Mga Batan-on Nangutana . . .

Sa Unsang Paagi ang Kristohanong mga Tigom Makatabang Kanako?

“Sa akong hunahuna ang mga simbahan dili makatabang nimo sa pag-uswag sa espirituwal. Akong ipasabot, anaa ra sa tawo kon buot ba niyang mahimong espirituwal o dili.”​—19-anyos nga Kevin.

SI Kevin husto sa daghang bahin. Tinuod nga anaa ra sa matag tawo ang paghukom “kon kaha buot niyang mahimong espirituwal o dili.” Apan sanglit ikaw nagabasa niining artikuloha, lagmit nga ikaw labing menos buot mahimong espirituwal. Hinuon, basin ikaw wala makatino, kon unsa ang usa ka tawong espirituwal o kon sa unsang paagi ikaw mahimong espirituwal.

Sa yanong pinulongan, ang usa ka tawong espirituwal mao ang usa nga mopailalom sa iyang mga hunahuna, mga opinyon, ug mga aksiyon sa direksiyon sa Diyos nga Labing Gamhanan, si Jehova. Iyang gitagad ang iyang Maglalalang sa dihang magahimog matag-adlawng mga desisyon, magatukod ug mga tumong, o magabutang ug mga prioridad sa kinabuhi. Sa laing mga pulong, ang usa ka tawong espirituwal maoy mahiligon sa Diyos.

Ingong tin-edyer basin imong hikaplagan nga “ang kabalaka niining sistema sa mga butang” magapugong sa imong espirituwal nga pagtubo. (Mateo 13:22) Ang pagpakig-uban sa tibuok adlaw sa mga kasaring nga tingali ‘makiling sa pagbuhat ug daotan sa tanang panahon’ basin makapaluya usab. (Genesis 6:5) Ang uban tingali “magbiaybiay ug magasultig daotan,” nga makapalisod kanimo sa paghatag ug bug-os nga pagtagad sa kon unsay maayo. (Salmo 73:8) Ug kon ang imong mga ginikanan o ubang membro sa pamilya dili sama nimog pagtuo, basin sila mohatag ug diyutay, kon aduna man, ing espirituwal nga pagdasig. Unsay imong mahimo sa pagbuntog niining negatibong mga impluwensiya ug motubo sa espirituwal?

Usa ka butang imong mahimo mao ang pagtambong nga regular sa mga tigom sa Kingdom Hall sa mga Saksi ni Jehova. Lahi sa mga serbisyo sa simbahan, ang mga tigom dinha magadasig nimo sa pagtinguhag “diyosnong debosyon ingon nga imong tumong” ug motabang kanimo sa imong pagtubo gikan sa espirituwal nga pagkabata ngadto sa espirituwal nga pagkahamtong.​—1 Timoteo 4:7; Efeso 4:13, 14.

Mga Tigom nga Makatabang Nimo sa Pagkat-on

Sa kapig 63,000 ka kongregasyon sa tibuok nga yuta, ang mga Saksi ni Jehova nagasunod sa tambag sa Bibliya nga “tigoma ang mga tawo, ang mga lalaki ug ang mga babaye ug ang mga bata . . . aron sila makapatalinghog ug aron sila makakat-on.” (Deuteronomio 31:12) Busa imong hikaplagan ang daghang batan-on nga sama nimo taliwala sa mga Saksi.

Ang mga Saksi ni Jehova sa tibuok nga kalibotan nakig-ambit sa samang edukasyonal nga programa. Kini nalangkoban sa lima ka senemanang tigom, nga ang matag usa mga usa ka oras sa gidugayon. Ang lima ka tigom mao:

Miting Publiko​—usa ka diskurso sa Bibliya nga nagapasiugda sa usa ka tema sa Bibliya.

Pagtuon sa Bantayanang Torre​—usa ka lalom nga pagtuon sa mga pagtulon-an sa Bibliya nga gigamit ang magasing Bantayanang Torre, ang pangunang basahon sa mga Saksi ni Jehova.

Tunghaan sa Teokratikanhong Ministeryo​—nagatudlo ug mga kahanas sa pagsulti alang sa Kristohanong ministeryo.

Tigom sa Pag-alagad​—nagaapil sa mga paghisgot ug mga demonstrasyon sa epektibong mga paagi sa pagpanudlo diha sa ganghaan-sa-ganghaan ug pagtuon sa Bibliya nga ministeryo.

