Gikan sa Among mga Magbabasa

Hormones Giapresyar ko ang artikulong “Hormones​—⁠Ang Katingalahang mga Mensahero sa Lawas.” (Abril 22, 1992) Kamo milampos sa paghubit sa usa sa labing hinungdanon ug komplikado sa tanang nagasustento-sa-kinabuhing mga obra diha sa yanong mga termino. Ang pagkahibalo niining mga butanga mipasamot sa akong pagpabili sa Maglalalang sa atong kahibulongang lawas!

L. F., Italya

Akong nakaplagan nga ang artikulo makatabang kaayo, samtang mao pay pagsugod nako sa pagtuon niining ulohana sa eskuylahan. Ang artikulo maayo kaayong pagkahan-ay ug gipresentar diha sa usa ka paagi nga nagpahimo sa obra sa hormones nga daling masabtan. Ang Pagmata! tinuod gayod nga usa ka edukasyonal nga magasin.

D. A. J., Côte d’Ivoire

Ang akong higala, nga usa sa mga Saksi ni Jehova, regular nga tigsuplay kanako sa inyong literatura. Ang inyong artikulo bahin sa hormones ilabinang nakapaikag kanako. Ako anaa sa ikaduhang tuig sa pagbansay aron mahimong nars, ug samtang kami karon nagtuon bahin sa hormones, ako ilabinang nalipay nga nakabaton sa inyong artikulo. Ako mapasalamaton kaayo nga nakakaplag sa mga Saksi ni Jehova.

Y. L., Alemanya

Mga Curfew Ang inyong artikulong “Mga Batan-on Nangutana . . . Nganong Mopauli Kog Sayo?” may epekto kanako. (Mayo 8, 1992) Ako naanad niadto nga magpagabii ug hinahinay nga mosulod sa balay​—⁠nga makakaplag lamang sa akong inahan nga nagpaabot diay kanako diha sa balkon. Usahay badlongon niya ako nga may mga luha sa iyang mga mata. Sa dihang mamalandong ako niini ug balik, ako nagbasol sa pagkahimong masinupakon. Karon ako nahibalo nga ang si bisan kinsa nga dili maminaw sa tambag ni Jehova tino nga mag-antos gayod sa kadaotan.

T. A., Hapon

Pagkaulay Salamat sa inyong artikulong “Mga Batan-on Nangutana . . . Normal ba ang Pagkahimong Ulay?” (Marso 22, 1992) Ako nahinumdom nga gisungog sa akong mga kauban sa klase, nangutana kon ako ba nakigsekso na. Bisan karon, biaybiayon ako sa mga kauban sa trabaho sa ilang nakaplagan nga ang Bibliya nagdili sa sekso sa dili pa magminyo. Apan, ang gidiling paggawi moresulta sa wala kinahanglanang pagsabak ug sa mga sakit nga mapasa sa sekso. Ang pagsunod sa mga prinsipyo sa Bibliya sa paglikay sa sekso sa dili pa magminyo maoy usa ka panalipod.

G. I. I. L., Brazil

Ako 17 anyos ug usa ka taliabot nga inahan. Wala ako mamati sa tambag sa Bibliya. Ang akong hunahuna nabuksan gayod sa dihang nabasa ko ang inyong artikulo. Wala ko gayod lantawa ang pagkaulay ingong usa ka ‘timaan sa kadungganan.’ Karon ako nangandoy na lamang nga maayo pa untang namati ako niadto sa tambag sa Bibliya.

M. R., Tinipong Bansa

Daghan kaayong salamat sa inyong artikulong “Mga Batan-on Nangutana . . . Nganong Magpabiling Ulay?” (Abril 22, 1992) Sa bata pa kaayo, ako nagbalhinbalhin gikan sa usa ka way-kahulogan nga relasyon ngadto sa lain, nagpangita ug gugma. Ako sa kapait napakyas sa daghang katuigan. Dili mo mahanduraw ang lulan sa pagbating sad-an, kaulaw, ug kasubo nga akong gipas-an niadtong mga tuiga. Sa gibasa ko ang inyong potnot diha sa panid 27 bahin sa pagpasaylo sa Diyos, wala ko kapugngi ang dakong baha sa emosyon ug pagpasalamat nga miawas gikan sa akong kasingkasing ngadto sa Diyos.

A. M., Tinipong Bansa

Katingalahang mga Insekto Usa ka mubong nota lamang sa pagpahayag sa akong apresasyon alang sa artikulong “Katingalahang mga Insekto Nagpakaulaw sa Molupad nga mga Makina sa Tawo.” (Mayo 22, 1992) Ako nagtrabaho diha sa dibisyon sa panukiduki sa usa ka high-tech nga kompaniya, ug ang garbo sa tawo tungod sa iyang mga nahimo tin-aw kaayo. Apan, ang kakomplikado sa kinaiyahan talagsa ra nga dawaton ingong kaugalingong buhat sa Maglalalang. Akong nadunggan kas-a ang duha ka siyentipiko nga naghisgot sa geometrikanhong katahom sa usa ka liso sa kahoyng eucalyptus. Ang ilang konklusyon? “Dili ba Kahibulongan ang Inahang Kinaiyahan?” Tinuod gayod nga nabutaan ang ilang mga hunahuna.

P. G., Tinipong Bansa