa mga dapit sa lawas nga pagatusokag dagom diha sa mga hayop. Gikataho, ang pagtupok sa pino kaayong mga dagom nga stainless steel diha sa nagkalainlaing reflex points sa lawas malamposon sa pagtambal sa mga iro, kabayo, langgam, ug bisan goldfish.
Relihiyon sa Kabanikanhang Intsik
Si Wang Zhen, ang bise-primer sa Tsina, nag-ingon nga ang mga komunidad sa panguma sa Tsina gisulong sa mga relihiyon sa Kasadpan, sumala sa South China Morning Post ug gitaho sa Tinipong Bansa diha sa mantalaang Intsik ug pinulongan nga World Daily. Si Wang Zhen miingon nga diha sa mga balangay sa kaumahan, diin nagpuyo ang 70 porsiento sa populasyon, “dugang ug dugang mga tawo gustong makig-anib ug iglesya.”
Sobra ra ba nga Pasidungog?
Ang mga kongregasyon sa United Methodist kinahanglang mangitag mga paagi sa pagpasidungog sa ilang mga obispo gawas pa sa paghatag kanila ug dako kaayong pinansiyal nga sitsiripa. Mao kanay rekomendasyon sa usa ka pagtuon sa eskuylahan sa mga ministro sa relihiyon sa Methodist sa Tinipong Bansa. Nakaplagan sa pagtuon nga ang mga kongregasyon kasagarang mohatag ug mga gasang kuwarta nga balor ug $40,000 ug mga kotse nga mokantidad ug $20,000 inigretiro o inigbalhin sa mga obispo. Miingon ang Christianity Today: “Dihay panahon nga ang maong mga ganti gituyo aron mabawi ang gamayng suweldo nga gihatag sa mga opisyal sa iglesya. Apan hangtod sa sunod tuig, ang suweldo sa obispo sa UM maoy kapin sa $66,000. Dugang pa, ang mga obispo nagadawat ug libreng balay ug alawans alang sa opisina nga $41,000.”
Dili-Direktang Pagtabako
Ang aso nga ginapabulhot sa mga tigtabako dili-tinuyo nga mahingos sa mga dili tigtabako. Kining dili-direktang pagtabako karon nakapatay sa mga kinabuhi sa libolibo sa Australia, sumala sa dili pa dugay nga pagtuon. Gituohan nga “kapin sa 1000 ka dili-tigtabakong mga Australiano nangamatay matag tuig ingong resulta sa sakit sa kasingkasing nga ang hinungdan mao ang dili-direktang pagtabako,” mitaho ang The Australian. Ang mantalaan miingon nga kining ‘segunda-manong aso’ adunay carbon monoxide ug nikotena, nga mopaus-os sa pag-obra sa kasingkasing ug sa “katakos sa dugo sa paghatod sa oksihino ngadto sa kasingkasing ug sa nahibilin sa lawas.” Ang pagtuon mihinapos nga “sa matag walo ka tigtabako nga mamatay tungod sa tabako, usa ka dili-tigtabako ang mamatay tungod sa kanunayng paghingos sa aso.”
Ang Kinadaghanang Tiggamit ug mga Tambal sa Kalibotan
Ang magasing L’Express sa Paris nagtaho nga ang kinadaghanang tiggamit ug ginaresitang tambal sa kalibotan mao ang Pranses. Sila nakagasto ug 90 ka libo ka milyong francs ($18 ka libo ka milyon, U.S.) sa 1989 diha sa mga tambal, nga ang aberids maoy 1,598 francs ($320, U.S.) matag tawo. Sumala sa mantalaang Pranses nga La Croix, ang mga Pranses nagagamit ug lima ka pilong mga tranquilizers ug mga sleeping pills sama sa Amerikano. Kaylap ang suliran ug nagatandog sa tanang panuigon. Daghan karon nahadlok nga ang kapeligrohan sa pagkagiyanon tinuod gayod. Usa sa lima ka batan-on mogawas sa opisina sa doktor nga giresitaan ug sleeping pills o tranquilizers. Tali sa mga kabataan nga ubos sa usa ka tuig ang edad, 15 porsiento regular nga nagadawat ug mga tranquilizers sa pagtambal sa nerbiyos ug sa pagkawalay ganang mokaon. Ang mantalaang Le Figaro mitaho nga sa Pransiya, tali sa 25 ug 30 porsiento sa mga hamtong maoy regular dugay nang tiggamit sa pila ka klaseng tranquilizer.
Lumba sa Sakyanan nga Gipaandar sa Init sa Adlaw sa Australia
Ang nagkalalidadis katingad-anag hitsurang mga behikulo—39 kanila, gikan sa tibuok kalibotan—nagsugod gikan sa Darwin, sa amihanang Australia, sa Nobyembre 11, 1990, paingon sa Adelaide, sa habagatang kontinente nga isla. Ang una sa mga behikulo miabot didto sa milabay ang unom ka adlaw. Ilang gihimo ang 3,000 ka kilometrong biyahe nga gipaandar sa init lamang sa adlaw. Kining lumbaa, ang ikaduhang World Solar Challenge, nadaog sa entranteng Swiso, ang Spirit of Biel. Ang nakadaog nag-aberids ug 70 kilometro por ora, ug usahay nakaabot sa gikusgong 100 kilometros por ora. Ang ikaduhang mananaog, nga nabiyaan ug 400 ka kilometro por ora kay sa nakadaog, mikantidad ug duolan sa $15,000,000 sa paggama niini, mitaho ang magasing Asiaweek. Ang Spirit of Biel, hinunoa, mikantidad lamang ug $600,000.
Dakong Riyesgo ang mga Tigpintal
Sumala sa usa ka ahensiya sa WHO (World Health Organization) sa Lyons, Pransiya, ang mga tigpintal maoy 20 porsiento nga mas dakong riyesgo nga mataptan ug kanser kay sa nahibilin sa populasyon. “Kay ang kanser sa baga.” mitaho ang Alemang magasin nga Naturwissenschaftliche Rundschau, “kining dugang nga reyisgo tungod sa trabaho miabot ug 40 porsiento nga mas taas kay sa aberids. Ang riyesgo nga matugkan ug sakit sa sentral ug peripheral nga sistema sa nerbiyos taas usab.” Ang magasin nangangkon nga bisan ang mga anak sa pila ka tigpintal matakdan tungod sa trabaho sa ilang ginikanan; mopatim-aw nga sila mas dakog riyesgo nga matugkan ug tumor sa utok ug leukemia. Sumala sa WHO, ang mga tigpatunaw nga anaa sa pintal ug barnis mao ang tuboran sa kapeligrohan, dili ang trabaho sa pagpamintal.
Pagpanghasi Diha sa mga Babayeng Klero
Diha sa usa ka surbi nga gihimo sa United Methodist Church sa Tinipong Bansa, kapin sa ikaupat ka bahin sa mga klerong babaye sa iglesya gitaho nga sila nakaeksperyensiya ug seksuwal nga pagpanghasi. Sumala pa sa Ecumenical Press Service (ang serbisyo sa balita sa World Council of Churches), ang mao gihapong surbi mitaho nga 41 porsiento sa mga babayeng klero sa maong iglesya nagbutyag nga ang seksuwal nga panghasi “ginahimo sa mga kaubanan o sa ubang mga pastor.”