Sa Dihang ang Pasad Dili na Magamhan
TAN-AWA ang palibot sa imong balay. Gihuotan ka ba tungod sa pasad? Maulaw ka ba kon mosil-ing ang usa ka higala sa sulod sa butangan nimog sinina o kloset? Maglisod ka ba sa pagpangita sa usa ka tinong butang kay nalubong kana sa tumpok sa natigom nga mga butang? Kon mao, ikaw wala mag-inusara.
“Ako ilado kaayo nga ‘tigtigom,’” misugid si Ralph. Si Leon midugang: “Ako nalunod sa mga sinina, mga mantalaan, mga libro nga akong natigom latas sa 15 anyos.” “Ang paghunahuna lang bahin sa paglimpiyo makapakapoy na nako sa dili pa ako mosugod,” mimulo ang laing biktima sa pasad.
Ang pila ka bata nagtubo sa palibot nga nagpasad ang mga butang. Matud sa usa sa maong tawo: “Sumala sa akong mahinumdoman, ako sigeng magpasidaan sa mga tawo kon unsay dahomon sa unang panahon nga sila moanha sa among balay. Sultihan ko sila nga OK ang pagbalhin sa usa ka butang aron sila may lugar nga kalingkoran.” Bisan ang mga hamtong tingali magpanuko nga may dapiton nga gawas sa pamilya sa pagduaw tungod kay ang balay dili presentable.
Kasagaran ang mga tawo dili makaamgo unsa ka daghan ang ilang natigom hangtod nga atubangon sa pagbalhin. Kon ang usa wala magbatog regular nga programa sa pagsanta sa pasad, ang pagbalhin labi pang makahurot ug panahon—ug gastoso.
Apan alang sa daghan, ang paghipos sa pasad dili ra kay basta paglabay sa mga butang. Ang ubay-ubayng kababagan kinahanglan unang buntogon.
Nganong Dili Sila Yanong Makalabay Niana?
Sa dugaydugayng panahon, ang sikologong si Lynda W. Warren ug klinikal social worker nga si Jonnae C. Ostrom nagtuo nga ang tanang tigpasad maoy mga tawong tigulang, kinsa nakalabang sa Depresyon sa katuigang 1930. Ang pagtigom, sila naghunahuna, “maoy talagsaon ug dili-makadaot nga dili-kasagarang kinaiya.” Ugaling, human sa pagtuon sa butang, sila mitaho: “Natingala kami sa pagdiskobre sa batan-ong kaliwatan sa mga tigtigom, nga nangatawo dugay na human sa katuigang 1930. . . . Karon kami nagtuo nga ang maong gawi maoy kasagaran ug nga, ilabina kon kini hingapin, kini basin magmugnag mga suliran alang sa mga tigtigom o niadtong suod kanila.”
Mahimong unsa kini ka hingapin? “Si Ostrom nakakita nga nabungkag ang mga kaminyoon tungod sa pasad,” mitaho ang magasing Health. Ang pila ka tawo modangop sa propesyonal nga mga magtatambag alang sa tabang. Sa pagkamatuod, ang magasing Health nagtawag sa panambag bahin sa personal nga organisasyon nga “mausbawon nga natad kansang mga praktisyoner tingali maningil abot sa $1,000 [U.S.] sa usa ka adlaw sa pagbuhat kon unsay kanunay giyawyaw sa atong mga inahan nga atong buhaton: paglimpiyo sa atong mga kuwarto.”
Lagmit wala ka makabaton sa suliran sa pasad nga ingon ka hingapin. Bisan pa niana, basin malisdan ka sa pagbuntog sa mosunod upat ka babag nga nagpatunga sa mga butang naisyu ug sa basurahan:
◻ Posibleng panginahanglan sa umaabot. (“Maayo pag tagoan kini kay sa magmahay sa ulahi.”)
◻ Sentimental nga pagmahal. (“Gihatag kini kanako ni Tiya Mary.”)
◻ Natagong bili. (“Basin may panahon nga kini momahal.”)
◻ Wala madaan o madaot. (“Maayo ra kaayo ni aron ilabay.”)
Ang sangpotanan? Ang Psychology Today nag-ingon: “Ang mga butang magpadayon sa pagkatigom, ug mao usab ang mga sulirang ipatungha niini.”
Busa sa unsang paagi imong mapugngan ang pasad?
Kon Diin Mosugod
Sa gisukna sa paghanduraw kon unsay iyang bation kon mohapak ang bagyo ug gub-on ang tanang butang gawas sa pipila, usa ka babaye miingon: “Ang labaw kong gibati sa ideya nga mawad-an sa tanang butang mao ang kahupayan—kay nahigawas sa akong pasad nga wala ang kabalaka sa pagpihig ug pagbuhi sa mga butang.” Kini nagailustrar gayod nga ang pagpihig ug paglabay mahimong usa ka hagit.
“Ang mga tigpasad dunay duha ka problema,” matud sa konsultant si Daralee Schulman. “Ang mga butang nga anaa na sa balay ug ang mga butang nga moabot.” Inay sa bug-os nga paglimpiyo, misugyot siya sa paggugol bisan ug 15 minutos lamang sa usa ka adlaw sa pag-organisar sa usa ka dapit sa usa ka panahon. Kini labi pang epektibong paagi sa pagsagubang sa pasad sulod sa inyong balay. Apan komosta “ang mga butang nga moabot”?
Sa dili pa mopalit sa bisan unsang butang alang sa inyong balay, suknaa ang imong kaugalingon: ‘Gikinahanglan ba gayod nimo kini? Diin ba nako kini ibutang? Gamiton ba nako kini?’ Si Daralee Schulman miangkon nga pinaagi sa pagsukna sa maong mga pangutana, “75 porsiento sa mga butang nga imong dad-on sa balay, dili nimo dad-on.”
