Usa ka Musiyo sa Kalaglagan ug ang mga Saksi ni Jehova
ANG makahahadlok nga pagmando sa Nazi nagpahamtang ug makalilisang nga pagpamatay sa minilyong biktima, ilabina sa mga Hudiyo ug mga Slav. Bisan pa niana, usa ka relihiyosong grupo—mga Saksi ni Jehova—hiniusang midumili sa pagpasakop sa pamunoan sa Nazi, dili tungod sa rasa o nasyonalidad, apan tungod sa ilang matanlagong pagtapot sa mga prinsipyo sa Bibliya.—Juan 17:14, 16.
Ang Estadong Nazi nagtumong sa hilabihang paglutos sa mga Saksi ni Jehova—usa ka pagdasdas nga dili gayod katumbas sa ilang gidaghanon. Ngano? Ang mga Saksi, tungod sa relihiyosong mga katarongan, midumili sa pagpamembro ug pag-alagad sa German Labor Front ug misalikway sa bisan unsang panumpa kang Hitler ingon nga Fuhrer. Busa ang mga Nazi nagdili kanila ingon nga organisasyon niadtong Abril 1933. Gisumbong sa sibil ug relihiyosong pagsukol, sila lakip sa unang mga grupo nga gibalhog ngadto sa kampo konsentrasyon. “Sa kaulahian, kapin sa 30,000 ka Saksi ang gilutos sa mga Nazi,” nag-ingon ang usa ka sulat-balita sa musiyo.
Ang United States Holocaust Memorial Museum, nga nahimutang sa Washington, D.C., gipahinungod sa pagpahayag sa estorya sa tanang grupo nga gilutos sa mga Nazi, lakip ang mga Saksi ni Jehova. Usa ka tinubdan nag-ingon nga ang musiyo “kinahanglang sa linain makapainteres sa mga Amerikano ug langyawng mga bisita sa Hudiyohanon ug mga Saksi ni Jehova nga relihiyon nga maoy gitumong sa pagpuo sa kaliwat pinaagi sa pamunoan ni Hitler.” Pinaagi sa mga butang sa arte, mga dokumento, gipatik sa video nga pahayag sa mga saksi, makasaysayanhong mga hulagway, ug pelikula, ang panahon sa gubat nga mga kasinatian sa lainlaing nabiktimang mga grupo nalakip sa mga pasundayag sa musiyo, sa libraria, ug sa tipiganan sa mga dokumento. Ang musiyo nagtala sa video sa interbiyo uban sa 74 ka Saksi ni Jehova kinsa mga biktima sa pagmando sa Nazi. Ang musiyo gibuksan sa publiko niadtong Abril 1993.
[Picture Credit Line sa panid 31]
Sa maayong kabubut-on sa United States Holocaust Memorial Museum