Baldado nga Nahimong Aktibong Magdadayeg sa Diyos

DUHA ka Saksi ni Jehova nga nakig-ambit sa balay-balay nga pagsangyaw niadtong Pebrero 1984 nakigsulti sa usa ka babaye sa balangay sa Corcovada, Añasco, Puerto Rico. Nakadungog silag kasikas gikan sa sulod ug gisukna ang babaye kon may nagsakit ba.

“Oo,” siya mitubag, “ang akong bana. Siya nagsakit sulod na sa 14 anyos ug dili gayod mogawas sa kuwarto gawas lang aron maligo ug mokaon.”

Nangutana ang duha ka Saksi kon mahimo ba silang makigsulti sa bana. Miingon ang asawa nga dili niya gustong makigsulti kang bisan kinsa, apan kon buot sa mga Saksi nga mosulod, sila makasulod.

“Misulod kami sa kuwarto,” mipatin-aw ang usa sa mga Saksi, “ug nakit-an ang lalaki nga naghigda. Sa pagkakita sa iyang kahimtang, giabot kamig kaluoy kaniya. Luya kaayo siya nga nangurog siya. Gisuginlan namo siya mahitungod sa Gingharian sa Diyos ug sa paglaom nga mabuhi sa usa ka kalibotan nga walay sakit o bisan kamatayon. Midaligdig ang mga luha sa iyang aping. Gisukna nako siya kon buot ba niyang mopuyo sa maong bag-ong kalibotan diin walay mausa ang magkasakit.”​—Pinadayag 21:3, 4.

“Oo,” mitubag siya. “Mitanyag kami sa pagbalik ug pagtuon sa Bibliya uban kaniya. Nga may pag-uyon niya mibalik kami, ug gihimo ang pagtuon samtang siya naghigda.

“Tapos sa pila ka pagduaw, gisugyot nako nga molingkod siya sa katre aron mas sayonan siya sa pagtuon. Nanlimbasog siya, bisan pag sa sinugdan makalingkod lang siyag kadiyut kay siya malipong. Tapos sa pila pa ka pagtuon, samtang nagkalig-on siya, gisugyot nako nga himoon namo ang pagtuon sa sala. Misugot siya, ug matag semana gitabangan namo siya sa paglakaw paingon didto.

“Ang maong tawo nakahimog maayong pag-uswag sa iyang mga pagtuon, bisan pag siya lugos makakita ug nangurog pag-ayo ang iyang mga kamot nga lisod nga makuptan niya ang usa ka lente. Gisultihan niya kami nga sa 14 anyos nga siya nagkasakit, siya wala makaduaw ug doktor kay siya dili man makagawas sa balay. Busa gihimo namo ang kahikayan sa pagdala niya ngadto sa usa ka doktor.

“Malamposon nga nahimo ang operasyon sa iyang mga mata, ug sa taodtaod siya nagbasa nag Bibliya nga wala ang tabang sa lente. Ang iyang mga kamot wala na gani mangurog. Gisugdan niya sa regular ang paglakatlakat diha sa balay, ug sa kadugayan siya moadto lang sa higdaan aron matulog sa magabii. Sa taodtaod siya misugod sa pagtambong sa among Kristohanong mga tigom sa Kingdom Hall.

“Sa nahaigong panahon ang gugma sa kanhi baldado alang kang Jehova nga Diyos ug sa Iyang mga saad nagtukmod niya sa pagpakigsulti sa uban mahitungod sa mga butang nga iyang nakat-onan. Sa wala madugay, mikuyog siya namo sa balay-balay nga pagsangyaw, nga nakapatingala kaayo sa iyang mga silingan ug mga higala. Dako kaayog kauswagan ang iyang panglawas nga misugod na gani siya sa pagtrabaho sa iyang uma.”

Niadtong Nobyembre 1988 kining kasinatiana giasoy sa usa ka sirkitong asembliya sa mga Saksi ni Jehova, ug ang tawo, si Pedro Martínez, mipakita sa entablado. Sa kataposan, niadtong Nobyembre 1989, gipasimbolohan niya ang iyang pahinungod kang Jehova pinaagi sa bawtismo sa tubig.