Modernong Musika—Paglikay sa mga Laang

ANG pipila maglalis sa mga kaayohan ug mga kadaotan sa pagsensura sa musikang rock. Ang uban magdebate sa makadaot nga mga epekto niini diha sa mga tin-edyer. Apan kon Kristohanon ka, kining mga paghisgota ikaduha lamang sa pangunang isyu: Sa unsang paagi makaapektar ang musika sa imong relasyon sa Diyos?

Ang giya sa kinabuhi sa Kristohanon mao ang Pulong sa Diyos, ang Bibliya. Kini adunay mga prinsipyo mahitungod sa matag bahin sa kinabuhi, apil ang kalingawan. Ang mga lagda sa Bibliya magapanalipod sa mga masinundanon gikan sa butang nga dili maayo ug makadaot. Dugang pa, ang pag-uyon sa Diyos nagdepende sa pagkamasinugtanon sa iyang Pulong. Busa, ang mga prinsipyo diha sa Pulong sa Diyos magagiya sa usa ka Kristohanon sa pagpili ug musika. (Salmo 43:3; 119:105; 2 Timoteo 3:16, 17) Nan, unsa ang Kasulatanhong mga latid nga mobulig sa atong pagpilig musika?

Ang Panginahanglan sa Panimbang

Ang Ecclesiastes 7:16 nagpasidaan: “Dili ka magpalabi pagpakamatarong, ni magpakita nga ikaw labihan ka maalamon. Nganong ipahinabo nimo ang kalaglagan sa imong kaugalingon?” Sa dili pa isalikway ang usa ka pisa sa musika ingong daotan, suknaa ang imong kaugalingon kon kaha ang isyu tingali maoy personal nga kagustohan. Hinumdomi, tingali dili ka moangay sa usa ka pisa sa musika, apan kana dili gayod mohimo niana nga daotang musika.

Ang pikas nga bahin sa panimbang gipadayag sa Ecclesiastes 7:17, 18: “Dili ka magpalabi pagpakadaotan, ni mahimong buangbuang. Ngano man nga mamatay ka sa dili pa nimo panahon? Maayo nga kuptan mo ang usa apan gikan usab sa lain ayaw pagkuhaa ang imong kamot; kay siya nga mahadlok sa Diyos molikay nianang tanan.”

Nan, unsa man kon ang Kristohanon manimatig musika nga nagdasig sa kabangisan, rasismo, imoralidad, pagsimba sa Yawa, ug paghikog? Ang Efeso 5:3, 4 nagtino: “Ang pakighilawas ug ang tanang matang sa kahugawan o kadalo ayaw ninyog hisgoti sa inyong taliwala, ingon nga angay kini sa mga tawong balaan; ni ang makauulawng kagawian ni sulting binuang ni ang mahilas nga katistis, mga butang nga dili angay, apan hinunoa ang paghatag sa mga pasalamat.” Oo, kadtong nagtinguha nga makighigala kang Jehova dili maghimo sa makapadaot nga mga butang nga ilang kalingawan. Sila dili mangatarongan nga basta sila wala magbuhat niining daotang mga butang, maayo ra ang pagkalingaw niini.

Dili lamang mga pulong sa usa ka awit ang mohimo niana nga maayo o daotan gikan sa Kasulatanhong panglantaw. Unsang espiritu ang gidasig niini? Palihog basaha ang Galacia 5:19 ngadto 23 sa imong Bibliya. Haing listahan ang nagbatbat nga labing maayo sa espiritu sa musika nga imong gipamatian? Kon ang musika kaamgid sa “mga buhat sa unod,” nan ang hunahuna ni Jehova bahin niini tin-aw kaayo.

