Gikan sa Among mga Magbabasa
Pagkaupaw Dugay na akong nagpaabot sa artikulong “Alopecia—Pagkinabuhing Mahilomon Uban sa Pagkaupaw.” (Abril 22, 1991) Ako nag-antos sa alopecia universalis sa daghang tuig, ug nakigkita akog daghang doktor nga walay dayag nga resulta. Gisulayan ko ang pagkat-on ug dugang bahin sa alopecia apan diyutay ra ang kalamposan. Ang artikulo nakatabang nako sa pagdawat sa akong kahimtang uban sa kamalinawon, nga magpaabot sa panahon sa dihang walay moingon: “Ako masakiton.”—Isaias 33:24.
R. C., Italya
Mga Naytklab Ang artikulong “Mga Batan-on Nangutana . . . Unsay Ikasulti sa mga Naytklab?” (Pebrero 8, 1991) nahiangay gayod kanako. Ang akong kinabuhi misugod sa pagkaus-os tapos sa akong pagsugod sa pag-adto sa naytklab sa edad 15. Sa sinugdan kadto kalingawan nga dili makadaot. Nakigsayaw ako sa mga higala sa tunghaan. Ang dili-alkoholikong mga ilimnon gidalit sa soda bar. Ang akong Kristohanong mga ginikanan wala masayod nga ako miadto—ako sekretong mokatkat sa bentana aron mogawas aron “moadto sa naytklab.” Aw, ang “dili-makadaot” nga pagsayaw mitultol sa pag-inom, dayon ngadto sa mga droga, ug dayon sa homoseksuwalidad. Sa kataposan gibira ko ang akong kaugalingon pagawas sa kalibotan sa naytklab, apan karon ginabayran ko ang balos sa pagkinabuhig dobleng kinabuhi. Buot ko lang ipaambit ang akong kasinatian sa paglaom nga basin may usa nga karon maghunahunag kaduha mahitungod sa mga naytklab.
L. E., Tinipong Bansa
Rap o Rock? Nalipay ako nga inyong namatikdan ang suliran sa kalaw-ayan diha sa popular nga musika diha sa inyong artikulong “Kalaw-ayan Gibuhatan ug Musika.” (Marso 8, 1991) Ugaling, kamo nasayop sa dihang inyong giklasipikar ang grupong “2 Live Crew” ingong usa ka grupong rock. Sa pagkatinuod, sila usa ka rap nga grupo, nga nagayamyam, inay nagaawit, sa mga pulong.
D. L., Tinipong Bansa
Salamat sa katin-awan. Hinuon, ang pipila mag-isip sa rap nga lain lang nga dagway sa musikang rock. Kon mao man ugaling, ang mga Kristohanon kinahanglang magmapilion sa ilang pinalabing musika, bisan kon unsang ngalan ang ihatag niana.—ED.
Mga Pag-estar sa Ospital Salamat kaninyo tungod sa pinamubo, maayong impormasyon diha sa seryeng “Mga Ospital—Sa Unsang Paagi Makasagubang Ka?” (Marso 8, 1991) Buot kong idugang nga sa kahimtang nga dili emerhensiya, tapos mahimo ang tukmang pagrekonosir, angay mahibaloan nimo ang labing daghan bahin sa imong sakit ug mga tambal niana. Pinaagi lamang sa pagbaton ug dakong kasayoran nga ikaw makahimog maayong mga desisyon. Ang lokal nga librarya o ang librarya sa ospital kasagarang dunay mapuslanong impormasyon.
E. D., Tinipong Bansa
Narcolepsy Ako nagasulat sa pagpahayag sa akong apresasyon tungod sa artikulong “Narcolepsy—Ang Sakit sa Katulog.” (Abril 8, 1991) Wala kamoy ideya kon unsay kahulogan kanako sa pagkakita nga kining sakita giila sa usa ka internasyonal nga magasin! Ako gitakboyan sa narcolepsy sa edad 15, ug sa gihapon nabatonan ko kini sa edad 77!
M. S., Inglaterra
Ako nakaangay gayod sa katukma sa pagpatin-aw sa magsusulat ug sa simpatiya nga uban niana gihisgotan niya ang ulohan. Maayo untag kita makasalig sa tanang magasin sa pagsagop sa maong paagi sa paghisgot. Kamo nagmaluluton ngadto sa mga masakiton niana, ilabina kadtong kulang ug pagsabot sa ilang sakit.
P. J. H. S., Honorary Secretary, Narcolepsy Association [U.K.]
Pagkabuta sa Kolor Sa dugay nang panahon, ako nagpaabot sa usa ka artikulo sama nianang nag-ulohang “Pagkabuta sa Kolor—Katingad-anang Depekto.” (Pebrero 22, 1991) Ingong nagaantos sa pagkabuta sa kolor, ako nagpahinabo kanunay sa katawa ug katingala sa dihang moingon ako nga ang akong dugo berde o nga ang balangaw duha rag kolor. Apan salamat sa inyong artikulo, ako mas masabtan pa. Ako masaligon kang Jehova nga sa usa ka adlaw ako makakita na sa balangaw diha sa tanang kolor niini.
I. F. O., Brazil