Pagtuon sa Basahon sa Kongregasyon​—pangutana-ug-tubag nga panaghisgot sa ginagmayng mga grupo nga magagamit ug usa ka tabang sa pagtuon sa Bibliya​—nga kasagaran diha sa pribadong mga balay.

Ang edukasyonal nga mga programa sa maong mga tigom makatabang nimo sa pagkakat-on “bisan sa laglom nga mga butang sa Diyos.” (1 Corinto 2:10; Proverbio 2:5) Bisan pa niana, adunay ubang mga benepisyo sa pagtambong.

“Maingon nga ang Puthaw Magapahait sa Puthaw”

“Sayon ang pagkahimong Kristohanon alirong sa uban nga nagaalagad usab sa Diyos,” nag-ingon ang 15-anyos nga Michelle. “Apan inig-adto nimo sa eskuylahan, mas lisod kini kay ang imong mga kauban sa eskuylahan dunay laing hugpong sa mga sukdanan ug mga tumong.” Busa, ang usa ka kaayohan sa pagtambong sa mga tigom mao ang higayon nga makauban sa isigkamagtutuo.

Ang manggialamong si Haring Solomon miingon: “Maingon nga ang puthaw magapahait sa puthaw, busa ang usa ka tawo magapahait sa salabotan sa lain.” (Proverbio 27:17, The New English Bible) Usahay, ang atong espirituwal nga “salabotan,” nga mao, ang atong espirituwal nga kahibalo ug panabot, kinahanglang bansayon. Maingon nga ang pagpahait sa usa ka literal nga kutsilyo nagkinahanglag kahanas ug tukmang mga galamiton, busa kinahanglan ka nga makig-uban sa tukmang mga tawo, kadtong may katakos sa “paghatag ug espirituwal nga gasa kanimo.”​—Roma 1:11.

Sa Kingdom Hall, imong hikaplagan ang maong mga tawo, nga iya sa lainlaing mga edad, mga rasa, ug mga nasyonalidad. Hisabtan, tingali ikaw makiling ngadto sa imong mga isigkaingon. Hinuon, tagda ilabina kadtong nakagugol ug daghang katuigan sa pag-alagad nga matinumanon kang Jehova. (Levitico 19:32) Ang kasinatian nila sa kinabuhi uban sa lalom nilang kahibalo sa Bibliya makatabang ug dako kanimo. Sa unsang paagi sila imong mailhan? Sulayi ang pagsukna nilag mga pangutana, sama sa, ‘Sa unsang paagi nakasulod ka sa kamatuoran?’ o, ‘Unsa ang paagi sa pagsangyaw sa kanataran sa dihang bata ka pa?’ Mahimong ipatungha gayod nila ang pila ka espirituwal nga gasa alang kanimo!

Tinuod, sa dihang moduol sa uban diha sa kongregasyon, basin sa sinugdan mobati ka sama sa 12-anyos nga si Craig, kinsa miingon: “Ako niadto mahadlok nga makigsulti sa mga tigulang. Naghunahuna ako nga kon may sayop nga akong isulti, ako tambagan.” Si Craig karon nahibalo nga ang iyang mga pagbati walay pasikaranan. “Relaks na akong makigsulti kanila karon,” siya mipatin-aw. Nganong dili susamang maningkamot nga makig-uban sa mga hamtong sa espirituwal diha sa kongregasyon? Ang pagbuhat niana magahatag nimog bililhon kaayong kahigayonan sa pagpaniid ug pagsundog sa hamtong nga mga Kristohanon.​—2 Tesalonica 3:9.

“Dila sa mga Tinudloan”

Ang laing bahin nga pauswagon mao ang imong mga katakos sa pagpanudlo. Pananglitan, makaarang ka ba sa pagpasa sa tin-aw sa mga kamatuoran sa Bibliya? Makahimo ka ba sa pagkuha sa pagtagad sa mamiminaw? Nahibalo ka ba kon unsaon pagbutang ug tinuod nga kahulogan sa imong pagbasa? Ang propeta nga si Isaias miingon: “Ang Soberano Ginoong Jehova naghatag kanako sa dila sa mga tinudloan.” (Isaias 50:4) Ug pinaagi sa pagbansay, ikaw usab makabaton sa dila sa mga tinudloan. Ang usa ka tigom ilabina ang makatabang nimo niining bahina: Ang Tunghaan sa Teokratikanhong Ministeryo. Nakaapil na ba ka nianang tunghaana?

