Gikan sa Among mga Magbabasa
Mga Abnormalidad sa Pagkaon Sulod sa 15 ka tuig nakigbisog ako batok sa mga abnormalidad sa pagkaon. Ang inyong artikulo (Disyembre 22, 1990) makataronganon ug mahigugmaon ug gihisgotan ang gamot nga hinungdan sa suliran—menos nga pagtamod sa kaugalingon. Buot kong idugang nga nagkinahanglag panahon aron mabalik ang normal nga pag-obra sa nadaot nga mga tisyu sa kaunoran, kadaot sa masa sa bukog, ug sa suliran sa panghilis ug sa endocrine nga moresulta tungod sa mga abnormalidad sa pagkaon. Ang pagkaayo makasubo ug makawalag paglaom samtang antoson sa usa ang katingad-anang mga kausaban sa porma ug gidak-on sa lawas, kausaban sa buut, depresyon, pagkasapoton, ug pagpanginit sa lawas. Kon nasayod ka kon unsay nalangkit sa pagkaayo, wala kaayoy kalagmitan nga mabughat ka.
L. B., Tinipong Bansa
Usa ka Ginikanang Panimalay Napukaw ako sa pagpahayag ug apresasyon alang sa artikulo, “Mga Batan-on Nangutana . . . Sa Unsang Paagi Ako Magmalipayon sa Pagpuyo Uban sa Usa Lamang ka Ginikanan?” (Disyembre 22, 1990) Ang akong inahan mao ang ulo usa ka ginikanang panimalay, ug kining artikuloha nakapatunghag balik sa mga panumdoman. Naghisgot gikan sa eksperyensiya, ikaingon ko nga ang mga sugyot sa pagdaginot ug sa dili pag-usik-usik tinuod gayod nga moobra, ug kini padayong nakahatag kanakog kaayohan ingong bug-os panahong ebanghelisador. Mapasalamaton gayod ako kanunay sa maayo kaayong pagbansay nga gihatag sa akong Mama kanamo. Pasidunggan gayod niya ang Diyos sa iyang kalamposan ingong nag-inusarang ginikanan.
J. F., Tinipong Bansa
Ang akong amahan namatay dili pa dugay. Nagtuo ako nga ang artikulo migula alang gayod kanako sa tukmang panahon. Akong nakita nga si Jehova nagatagad gayod. Salamat na usab!
L. J. Tinipong Bansa
Panukiduki Diha sa Kahayopan Akong nakita ang inyong Hulyo 8, 1990, nga gula nga makatugaw kaayo. Ang hulagway sa iro diha sa hapin magul-anon kaayo ug dagway; daw nagpakiluoy siya nga unta may moatiman kaniya.
S. P., Alemanya
Ang iro sa hulagway gihulaman gikan sa usa ka lokal nga tindahan nga namaligyag mga hayop ug maayong pagkaatiman ug gipakaon samtang diha pa kanamo. Mopatim-aw nga ang iyang magul-anong panagway daw maoy iyang kinaiya.—ED.
Kamatayon sa Usa ka Bata Salamat sa inyong artikulo “Ang Hunahuna sa Bibliya—‘Nganong Gikuha sa Diyos ang Akong Anak?’” (Pebrero 8, 1991) Ang artikulo miabot sa buson sa mismong adlaw nga ako ug ang akong bana namatyan sa among unang anak tungod kay nakuha. Kadto maoy mapasaligong pahinumdom kanamo nga ang Diyos dili maoy responsabli sa among kagul-anan.
J. G., Tinipong Bansa
Mongoose Nalingaw ako sa inyong artikulo mahitungod sa mongoose. (Marso 8, 1991) Apan, kinahanglang mag-amping kon magkuhag usa ka langyawng hayop gikan sa kaihalasan ug sa paghimo niini nga binuhi.
P. L., Tinipong Bansa
Among giapresyar ang imong makataronganong punto. Ang pagbuhi ug pila ka matang sa mongoose gihisgotan lamang sa pag-ilustrar sa kamatuoran nga sila sa kinaiyanhon dili mapintas. Gani, gidili sa Tinipong Bansa ang pagpagawas sa nasod ug mga mangoose aron himoong mga binuhi.—ED.
Pag-inom ug Pagmaneho Bag-o ko pang nadawat ang akong lisensiya sa pagmaneho ug busa nakakaplag sa inyong artikulo sa Pebrero 8, 1991, nga makaiikag kaayo. Ang artikulo makapadasig apan naghatag ug klarong pasidaan. Walay tawo nga gustong mahimutang sa usa ka situwasyon sama sa usa ka batan-on kinsa miadmiter nga nakaligis ug tawo! Akong hatagan ug usa ka kopya ang akong instruktor sa pagmaneho.
L. K., Alemanya
Ang inyong artikulo “Ang mga Biktima Miatubang sa mga Tagsala” nakapatulo sa akong mga luha. Maoy akong panghinaot nga dili moinom ug magmaneho ang mga tawo. Daghang kinabuhi ang ilang maluwas.
K.M., Tinipong Bansa