Ang Hunahuna sa Bibliya

Ang Diyos ba Usa ka Misteryo?

“Unsa ang misteryo? Sa kasagaran nga pagkasulti, ang misteryo maoy usa ka kamatuoran nga kinaiyanhong imposible nga masabtan o mapamatud-an. . . . Unsa ang relihiyosong misteryo? Kini usa ka kamatuoran sa Diyos nga kita obligado sa pagtuo, bisan tuod kita dili makasabot ni makapamatuod niana. Unsa ang pangunang relihiyosong mga misteryo? Kini ang mga misteryo sa Santisima Trinidad, ang Pagpakatawo sa Diyos, ug ang Pagtubos.”​—Abrégé de l’exposition de la doctrine chrétienne, 1901 (Laktod nga Pahayag sa Kristiyanong Doktrina)

MAO kana ang pagsumada sa usa ka libro nga gisulat sa sinugdanan sa ika-20ng siglo bahin sa panlantaw sa Romano Katolikong Simbahan mahitungod sa mga misteryo. Dugang pa, ang bag-ohay pang napatik nga Guide des difficultés de la foi catholique (Giya sa Mga Kakulian sa Katolikong Pagtuo, 1989) nagpakita nga ang maong mga doktrinal nga punto sa gihapon makaiikag pinaagi sa pag-ingon: “Dili tungod sa personal nga pagkadani alang sa hanap nga mga kamatuoran nga gidawat sa Kristohanon ang paglungtad sa tinong gidaghanon sa mga misteryo diha sa iyang relihiyosong Kredo. Kon siya nagatuo kanila, kini sa bug-os pinasikad sa Pulong sa Diyos.” Apan unsa ang ginasulti sa “Pulong sa Diyos”? Ang Diyos ba usa ka misteryo?

Masayran ba Nato ang Tanan Mahitungod sa Diyos?

Ang Bibliya nagahatag kanato ug daghang detalye mahitungod sa Diyos ingong usa ka Persona, mahitungod sa iyang mga hiyas ug kon sa unsang paagi siya nakiglabot sa katawhan. Apan kini usab nagasaysay nga ang iyang kaalam ug intelihensiya maoy dili matugkad sa tawhanong pagsabot. Mao nga, ang propetang si Isaias nagsulti nga ang mga dalan ug hunahuna sa Diyos labi pang hataas kaysa iyaha sa tawo.​—Isaias 55:8, 9.

Ang kawalay kalagmitan sa pagkahibalo sa tanang butang mahitungod sa Diyos dili angay makapatingala kanato. Pananglitan, bisan tuod ang atong kahibalo sa uniberso maoy padayong nagausbaw, ang mga siyentipiko nagaangkon nga sila malagmit dili gayod sa tinuod makatugkad sa mga misteryo sa walay kataposang kinagamyan ug walay kataposang kinadak-an. Busa sa unsang paagi kaha ang bisan kinsang linalang sa pagkahibalo sa bug-os sa kalalom sa kaalam sa Diyos, kinsa mao ang Maglalalang? Si Job misugid kang Jehova: “Ako wala makasabot sa mga butang hilabihang nakapahibulong kanako, nga wala nako mahibaloi.” (Job 42:3; itandi ang Roma 11:33.) Busa, ang bug-os nga kahibalo sa Diyos mao, sa pipila ka bahin, dili matugkad sa atong limitadong salabotan. Ugaling, ang mga doktrina sa daghang mga simbahan milapas sa kinutoban niining yanong obserbasyon.

Labawng Misteryoso Kaysa Gikinahanglan?

Ang bag-o pang gipatik nga Katolikong ensiklopediang Théo nag-ingon: “Sa mga pagtulon-an sa simbahan, ang terminong misteryo mapadapat usab sa kon unsay gipadayag sa Diyos mahitungod sa iyang kaugalingon, pananglitan, may kalabotan sa iyang trinitaryang paglungtad.” Sama sa daghan ubang teolohikong mga libro, ang ideyang masabot nga naugmad dinhi mao nga ‘sanglit ang kahibalo sa Diyos dili malikayang misteryoso, kini dili makapatingala kanato nga ang Diyos usa ka Trinidad ug nga kining Trinidara usa ka misteryo.’ Ang maong pangatarongan may maayo bang pasikaranan?