Kon mosulay ang usa ka Kristohanon sa pagsagol sa iyang kinabuhi sa balaang pag-alagad sa Diyos uban sa daotang musikal nga kalingawan, iyang makaplagan nga kana sila dili gayod magkaangay. Kini nahisama sa pag-inom ug sinambog nga duga sa prutas ug hilo. Ang duga sa prutas dili makapugong sa hilo sa pagpatay kanimo. Ang mga pulong sa 2 Corinto 6:14-17 nagapatin-aw niini: “Ayaw kamo pagpayugo nga dili magkaangay uban sa mga dili-magtutuo. Kay unsang panag-uban ang nabatonan sa pagkamatarong ug pagkamalapason? O unsang panag-ambitay ang nabatonan sa kahayag uban sa kangitngit? Dugang pa, unsang panag-uyon ang anaa tali kang Kristo ug kang Belial? O unsa ang bahin sa usa ka tawong matinuohon uban sa usa ka dili-matinuohon? . . . ‘Busa gumula kamo gikan sa ilang taliwala ug bumulag kamo,’ matud ni Jehova, ‘ug hunong na kamo paghikap sa butang nga mahugaw.’”

Nan, kini sila ang Kasulatanhong mga isyu nga giatubang niadtong nagtinguhag suod nga relasyon uban sa Diyos. Kon nagpabili ka sa mga prinsipyo sa Bibliya, susihang maugdang ang musika nga imong gipamatian. Mainampingong susiha ang imong koleksiyon sa mga rekord ug mga video. Ilabay kadtong naglapas sa mga prinsipyo sa Bibliya. Kon nagduhaduha, ilabay gihapon kana sila. Mao usab sa personal nga mga konsiyerto ug sa mga basahon​—ihikling ang bisan unsang walay tukmang pakiglabot sa pagkamatarong.

Ang Kiling sa Paghimog mga Pasumangil

Kon madani ka sa musika nga anaa sa utlanan o lapas na sa Kasulatanhong mga latid, tingali malisdan ka sa pag-atubang sa isyu nga walay pagkamadapigon. Ang uban mohimog mga pasumangil sa paningkamot sa pagdepensa ug pagpakamatarong sa ilang mikompromisong baroganan. Kon makaplagan nimong kini tinuod sa imong kahimtang, hunong ug mamalandong. Husto ba ang imong pangatarongan, o kana ba yanong nagsumbalik-silaw sa imong pagkawili na sa musika? Tagda ang mosunod nga mga argumento nga gihatag sa pipila ug matikdi nga, kon susihon, ang maong mga pangatarongan mosangpot nga mga pasumangil lang.

Dili peligroso nga mamati ko niining grupoha kay ang mga membro niini nagasupak sa pag-abusar sa droga. Apan ang grupo ba lig-ong nagabarog batok sa ubang mga daotang buhat, sama sa pakighilawas, kabangisan, ug kawalay-pagtahod sa awtoridad? “Ang diyutayng igpapatubo magapatubo sa tibuok minasa,” matud sa Galacia 5:9.​—Itandi ang Santiago 2:10.

Ang kinabuhi niining kalibotana labihan ka walay-hustisya. Mabasol ba gayod nato ang maong mga grupo sa pagpahayag sa ilang kasuko tungod sa mga kahimtang sa kalibotan? Ang Bibliya nagdasig sa matarong nga kasuko batok sa mga kadaotan niining sistemaha apan nagpunting sa Mesiyanikong Gingharian ingong solusyon.​—Daniel 2:44; Mateo 6:9, 10.

Ang masanag nga paglaom sa Kristohanon lahi sa masulob-ong kadili-malaomon sa daghang musikero nga nagpasiugdag rebolusyonaryong reporma o nihilism ingong solusyon sa kagul-anan sa katawhan. Sa pagkatinuod, ang kasuko sa kalibotan maoy malaglagon ug mananapon, nga nagsumbalik-silaw sa kaalam sa sistema sa mga butang.​—Roma 12:9; Santiago 3:15-18.

