Usa ka Sulat Alang Kang Mama ug Papa
UNSA ka hinungdanon ang maayong mga ginikanan? Ang mosunod nga sulat nga gikan sa usa ka hamtong nang anak lalaki ngadto sa iyang inahan ug amahan mopasundayag sa ilang bili:
“Minahal nga Mama ug Papa:
“Kapin nag 16 anyos sukad sa akong pagbiya sa balay, mao nga basin ug katingad-anag diyutay nga inyong madawat kining matanga sa sulat gikan kanako karon. Apan human sa dakong pamalandong akong gibati nga kinahanglang isulat kini. Mga tuig kanhi, sa mibiya ako sa inyong balay, gidala ko ang ubay-ubayng butang gikan kaninyo nga wala gyod nako ipananghid kaninyo nga dad-on. Tingalig wala gani ninyo himatikdi nga nawala kana sila. Ngani, tuso kaayo ako sa pagdala niana nga wala ako makaamgo nga kana diha kanako hangtod sa pila ka tuig sa ulahi. Gihinagpat ko kini sa paglista sumala sa mosunod:
“Gugma sa matarong: Ay, kini dako kaayong panalipod kanako!
“Gugma sa katawhan: Ang mga kadakoon, mga porma, ug mga kolor dili bililhon. Ang kinaiya sa kahiladman, mga hunahuna, ug mga pagbati sa mga tawo mao ang hinungdanon.
“Pagkamatinud-anon: Ang ako maoy ako, nga maayong gamiton sa pakig-ambit sa uban. Ayawg hilabti ang naangkon sa uban.
“Determinasyon: Sa labing lisod nakong mga panahon, kini nakapalampos kanako.
“Pailob: Maluluton ug mahigugmaon ug mapailobon kaayo kamo kanako. Wala gayod kamo pul-i nako.
“Disiplina: Dili gayod kamo estrikto kaayo o luag kaayo. Apan wala ako masayod niana kaniadto. Mahimo ba nga inyo akong pasayloon?
“Kagawasan: Kagawasan gikan sa kasakitang nasinati sa labihan ka daghang ubang kabataan samtang nagtubo sila—kasakitang gipaagom sa pisikal, mental, ug emosyonal nga paagi sa abusadong mga ginikanan. Gihunahuna gayod ninyo kon unsay labing maayo kanako, ug gipanalipdan ninyo ako gikan sa kadaot. Dili gayod ako mahikalimot sa inyong gibuhat alang kanako.
“Gugma sa mga butang yano: Kabukiran, kasubaan, asul nga langit, pagbaktas, pagkamping. Gihimo ninyo ang kinabuhi nga makalingaw kaayo. Walay duha ka ginikanan ang makabuhat ug labaw niana. Ug wala gayod ninyo isipa nga samok kana.
“Pahimatngon: Ayaw pagdalidali sa pagtuo sa tanang madungog ninyo. Apan sa dihang tuohan ninyo kana, magpabilin niana, bisan pag unsay mahitabo.
“Ang Kamatuoran gikan sa Pulong sa Diyos: Labing hinungdanon sa tanan. Kini akong panulondon. Walay salapi, mga sakayan, mga balay, o mga butang ang ikatandi niana. Kini maghatag kanako sa labing importante—kinabuhing dayon.
“Lisod bilhan ang mga butang sa itaas. Mahal kaayo kana sila. Gigamit nakog maayo sila. Ug gusto kong ipadayon ang paggamit niana kon dili kinahanglan nga akong iuli kana. Ako naglaom, kon dili kamo supak, nga ipadayon ang paghatag kanila ngadto sa akong mga batang lalaki. Nasayod ako nga makaayo kana sa akong mga anak lalaki ingon nga nakaayo kana kanako. Ug sa kanunay akong ipahibalo kon diin ko kuhaa kana—gikan kang Lola ug Lolo.
“Inyong anak,”
(Ngalan wala ipaila sumala sa hangyo.)