Usa ka Kalibotan nga Walay Gubat

ANG makapadasig nga tagna sa Isaias kapitulo 2 tinuod nga nakakaplag ug katumanan sa atong mga adlaw. Usa ka kalibotan nga walay gubat haduol na. Milyon-milyon nang mga Saksi ni Jehova sa tibuok kalibotan nagahimo na sa “ilang mga espada nga mga punta sa daro ug ang ilang mga bangkaw ingong mga galab.” Bisag gikan sila sa tanang nasod ug kagikan, sila nakakat-on sa pagbuntog sa kanhi nga pagpihig ug pagdumot, ug sila nakakat-on sa mga dalan sa Diyos sa matuod nga kalinaw, si Jehova. (Isaias 2:4) Tungod niining mahigugmaon-ug-kalinaw nga baroganan, sila nakaagom sa samang kasinatian sa mga Hudiyo diha sa mga kampong konsentrasyon (1933-45).

Bisag mahayag tan-awon ang mga palaabuton sa umaabot, kini sa pagkatinuod dili gayod mahayag alang sa tanan. Si Jehova dili maghulat sa walay kataposan aron himoon sa tanang tawo ang ilang mga espada nga mga punta sa daro. Adunay mga tawo nga dili andam sa paghimo niini. Klarong gipadayag sa salmista ang dulnganan nila: “Kay ang mga daotan pagaputlon, apan kadtong nagahulat sa GINOO​—magapanunod sa yuta. Sa dili madugay wala na unyay tawong daotan; ikaw mangita kon hain siya​—siya mahanaw na.” (Salmo 37:9, 10) Oo, sa haduol na kaayo nga umaabot, si Jehova molihok, ‘magatapos sa mga gubat sa tibuok nga yuta.’​—Salmo 46:9-11 (46:8-10, NW).

Ang samang tagna ni Jesus nga naghatag sa ilhanan sa kataposang mga adlaw nagpasiugda usab bahin sa pagkaduol sa pagpangilabot sa Diyos. Si Jesus miingon: “Kining kaliwatana [ang kaliwatan sa 1914 nga nakasaksi sa kataposan sa “tinudlong mga panahon”] dili gayod mahanaw hangtod mahitabo kining mga butanga.” (Mateo 24:34; Lucas 21:24, NW) Kanang kaliwatana hapit nang mahanaw. Oo, karon na ang panahon sa paghukom alang sa tanang katawhan! Karon, niining kataposang mga adlaw, o “kinaulahiang mga adlaw,” (JP) kinahanglang kita mopili kon kaha kita ‘motungas sa bukid ni Jehova’ aron ‘pagatudloan sa Iyang mga dalan’ o dili. Apan sumala sa ato nang nakita niini nga panaghisgot, dako kaayo ang nalangkit sa pagkaila sa matuod nga Diyos, ‘sa pagkahimong tinudloan sa Iyang mga dalan, sa paglakaw sa Iyang mga alagianan.’ (Isaias 2:2, 3, NW, Ta) Ang pagbuhat niini dili maoy pagbasa lamang ug magasin o pagkuhag mubong kurso sa pagtuon. Kini naglangkit ug mas lalom nga instruksiyon nga makaapektar sa bug-os nga paagi sa kinabuhi sa usa. Buot ka bang masayod ug dugang pa bahin sa Diyos sa kalinaw?

Ang mga Saksi ni Jehova andam sa pagtabang kanimo aron maghimo ka ug seryoso nga pagsusi. Among gidasig ka sa pagpadayon sa pagsusi niining ulohana sa bug-os nga kaikag, aron ikaw usab mahimong usa niadtong ‘motungas sa bukid ni Jehova, tungod sa pagkahimong tinudloan sa Iyang mga dalan.’ Alang sa dugang tabang, pakigkita sa mga Saksi ni Jehova diha sa Kingdom Hall nga duol nimo, o pagsulat sa mga magpapatik niining magasina. (Tan-awa ang panid 4.)