Ang mga musikero maoy hanas, nga maayo kaayong pagkabansay. Apan ang kahanas sa pagpasundayag sa usa ka musikero walay kalabotan sa pagtulotimbang sa musikal nga unod kon itandi sa mga prinsipyo sa Bibliya, dili ba? Si Haring Solomon hanas sa daghang natad, apil sa natad sa musika. Apan sa dihang siya mibulag sa matuod nga pagsimba, ang Bibliya nagtaho, “si Jehova nasuko kang Solomon, tungod kay ang iyang kasingkasing nakiling nga pahilayo kang Jehova.” Sa susama, si Nimrod maoy usa ka hanas nga magtutukod ug mangangayam, apan siya ug iyang mga kauban wala uyoni sa Diyos. Ngano? Kay si Nimrod maoy “usa ka gamhanang mangangayam nga supak kang Jehova.”​—1 Hari 11:9; Genesis 10:8, 9.

Ang pipila sa mga awit sa grupo dili daotan, nga naapil pa ang pipila ka mananoy nga saloma. Ang kapeligrohan dinhi mao nga ang dili-makadaot nga honi makaagak sa usa sa pagpalit ug pagpamati sa tibuok rekord o teyp, nga kadaghanan niana tin-aw nga dili maayo. Maingon nga ang usa ka tasang tubig dili makahugas sa tapok sa lapok, ang panagsang dili-makadaot nga awit dili makapausab sa katibuk-ang espiritu sa makadaot nga album o banda.

Ang mga inilang musikero wala gayod magsimba kang Satanas o magkinabuhing imoral. Sila nagapasundayag lamang sa entablado. Ang kamatuoran nagpabilin nga ang musikang ilang gigamit sa paglingaw sa ilang mga mamiminaw nawisikan, kon dili man nasuhopan, sa pagkadaotan. Ang Colosas 3:8 nagpahimangno sa mga Kristohanon, nga dili malingaw sa mga butang nga sama sa kasuko ug mapasipad-anong sinultihan, kondili “isalikway kanang tanan.” Si Pablo nagsulti sa mga taga-Efeso nga “mohunong na sa pagpakig-ambit uban sa [mga anak sa pagkamasupilon] diha sa dili-mabungahong mga buhat nga iya sa kangitngitan, apan, hinunoa, magbadlong pa gani kanila.” Ang usa ba ka tawo nga malingaw sa mga buhat sa kangitngitan makahimo sa pagbadlong niadtong nagabuhat niana?​—Efeso 5:6, 11.

Dili man ko mamati sa mga pulong. Mamati lang ko sa honi. Apan ang mga pulong madumdoman sa nagpahipi nga hunahuna ug makamugnag mga suliran sa ulahi. Bisan pag kita naghunahuna nga ang impormasyon nawala na sa atong mga hunahuna, kini basin dili gayod mahikalimtan. Nan, pagkapeligroso ang tinuyong pagladlad sa atong kaugalingon sa mga mensaheng laktud nga nahisupak sa tambag sa Filipos 4:8, nga atong itumong ang atong mga hunahuna sa butang maputli, hiligugmaon, ug dalayegon.

Hinumdomi, usab, nga si bisan kinsa “nga buot mahimong higala sa kalibotan nagahimo sa iyang kaugalingon nga kaaway sa Diyos.” Kini maoy tungod kay ang kalibotan sa katawhan nga nabulag sa Diyos ug ang espiritu sa kalibotan mao ang mga produkto sa pangunang Kaaway ni Jehova, si Satanas nga Yawa. Karon palandonga kana. Moangay ba ang usa ka lalaki kon ang iyang asawa magpasundayag ug letrato sa kanhing hinigugma bisan pag moangkon siya nga wala na siyay pagmahal alang kaniya apan dekorasyon lamang ang hulagway? Dili, gusto niya nga kana mawala sa balay ug mawala sa panumdoman sa iyang asawa. Unsa man kon dad-on nato sa atong mga balay ug mga kasingkasing ang musika nga nagsilbi sa katuyoan sa Kaaway ni Jehova? May kalainan ba gayod kang Jehova kon moangkon kita, “Interesado lang ako sa honi; dili ko tagdon ang mga pulong”?​—Santiago 4:4; 1 Corinto 10:21, 22.