Sa hedkuwarter ug mga sangang-buhatan sa Watch Tower Society, ang mga nagpuyo gidahom nga mahigawas sa pasad ang ilang mga kuwarto ug ilimite ang gidaghanon sa mga dekorasyon diha sa matag muwebles o matag estante sa duha o tulo lamang. Makapayano kini sa paglimpiyo ug madanihon pa sa mata. Ang mga mantalaan, mga magasin, mga libro, mga sudlanan ug libro, mga tulonggon, mga galamiton sa dula, sinina, mga plato, ug ubang butang angay dili ipasad. Ngani, walay bisan unsa ang ibutang sa salog sa kuwarto gawas kon kana muwebles. Kini tinong usa ka sulundan alang ni bisan kinsa nga buot mougmad sa palibot nga walay pasad.
Dili Makita—Ug Anaa sa Butangan sa Sinina
“Sa kadiyut ra, akong mahipos ang akong apartment,” matud ni Joan, “apan ang mga butangan sa sinina kanunay nga usa ka katalagman.” Ang pipila nagagamit sa kloset o butangan sa sinina nga labayanan, nga yanong magbalhin sa napasad nga mga butang ngadto sa usa ka dapit diin kini dili makita. Ang suliran mograbe samtang ang dugang ug dugang ibutang sa luna nga nagpabiling sama rag gidak-on.
Ang imo bang butangan sa sinina kinahanglang haw-asan sa natigom nga mga butang? Ang magasing Good Housekeeping nagsugyot: “Ang closet-organizer nga mga sistema mabatonan sa nagkadaiyang materyales ug ang mga sangkap ikapasibo aron mohaom sa bisan unsang luna. Paggamit ug usa niana aron sa pagsulbad sa krisis sa pondohanan diha sa inyong balay.” Busa ayaw himoa ang butangan sa sinina nga imong dangpanan sa biya. Batoni kanang hapsay ug organisado.
Usa ka Timbang nga Pag-isip sa mga Butang
“Ang akong mga butang maoy sumbalik-silaw nako, sila bahin kon unsa ako,” matud sa usa ka babaye. “Ang akong alahas makapalipay kaayo nako,” midugang ang lain. “Gimahal ko gayod ang akong mga singsing ug mga kulentas.” Ang lain pang babaye masukihong miingon: “Kini mao ako—kini ang akong pagkamao ug dili mahimong ilabay nimo kini!”
Sa katugbang, si Jesu-Kristo mipahayag: “Ang kinabuhi sa usa ka tawo dili mapiho tungod sa iyang gipanag-iya, bisan pag nabatonan niya ang labaw pa kay sa iyang gikinahanglan.”—Lucas 12:15, The Jerusalem Bible.
Busa ang Bibliya nagadasig sa timbang nga pag-isip sa mga kabtangan sa usa. Nagpasiugda usab kini sa kahapsay, nga naghimo niini nga usa ka kinahanglanon alang niadtong nagaalagad ingong mga ansiano diha sa kongregasyon.—1 Timoteo 3:2.
Nganong dili mosugod sa pagpadapat sa pipila sa mga sugyot sa ibabaw ngadto sa usa ka luna diha sa inyong balay nga nahuot? Pinaagi sa matag-adlaw nga paningkamot ug timbang nga pag-isip sa imong mga butang, ang pasad masumpo.
[Kahon/Hulagway sa panid 22, 23]
Pagpihig ug Paglabay
Ang mosunod maoy pipila ka makatabang nga sugyot bahin sa ispisipikong mga butang nga daling makapagubot sa imong balay kon dili ka mag-amping.
Mga balasahon: Malisdan ka ba sa paglabay sa daang mga magasin o mantalaan? Ang usa ba ka ulohan daling makadani sa imong mata, nga magpahinabo nga ikaw moingon sa imong kaugalingon: ‘May adlaw nga basahon ko ra kini’? Inay sa pagtago sa tibuok magasin o mantalaan, guntinga ang artikulo nga makaikag tan-awon ug ibutang kini sa “Pagabasahon” nga folder. Kon dili kini mabasa sulod sa igoigong panahon—tingali sa pila ka semana—ilabay kana.
Sinina: Ang imo bang mga sinina nagkadaghan ug nagkadaghan kada tuig, apan dili nimo isul-ob ang katunga sa mga sinina nga imong nabatonan? Ang pipila nagasulti sa ilang kaugalingon: “Maangayan ra ako niini—sa dihang mawad-an akog pulo ka libras.” Kini mahimong lisensiya sa paghawid sa bisan unsa ug sa tanang butang diha sa butangan sa sinina. Sa pagpugong sa maong kagubot sa sinina, kon may dili masul-ob sa tibuok tuig, ibutang kana sa “Dili Mahukman” nga kahon. Dayon, kon dili pa masul-ob tapos sa hamubong yugto sa panahon, ipanghatag o ilabay kana.
Sulat: Pihiga ang mga sulat sa kada adlaw. Ang personal nga mga sulat ug ubang sulat nga buot nimong tagoan angay ipayl sa usa ka tinong dapit. Mahimong magbaton kag folder alang sa payl kada bulan ug ilabay ang mga sulod niana tapos sa usa ka tuig aron mahatagag lugar ang sulat sa bag-ong bulan. Ang prinsipyo mao ihapnig, ayaw itapok. Kon daghang sulat sa anunsiyo ang imong madawat, hukmi dayon kon imo bang kinahanglanon kana. Kon dili, ilabay kana. Kon dili makahukom, ibutang kana sa “Dili Makahukom” nga kahon sulod sa usa ka semana. Kon dili pa gamiton sa maong panahon, ilabay kana.