Kon sa Unsang Paagi ang Kahoyng Quiver Nakabaton sa Ngalan Niini
DAGHANG biyahedor diha sa uga nga kamingawan sa mga rehiyon sa habagatang Aprika ang nakadayeg dihang makakitag kahoyng quiver. “Uban sa iyang abuhong panit nga binadlisan ug puti . . . , kini lig-ong nagbarog diha sa mga pangpang sa kabukiran, habog ug maambong. . . . Sila sama sa mga senturyon sa nahikalimtang kasundalohan, nga anad sa hangin, kainit, kauhaw ug matugnaw nga gabii.” Mao kanay paghubit ni Jon Manchip White sa mga kahoyng quiver diha sa iyang librong The Land God Made in Anger.
Sa aktuwal, ang kahoyng quiver maoy usa sa 150 ka espisye sa aloe nga nagtubo sa habagatang Aprika. Bisag kini adunay tunokon, dugaong mga dahon, kini nagtubo diha sa mga dapit nga diyutay o kaha walay ulan. Kini nabuhi pinaagi sa pagtipig ug tubig diha sa iyang punoan. Sa matag Hunyo ug Hulyo, ang kahoyng quiver makaabiabi sa lokal nga mga langgam, buyog, ug mga unggoy alang sa usa ka abundang piyesta sa nektar gikan sa hayag nga pagkadalag nga mga bulak niini.
Apan, nganong kining kahoya popular nga gitawag ug kahoyng quiver? Tungod kay ang mga Lumad, ang mamugnaong mga mangangayam-maninigom sa habagatang Aprika, nagagamit sa mga sanga sa kahoy aron himoong mga sakoban sa ilang mga pana. Kuhaon sa mapaagihong mga imbentor ang humok lanotong subok sa sanga, ibulad ang gawas gahing panit niini nga mahimong sakoban sa pana. Mao nga kini ginganlan—ang kahoyng quiver.