“Tubag sa Akong Pag-ampo”
Mga Magbabasa Misanong sa Serye Bahin sa Alkoholismo
KINI maoy ekspresyon nga among nadungog gikan sa mga magbabasa sa tibuok kalibotan: “Si Jehova nagtubag sa akong mga pag-ampo.” Pinaagi niini, ang mga magbabasa nagtumong sa serye sa mga artikulo nga migula sa among Mayo 22, 1992 nga isyu nga nag-ulohan “Tabang Alang sa mga Alkoholiko ug sa Ilang mga Pamilya.”
Kining pinasikad-sa-Bibliya nga mga artikulo nagpakita kon sa unsang paagi ang alkoholismo makalunod sa entiro pamilya. Ang mga kapikas sa kaminyoon ug ang mga bata sa subsob moduyog sa paglimod nga ang alkoholiko sa pagkatinuod may suliran sa pag-inom. Sila ug uban pa tingali mogamit ug dili-epektibong mga pamaagi sa pagsulay sa pag-usob sa alkoholiko—apan mahimo lamang nga molampos sa pagpadayon sa iyang pagkagiyan. Ang mga sakop sa pamilya kinahanglang mosabot sa kinaiyahan sa alkoholismo, ug espisipikong mga sugyot ang gihatag aron tabangan sila sa pagbungkag sa iyang makadaot nga kupot. Ang impormasyon gitumong usab ngadto sa hamtong nga mga anak sa mga alkoholiko aron tabangan sila sa pag-ila—ug pag-ayom—sa ilang mga samad sa emosyon. Nan, dili katingad-an nga kining mga artikuloha nakapahinabog dramatikong sanong sa among mga magbabasa!
Usa ka babaye nagsulat: “Sa dihang akong nakit-an ang hapin, nangurog ako. Kining milabay nga usa ug tunga ka tuig, masakiton ako kaayo. Niadtong Disyembre, nagsugod ang akong grabeng mga atake sa kalisang ug mga bugno sa kaguol. Ako gipadako sa usa ka alkoholikong amahan apan mibati nga kabuangan ang pag-ugkat sa nangagi. Sa dihang nadawat nako ang inyong magasin, akong gibasa kana ug gibasa kanag subli-subli. Sa unang higayon, akong nasabtan ang akong kaugalingon.”
Dose-dosenang mga magbabasa ang nakapahayag sa susamang mga pagbati. Usa ka 16-anyos nga may alkoholikong amahan nagtawag sa mga artikulo nga sinugdanan sa proseso sa iyang pagkaayo. Matud sa laing magbabasa: “Tigbasa na ako ug Pagmata! sukad niadtong 1969, ug wala pay impormasyon masukad ang may samang dakong epekto kanako. Tapos sa mga tuig sa pagbati nga usa ka kapakyasan, mibati gani ako nga napakyas nako si Jehova. Unsa may diperensiya kanako? Ako naminyo nga dala ang samang matang sa kasakit ug kaulaw nga akong gihunahuna nga ako nang gibiyaan ug nagmatuto ug lima ka mga bata sa usa ka alkoholikong palibot. Dili nako sila mahatagan ug emosyonal nga seguridad nga ilang gikinahanglan. Ang Mayo 22 nga Pagmata! nakabukas ug dalan kanako! Salamat kang Jehova sa pagtabang kanako nga masabtan ang akong kahuyangan.”
Dili ikatingala, ang mga artikulo nakatabang sa daghang mga magbabasa sa espirituwal nga paagi. “Sa dugayng panahon, ako nag-antos tungod sa dili nako pagpadapat sa mga prinsipyo sa Bibliya,” angkon sa usa ka babaye sa Hapon. “Ako nag-ampo sa Diyos aron tabangan ako sa pag-usob sa akong personalidad. Mga pipila ka adlaw sa ulahi, akong nadawat kining magasina. Kana nagtudlo kanako sa mga katarongan alang sa akong mga panggawi ug naghatag kanako sa kaisog nga sulayan sa pagpasigo sa mga butang.”
Ang mga artikulo nakatabang sa pila ka mga magbabasa nga makalusot sa mga bungbong sa pangulipas. “Ako usab usa ka biktima sa alkoholikong amahan,” matud sa usa ka Canadianhong babaye. “Apan pagkatapos lamang sa pagbasa sa inyong artikulo nga kana misantop nga kusganon kanako kon unsay akong suliran. Ako nagdako nga naglimod nga adunay usa ka suliran sa balay. Karong adlawa naghimo akog lakang ngadto sa pagkaayo pinaagi sa pagpakigsulti ngadto sa usa ka hamtong nga Kristohanong sister. Ako nahingangha sa pagkadungog nga ang iyang amahan usab maoy usa ka alkoholiko.”
Alang sa uban, ang materyal nagpahanaw sa mga pagbati nga nag-inusara. “Kadto maoy samag-terapiya alang kanako sa pagbasa niining mga artikuloha,” matud sa usa ka magbabasa, “kay karon ako mibati nga ako adunay Kristohanong mga brader ug mga sister nga nakabati sa akong mga pagbati ug nakasabot.”
Daghang mga magbabasa ang mihilak samtang ilang gibasa ang mga artikulo. “Sa pagkakita lang gayod nako sa ulohan, misugod ako sa paghilak,” tug-an sa usa ka babaye. “Ang akong amahan usa ka alkoholiko, sama sa akong bana. Wala nako maamgohi kon unsa ka dako ang nahimong bahin sa alkoholismo sa pagdaot sa akong pagkabata. Kana nagdaot sa akong kaminyoon, ug hapit na kanang milaglag kanako. Ako naghilak tungod kay mga kipatkipat sa kahayag ang nasabwag sa mga pangutana nako sukad sa akong kinabuhi, sama sa, ‘Nganong kanunay akong mobati nga walay bili? Nganong mahadlokon ako kaayo sa pagsalig? Unsa kining kahaw-ang sa sulod nako?’”
