Paghatag—Usa ka Tuboran sa Kalipay
Sinulat sa koresponsal sa Pagmata! sa Alemanya
KINSAY dili malipay nga makadawat ug matahom nga gasa? Pagkamakapalipay nga masayod nga adunay tawong nagatagad! Apan, susama nga makapatagbaw mao ang kalipay sa paghatag. Sa pagkatinuod, matud pa ni Jesus, ang magtutukod sa Kristiyanidad, “adunay labaw nga kalipay ang paghatag kay sa pagdawat.”—Buhat 20:35.
Ang Bibliya nag-asoy ug daghang higayon sa paghatag, usahay sobra pa nga paghatag. Sa nakita mismo sa rayna sa Sheba ang kaalam ni Haring Solomon, “siya mihatag sa hari ug usa ka gatos ug kaluhaan ka talento nga bulawan ug daghan kaayong lana sa balsamo ug mahalong mga bato.” (1 Hari 10:10) Ang bulawan lamang mokantidad na ug kapin sa 46 ka milyong dolyar sa bili karon! Ug tibuok siyudad ang gigasa ni Paraon sa Ehipto sa usa sa iyang mga anak nga babaye!—1 Hari 9:16.
Apan ang mga gasa dili kinahanglang mahal aron mahimong tuboran sa kalipay. Tingali nahinumdom ka sa buotan nga Samaritano sa sambingay ni Jesus, nga kinabubut-ong mitabang sa iyang isigkatawo nga nanginahanglan. (Lucas 10:30-37) O sa Kristohanong kongregasyon sa Corinto nga nagpadala sa ilang kabos nga mga igsoon sa Jerusalem ug “gasa sa kalulot.”—1 Corinto 16:3.
Tingali ang labing-iladong pananglitan sa paghatag nga gihisgotan sa Bibliya, hinunoa, mao kanang sa mga astrologo—nga naila sa kadaghanan nga mao ang malaamong mga tawo—nga nagdalag mga gasa ngadto sa batang si Jesus. Gibase sa daghang tawo ang ilang kustombre sa pagpanghatag ug pinaskohan niining hitaboa.—Mateo 2:2-11.
Unsay Ikasulti Bahin sa Paghatag ug Pinaskohan?
Dili-ikalimod, daghan sa tim-os malipay kon sila malangkit sa gitawag nilang espiritu sa Pasko—ang espiritu sa paghatag. Ang uban kanila nagplano nang daan, magarbohon sa pagpangitag talagsaong mga pinaskohan ug nagapangitag nahiangay nga mga kard. Ang ulahi, lain pay ato, mitungha sa unang higayon sa mga tuig 1840 sa Inglaterra, apan lantugionon pa kon kinsa man ang mipailaila niini. Apan kon gasa man kini o usa ka kard, ginakalipayan sa daghan ang pagpangitag espesyal nga pinaskohan alang nianang espesyal nga tawo.
Sa laing bahin, dili ikalimod nga daghan sa mga tighatag ug pinaskohan wala mahulog niini nga kategoriya. Ang usa ka Aleman nga tag-iyag tindahan miingon bahin sa mga pumapalit sa panahon sa Pasko: “Sa magkaduol kita sa Bisperas sa Pasko, mas mabalak-on ang mga tawo. Sa kataposan, mopalit na lamang sila ug bisan unsa nga ilang makita.”
Ang pagdutdotay diha sa naghuot nga mga department store nianang makahurot-sa-panahong pagpangitag maanindot nga mga gasa mopahinabo sa pila ka pumapalit sa pagbagulbol sa kalisod, sa pagdalidali, ug sa kabug-at. Sumala sa usa ka mantalaan sa Austria, ang matag ikatulo nga kostumer nagbagulbol sa “magubot nga paso,” nag-ingon nga siya mahuwasan lamang “dihang matapos na kining pagdalidali.” Ug ang mga tin-edyer nga Aleman, sa dihang gipangutana kon unsay ilang gibati labot sa Pasko, mitubag sa mga komentong sama niini, “Maglagot ako niini,” “Maglibog ka kon unsay imong ihatag,” ug, “Mahal pa.”
Dayag nga dili tanan ang nakasinati nga mas dakong “kalipay ang paghatag” nga gisulti ni Jesus. Walay duhaduha tungod kini kay ang Pasko sa katibuk-an gihimong negosyo, nahimong hinungdan sa kasuko sa daghan. Sumala sa The World Book Encyclopedia, “mga ikaupat ka bahin sa halin sa usa ka tuig sa kadaghanang mga tindahan mahitabo sa panahon sa Pasko.” Dayag ang “Jingle Bells” nga gustong mabati sa kalibotan sa komersiyo mao ang pagbagting sa mga kaha niini.
Tin-aw, ang paghatag sa panahon sa Pasko sagad napakyas sa paghatag kalipay nga dala sa paghatag. “Mahadlok ako ug Pasko,” miingon ang usa ka babayeng Katoliko.
Dili ikatingala nga gikuwestiyon ang pagkahusto sa paghatag ug pinaskohan. Makataronganon ba gayod kana?