Ang Tunghaan sa Teokratikanhong Ministeryo gilaraw sa pagtudlo sa mga Kristohanon sa pagpakigsulti sa uban. Kini walay limitasyon sa edad, ni usa ka kinahanglanon ang bawtismo. Hinuon, angay nga ikaw mahibalong mobasa ug mosulat, aktibong makig-uban sa kongregasyon, ug nagkinabuhi nga nahiuyon sa Kristohanong mga prinsipyo. Sa unsang paagi nagalihok ang maong tunghaan sa ministeryo?

Human sa pagpalista, ikaw itudlo nga mohatag ug mubong pakigpulong bahin sa usa ka tinong Kasulatanhong tema. Magkugi sa pag-andam sa imong pakigpulong. Pananglitan, ang dugang impormasyon bahin sa imong tema kasagarang hikaplagan pinaagi sa pagtuki sa mga basahon sa Bibliya nga gamiton ang Watch Tower Publications Indexes ug pagtuon sa ensiklopedia sa Bibliya nga Insight on the Scriptures.a Kon gikinahanglan nimo ang tabang niining bahina, hangyoa ang imong mga ginikanan o usa ka eksperyensiadong Kristohanon sa pagtabang kanimo. Ang pagtuki nga imong himoon dakog ikadugang sa imong pakigpulong ug makadasig sa imong pagtubo sa espirituwal.​—Proverbio 2:1-5.

Inigpahayag nimog usa ka pakigpulong atubangan sa kongregasyon, ang kuwalipikadong ministro nga nagadumala sa tunghaan mamatig maayo. Tapos sa imong pakigpulong, ihatag niya ang nahiangay nga pagdasig ug tambag nga gibase sa impormasyon nga hikaplagan diha sa Giya sa Tunghaan sa Teokratikanhong Ministeryo, usa ka basahon nga gidesinyo sa pagtabang sa publikong mga mamumulong. Pamatii pag-ayo ang maong tambag. Dili tuyo niini ang pagsaway o pagpakaulaw kanimo. Ang mga sugyot nga ihatag maoy aron sa pagtabang nimo. Kon ikaw “magpadayon sa pagkugi sa pagbasa sa dayag,” ang imong pag-uswag sa espirituwal “madayag sa tanan nga tawo.”​—1 Timoteo 4:13-15.

‘Dayega si Jehova Pinaagi sa Imong mga Ngabil’

Ang laing paagi sa pagtubo sa espirituwal panahon sa Kristohanong mga tigom mao ang pagboluntaryo sa mga tubag o mga komento sa dihang pangayoon ang pag-apil sa mamiminaw. Ang abanteng pangandam mao ang yawi.b Apan tingali malisdan ka sa pagkomento bisan pag ikaw andam alang sa tigom. Sa maong mga kahimtang, pangayog tabang gikan kang Jehova. Si Haring David miampo: “Oh Jehova, hinaot nga buksan nimo kining akong mga ngabil, aron ang akong baba mismo makapahayag sa imong pagdayeg.”​—Salmo 51:15.

Hinumdomi: Ang tubag dili kinahanglang taas o komplikado aron makapalig-on. Sumala sa giingon sa 12-anyos nga Rachel: “Inay sa paghatag ug taas kaayong komento, ang pagkomento mahimong usa ra ka tudling-pulong.” Sa sinugdan, ang pagkomento panahon sa mga tigom basin lisod, ug basin mangayo kag tabang apan, sa nahaigong panahon, mobati ka sama kang Rachel. Siya mipatin-aw: “Inighatag nimog komento sa imong kaugalingon, kana imo gayod, ug ikaw magmagarbohon niana.” Dugang pa, ikaw motubo sa espirituwal ingong sangpotanan sa imong mga paningkamot.

Dili sayon nga mahimong mahunahunaon sa espirituwal sa mahunahunaon-sa-kaugalingon nga kalibotan karon. Apan kon regular kang motambong sa mga tigom, mag-andam sa bug-os, makig-ambit, ug maningkamot nga makig-uban sa mga hamtong, ang Kristohanong mga tigom magatabang gayod kanimo nga motubo sa espirituwal.

[Mga footnote]

[Mga hulagway sa panid 21]

Ang Tunghaan sa Teokratikanhong Ministeryo nakabansayg linibong batan-on nga mahimong hanas nga mga magtutudlo sa Pulong sa Diyos