Ang uban mibati nga ang mga artikulo nagtubag sa ubang maukitong mga pangutana. Usa ka batan-ong lalaki gikan sa Finland nag-ingon: “Gusto kong mahibaloan ang mga pagbati sa akong kahiladman, kay ako dili makasalig sa mga tawo o makapakita ug mainitong mga pagbati.” “Ang impormasyon mao gayod ang akong gikinahanglan,” uyon sa usa ka babaye. “Ang isigka-Kristohanon sa subsob modayeg kanato tungod sa maayong panig-ingnan ingong usa ka pamilya. Bisan ang atong mga silingan mokomplemento kanato. Bisan pa, niining tanang kalamposan, ako sa makadaghang higayon mibati nga, sa kahiladman, adunay diperensiya kanako. Usahay sagubangon nako ang mga pagbati sa pagkasad-an ug mubo nga pagtamod-sa-kaugalingon, apan dili gayod nako masabtan kon ngano. Ang mga artikulo nakatabang kanako sa pagtan-aw sa daghang mga butang diha sa mas timbang nga paagi. Ang akong mga samad nagsugod sa pagkaayo.”
Ang hingkod nga mga anak sa alkoholikong mga ginikanan sa subsob nag-antos sa mga pagbati nga sad-an. Hinuon, timan-i kon unsay gisulat sa usa ka magbabasa gikan sa Hapon: “Sa dihang ang akong hubog nga amahan mokulata sa akong inahan, moantos akog mental nga kabug-at ug kakugang. Lud-on ako ug mosuka! Siya moingon, ‘Kon moundang kamo sa Bibliya, undangan nako ang pag-inom.’ Hinuon, kining artikuloha nagtudlo kanako nga ang mga alkoholiko mosulay sa pagpasangil sa ilang pag-inom sa uban ug nga kita dili kinahanglang magpadala niana! Ako mibati nga morag gibuhian.” Gikan sa Brazil usa ka magbabasa nagsulat: “Sa dihang ang akong amahan moinom, kanunay niya kaming basolon. Sa daghang higayon nga ako mibati nga kana akong sayop. Ang mga artikulo nagtabang kanako nga makita nga kana dili sayop sa akong inahan ni akong sayop.”
Ang mahigugmaon Kristohanong mga ansiano mahimong usa ka importanteng tinubdan sa tabang. (Isaias 32:2) Ang mga artikulo sa alkoholismo gidesinyo sa pagtabang sa mga magtatan-aw sa kongregasyon sa pagsagubang sa mga suliran nga epektibo. (Isaias 50:4) Usa ka Kristohanong babaye naghinumdom: “Ako nagagamit ug antidepressants sa mga katuigan; ang akong doktor mihangyo kanako sa pagkuhag propesyonal nga tambag. Apan dili ako komportable sa pagpakigsulti sa usa ka estranyo mahitungod sa akong mga suliran. Akong gitawag ang mga ansiano, ug pinaagi sa pagpakigsulti kanila, kauban sa akong bana, nakaarang ako sa pagpahungaw sa daghan sa akong mga kahadlok, kalagot, kapakyasan, ug mga pagbati nga sinalikway.”
Sa masabog ang propesyonal nga tabang gikinahanglan aron sa paghusay sa mga isyu nga gimugna sa alkoholismo. Samtang ang mga artikulo wala magsugyot sa bisan unsang partikular nga terapiya, daghang mga magbabasa nag-asoy sa ilang personal nga mga kasinatian. “Ang akong bana nag-apil sa usa ka programa sa pagtambal sa alkoholiko,” asoy sa usa ka babaye. “Kadto maoy sinugdanan lamang sa usa ka tulo-ka-tuig nga pakigbugno alang kanamong duha. Nagsugod kami sa malimbasogon senemanang terapiya. Kami walay paagi sa among kaugalingon nga makaplagan ang dalan paguwa sa maong emosyonal nga kangitngit.” Usa ka Alemang babaye nga nagtrabaho sa usa ka klinika alang sa makagiyan nga mga sakit nagdugang: “Daghang salamat sa pagpaila nga ang mga tawo nga nag-atubang sa mga suliran ug nangitag tabang maoy mga lig-on—dili kadtong nagasumpo o nagpagamay sa mga butang. Inyong gipatin-aw nga dili maulawan ang usa ka tawo nga nagapatambal.”
Samtang makalipay ang pagkasayod niining maayong sanong sa mga artikulo, kami nahibalo ug maayo nga ang pagkaayo sa emosyonal nga mga samad sa alkoholismo usa ka dugay ug sa subsob lisod nga proseso. Kami nagaampo alang kanila nga, pinaagi sa tabang ni Jehova nga Diyos, nakigbugno niining seryosong mga isyu. Usa ka magbabasa nag-ingon: “Ako nagdako uban sa usa ka alkoholikong amahan. Bisan tuod ako malipayon nga nag-alagad kang Jehova, ang emosyonal nga mga samad dayag gihapon. Pinaagi sa tabang ni Jehova, dako ang akong alibyo, apan uyon ako nga ang bug-os nga kaayohan moabot lamang sa bag-ong kalibotan ni Jehova.”—Isaias 65:17.