Una, daghang mga libro nagaila, maingon sa The New Encyclopædia Britannica, nga ‘ni ang pulong Trinidad, ni ang dayag nga doktrina niana, makita diha sa Bag-ong Testamento.” Dugang pa, ang kasaysayan niining doktrinaha nagapakita nga kini nagtingob sa daghang mga ideya nga gikuha gikan sa paganong mga pilosopiya nga gihiusa ngadto sa mga kredo sa simbahan pila ka mga dekada human sa kamatayon sa mga apostoles. Busa, walay lig-ong pamatuod nga ang misteryo sa Trinidad pinasikad sa Bibliya.a

Hunahunaa kini: Sanglit imposible ang pagkahibalo sa tanan mahitungod sa Diyos, makaayo ba alang ni Jehova sa paglibog sa iyang kaugalingong pagkamao? Dili, buot niya nga ang tanang tawo makaila kaniya. (Juan 17:3; itandi ang Hebreohanon 8:11.) Ug may kaayohan ba alang nila kinsa sa pagkatinuod gustong makapahimuot kaniya sa paglibog sa iyang pagkamao? Sa pag-ilustrar: Kon ang kahigayonan lamang sa usa sa pagtan-aw sa pipila ka maayong talan-awon sa banikanhan maoy pinaagi sa bintana, maalamon ba nga ang alisngaw sa bildo sa bintana dili trapohan, ug mag-ingon: ‘Maayo rang pasagdahan ang alisngaw tungod kay dili man nato makita ang mga detalye?’ Sa pagkatinuod dili! Ang Bibliya ug maayong pagsabot nagpakita nga ang atong kahibalo sa Diyos kinahanglanong limitado. Apan kining mga kinutoban dili gayod magpakamatarong sa pag-ilis sa atong kahibalo sa Diyos ug usa ka misteryosong doktrina, sama sa Trinidad, nga nagasilbi lamang sa paglibog sa atong salabotan kaniya.

Mga Misteryo​—Pagano ug Kristiyano

Dugang pa, sa dihang ang terminong “misteryo” makita diha sa Kasulatan, kini walay kahulogan sa “tinagong kahibalo,” ingon sa kini sagad gisabot. Sama sa hustong pagpahinumdom kanato sa Théo: “Ang pulong misteryo walay samang kahulogan dinhi. Alang sa mga Kristohanon kini nagpasabot ug pila ka butang nga sa normal natago o dili mabatonan, apan ang Diyos buot nga mosaysay kanila . . . ug mahimong ilang masinatian.”

Ang Gregong pulong my·steʹri·on (“misteryo,” o “sagradong tinago”) gigamit ug 20 ka beses ni apostol Pablo diha sa partikular nga kahulogan. Siya naggamit niana sa pagpasabot sa usa ka sagradong tinago nga dugay nang natago apan ang Diyos nagpadayag sa dihang Iyang gipadala si Jesus sa yuta. Si Jesu-Kristo, ang Manluluwas sa katawhan, mao ang elemento sa gisaad nga “binhi” nga gamiton sa Diyos sa paglukat sa katawhan, ang Usa ‘pinaagi kang kinsa ang tanang mga kanasoran sa yuta mapanalanginan’ ug kinsa makabaton ug isigkamanununod sa mga langit. (Genesis 3:15, 22:18; Roma 8:17) Kining natago, o misteryoso, nga mga kamatuoran natago sa una-Kristohanong mga alagad sa Diyos apan gipadayag ni Jehova sa hustong panahon. (Efeso 1:9; Colosas 1:26) Makalilipay, kining kahibaloa wala gitagana alang lamang sa diyutay nga pinili​—ingon sa kaso sa relihiyosong mga misteryo sa pila ka mga relihiyon​—apan igamantala ngadto sa daghang tawo kutob sa posible nga walay pagpihig​—Efeso 6:19, 20.

Pagsimba sa Diyos Diha sa Kamatuoran

Ang Bibliya naundan sa igong impormasyon alang kanato sa pagsimba sa Diyos sa paagi nga dalawaton kaniya. Halayo gikan sa pagtudlo ug usa ka Trinidad, kini sa tin-aw gayod nagpadayag sa pagkalabaw ni Jehova ug sa pagkaubos sa kaakohan ni Jesus. Pananglitan, si Jesus nag-ingon: “Ang Amahan labaw kanako.” (Juan 14:28; 1 Corinto 15:28) Ang Bibliya usab nagatudlo nga ang balaang espiritu maoy aktibong gahom sa Diyos, nga nagatultol sa iyang matinumanong mga alagad.​—Buhat 2:1-4.

Sa dihang nakigsulti sa Samaritanhong babaye, si Jesus nagpakita nga aron makapahimuot ang usa sa Diyos, siya kinahanglan nga mosimba Kaniya “sa espiritu ug kamatuoran.” Siya nagdugang nga “ang Amahan nagapangita sa susama nga managsimba kaniya.” (Juan 4:21-24) Anaa ra kana sa matag usa kanato sa pagpangita ning tukmang kahibalo nga modala kanato ug mga panalangin kon kita mosalig sa Pulong sa Diyos inay modawat sa hinimog-tawo, misteryosong mga tradisyon nga nagaluib niana.

[Footnote]

[Picture Credit Line sa panid 26]

All rights reserved