Gikan sa Among mga Magbabasa
Pagsamok sa Eskuylahan Ang artikulong “Mga Batan-on Nangutana . . . Unsay Akong Himoon nga Dili Niya Ako Hilabtan?” (Mayo 22, 1991) talagsaon ug kahan-ayan sa mga pulong. Sa nag-eskuyla pa ako, ang mga klasmet kanunay nagpit-os kanako bahin sa pakigdeyt. Sa nakita nila nga dili ako mokompromiso, mihunong sila sa pagsamok kanako. Sa pagkakaron ako wala na mag-eskuyla ug nagtrabaho na. Mga usa ka bulan nga miagi, ang usa ka edarang lalaki (37 anyos) sa trabahoan miduol nako ug giingnan ako nga ako maanyag ug buot niya nga makaila kanako. Ako 18 anyos. Ako naamang sa makadiyut. Apan unya akong gisaysay nga ako nagtuon nga mahimong usa sa mga Saksi ni Jehova ug nakapahimutang ug pila ka basahon kaniya. Gidawat usab niya ang akong pagsalikway sa iyang pangamoral.
M. L., Tinipong Bansa
Paglaba sa Sinina Nagsulat ako sa pagpahayag sa akong apresasyon sa artikulong “Mao Kini ang Paagi sa Paglaba sa Among Sinina . . . ” (Enero 22, 1991) Kay ako usa ka espesyal payunir [bug-os-panahong magwawali] nga nag-alagad sa usa ka banika, kinahanglan nga labhan nako ang akong mga sinina pinaagi sa kamot. Sa pagkabasa sa inyong artikulo, wala akoy nakitang katarongan sa pagkasina niadtong may awtomatikong mga makinang panglaba.
M. M., Dominican Republic
World Cup Soccer Sa pagkabasa sa inyong taho bahin sa kampeonato sa World Cup Soccer (Mayo 8, 1991), dili ako makauyon sa inyong dili-maayong paghulagway sa maong dula. Ang nabalaka nga mga inahan basin mosulay sa pagpugong sa ilang mga anak lalaki sa pagdulag sakir tungod sa pagkabasa bahin sa kabangisan diha sa mga estadyum sa dula.
S. B., Alemanya
Wala namo ihatag ang dili-maayong hulagway sa dula mismo, ni gipaluya ang mga batan-on sa pagpahimulos sa dula sa timbang nga paagi. Gitaho lamang namo ang ‘dili-maayong hulagway’ nga gibatbat sa media sa pagbinagis sa pipila sa mga magdadayeg sa maong dula. Ang mga Kristohanon maalamon nga mag-amping bahin sa pagtan-aw sa usa ka dula diin adunay dakong posibilidad sa kabangisan.—ED.
Among Misyon Maoy Paghikog Ang kasinatian ni Yoshimi Aono (Enero 22, 1991) daw gisulat gayod alang sa akong amahan. Sama kang Yoshimi Aono, ang akong amahan nagsakay sa usa ka submarino panahon sa gubat. Nakita niya ang pagkamatay sa ubay-ubay nga membro sa Kaiten Special Attack Corps. Ang iyang kasinatian sa gubat nagpatuo kaniya nga wala maglungtad ang Diyos o si Buddha. Sukad mahimong usa sa mga Saksi ni Jehova, naglaom ako sa usa ka higayon sa pagsugilon sa akong amahan bahin sa gugma sa Diyos. Ang artikulo nagtubag sa akong pag-ampo. Ipadala ko dayon kini kaniya.
A. S., Hapon
Format sa “Pagmata!” Buot kong ipahayag ang akong apresasyon alang sa matahom nga bag-ong format alang sa Pagmata! nga nagsugod sa Enero 8, 1991, nga isyu. Sanglit ako nagtrabaho sa departamento sa teknikal nga mga publikasyon, namatikdan ko dayon ang kausaban sa layout, fonts, ug mga kolor. Akong gibantayan sulod sa 20 anyos sa unsang paagi kining magasina nagbag-o duyog sa mga panahon aron mahimong mas buloknon ug madanihong galamiton sa pagpasuod sa katawhan kang Jehova. Ako nakapahimutang ug usa ka isyu uban sa usa ka kauban sa trabaho pinasukad lamang sa maong matahom nga bag-ong kausaban!
D. A., Tinipong Bansa
Mga Artikulo Bahin sa Hayop Kinasingkasing nga mga pasalamat alang sa mga artikulo bahin sa kahayopan ug sa kinaiyahan. Sa sinugdan wala kaayo ako magtagad sa maong mga artikulo, bisan pag akong namatikdan sa kanunay nga ang mga letrato maoy matahom ug buloknon. Usa ka adlaw may mihisgot sa usa ka artikulo nga iyang nabasa bahin sa usa ka antelope nga gitawag kudu. (Pebrero 22, 1991) Kadto nakapukaw sa akong interes sa pagbasa sa artikulo. Misugod usab ako sa pagbasag ubang mga artikulo, sama sa usa bahin sa mongoose. (Marso 8, 1991) Kining mga artikuloha nakatabang nako sa “pagkakita” kang Jehova pinaagi sa iyang mga linalang.
B. T., Tinipong Bansa