Gikan sa Among mga Magbabasa
Artraytis Bag-o ko pang nahuman pagbasa ang artikulong “Pagkat-on sa Pagkinabuhi nga May Atraytis.” (Hunyo 8, 1992) Nagaantos ako sa mosugmatsugmat nga artraytis sulod sa mga 20 anyos. Apan tungod kay wala man kini hingpit nga tambal, ug nahadlok ako sa daotang mga epekto sa medisina, wala akoy gibuhat bahin niini. Sa pagkakaron, bation ko ang kangutngot sa tibuok tuig, ug adunay daghang gabii nga dili ako makatulog. Bisan pa niana, ako nakagugol ug 60 ka oras matag bulan diha sa Kristohanong buluhaton sa pagsangyaw ingong katabang nga payunir. Ugaling, samtang magkaanam kagrabe ang akong sakit ug magkagahi ang akong mga lutahan, sundon ko ang inyong sugyot sa pag-ehersisyo sa labing bug-os kutob sa mahimo.
T. N., Hapon
Nakalabang sa Kampo sa Priso Bag-o pa nakong nabasa ang artikulong “Halayo Gikan sa Balay, Ako Misaad nga Moalagad sa Diyos.” (Pebrero 22, 1992) Bisan tuod nalipay ko sa pagbasa sa makalipay nga sangpotanan alang kang Gerd Fechner, kinahanglan pa bang masayran ang kapintasan sa tawo nganha sa tawo sa maong giladmon?
C. T., Tinipong Bansa
Makasabot kami nga ang pipila sa mga kasinatian nga giasoy bahin sa kinabuhi ni Gerd Fechner sulod sa Rusong mga kampong prisohan tingali makapapikal sa pila ka magbabasa. Busa gihimo ang paningkamot sa paglikay sa paghimo sa materyal nga sobra ka tataw. Bisan pa niana, gibati nga usa ka bahin sa realismo gikinahanglan sa pagtino kon unsay mitukmod kang Gerd Fechner sa pagpangita sa Diyos. Ang pait nga mga kasinatian ni Fechner dugang nagpasiugda sa kamatuoran nga “ang tawo nagagahom sa tawo sa iyang kadaotan.” (Ecclesiastes 8:9)—ED.
Mga Proverbio sa Zulu Ako 15-anyos nga batang babaye nga regular nagabasa sa Pagmata! ug nagahunahuna nga kini labing talagsaon! Ako magaingon nga ang inyong mga magdidibuho mahibalo gayod nga modibuho. Sa dihang nakita nako ang dibuho sa kataw-anag-dagway nga “baka” diha sa artikulong “Mga Proverbio sa Zulu” (Marso 8, 1992), ako dili makahunong sa pagkatawa. Dili ako makasabot nganong daghan kaayong tawo ang dili mobasa sa Pagmata!
J. N., Alemanya
Hormones Dili nako mabatbat sa mga pulong ang akong gibati sa dihang akong nadawat ang artikulong “Hormones—Ang Katingalahang mga Mensahero sa Lawas.” (Abril 22, 1992) Sa Disyembre 1990, ako narekonosir nga adunay pituitary tumor. Kay wala gayoy nasayran bahin sa maong glandula, ako mihimog kaugalingong panukiduki. Ang inyong bag-ong artikulo naghatag kanakog dugang kalamdagan ug mas nasabtan nako ang akong suliran.
L. M., Habagatang Aprika
Mga Apohan Ako otso-anyos ug buot magpasalamat kaninyo alang sa artikulong “Mga Batan-on Nangutana . . . Nganong Miipon Kanamo ang Among mga Apohan?” (Hulyo 8, 1992) Sukad sa pag-ipon ni Lola, matag panahong bansayon ko ang akong silindron, si Lola moingon kanako nga ako nagabanha. Apan may panahong siya nagdayeg usab kanako, sama sa dihang giipisan kog tsa ang iyang tasa ug siya miingon, “Salamat.” Sa dihang nabasa nako ang artikulo, nakaamgo ako nga kinahanglan diay nga ako magmaluluton kang Lola.
S. T., Hapon
Pagkawalhon Ako naikag pag-ayo sa pagbasa sa artikulong “Pagkawalhon—Kakulian o Bentaha?” (Hunyo 8, 1992) Ako walhon, ug bisan tuod sa bata pa ako walay misulay sa pagdili nako sa paggamit sa akong wala nga kamot, lisod ang pagpahiuyon usahay. Pananglitan, lisod ang pagkat-on sa paggamit ug gunting. Ako karon lima ug anak, ug ang akong kinamanghorang anak lalaki walhon. Mga usa ka tuig nga miagi, gisukna ko siya kon haing kamot ang iyang gamiton sa paglabay ug bola. “Kini, Daddy,” mitubag siya, nga giisa ang iyang walang kamot. Unya nangutana siya: “Daddy, nganong ang uban nagagamit sa sayop nga kamot?” Ako mahikatawa gihapon sa dihang akong hinumdoman ang maong espesyal nga gutlo.
D. C., Tinipong Bansa