Lihok Dayon

Kon nagladlad ka sa imong kaugalingon sa musika nga nagpasiugda sa daotang buhat, unsa ang imong tinuod nga katarongan? Tingali dili ka mouyon sa daotang mga ideya, apan ang musika mismo basin makapadani kaayo kanimo​—ang kompas makapagiyan kaayo, makawiwili—​nga dili ka makasalikway niini ug dili mo buot hunongon kini.

Apan ang pagbuhat sa matarong nga butang dili kanunayng sayon. Kita masulayan ilabina sa dihang ang mga sukdanan sa Diyos magmando kanato sa pagbulag sa butang nga atong gimahal. Mangatarongan ba kita nga ang atong kaso linain ug magpadayon sa “pagtakiang sa duha ka magkalaing mga hunahuna,” o molihok ba dayon kita batok sa gidumtan ni Jehova?​—1 Hari 18:21.

Bisan pa sa nalangkit nga personal nga pagsakripisyo, kita mahimong labing malipayon kon mopili kita sa butang makapahimuot kang Jehova. Kini nagkahulogan nga kinahanglang mohunong kita sa paghikap sa butang mahugaw. Kon buhaton nato kana, nan si Jehova nagsaad nga pagadawaton niya kita. Oo, pagaisipon niya nga kita nahiapil sa iyang katawhan nga giuyonan.​—2 Corinto 6:17.

Ang atong kaayohan anaa sa kasingkasing ni Jehova. Siya nagbuhat sa iyang mga sugo aron mapauswag ang matang sa atong mga kinabuhi. Sanong sa iyang sinserong hangyo sumala sa makaplagan sa Isaias 48:17, 18. “Ako, si Jehova, mao ang imong Diyos, ang Usang nagatudlo kanimo sa pagpahimulos, ang Usang nagapahinabo nga ikaw molakaw sa dalan nga angay nimong pagalaktan. Oh maayo unta kon ikaw magtagad sa akong mga sugo. Unya ang imong kalinaw mahisama sa usa ka suba, ug ang imong pagkamatarong mahisama sa mga balod sa dagat.”

[Kahon/​Hulagway sa panid 10]

Responsabilidad sa mga Ginikanan

Kon ikaw usa ka ginikanan, ikaw may Kasulatanhong responsabilidad nga tudloan ang imong mga anak sa pag-ila sa kalainan tali sa maayo ug sa daotang musika. Kini nagkahulogan nga mahibalo ka sa ilang ginapamatian. Kini nagkahulogan nga magmalig-on ka bahin sa kon unsang musikaha ang itugot ug dili nimo itugot diha sa balay.

Mangatarongan ka sa imong mga anak. Likayi ang mga argumento nga mopahuyang sa pagkakatuohan. Ang mga pamulong sama sa, “Dili ako makasabot nganong mamati ka nianang basuraha,” lagmit motukmod sa mga batan-on nga mangupot nga hugot pa sa ilang kaugalingong mga gusto. Ang pagpunting sa daotang estilo sa kinabuhi sa usa ka musikero tingalig dili usab makapakombinsir, ilabina kon kini wala isumbalik-silaw diha sa musika. Usa ka batan-ong lalaki mipatugbaw: “Ang usang moingon nga daotan ang tanang musikang rap, sa akong hunahuna ignorante gayod!”

Busa magpakisayod sa imong kaugalingon. Sayra kon unsa ang panglantaw sa Diyos niining mga butanga. Ang mga Saksi ni Jehova malipay nga motabang pinaagi sa pagtagana kanimog gibase-sa-Bibliya nga mga basahon nga maghisgot nga labi pang detalyado. Sayra ang mga kamatuoran. Tin-awa nga ang isyu mao ang mga sukdanan sa Bibliya ug dili ang pagpatuman sa imong personal nga kagustohan diha sa imong mga anak.​—Efeso 6:4.

[Hulagway sa panid 9]

Kon ang Kristohanon mamati sa makadaot nga musika, siya ba sa tinuoray makabadlong sa uban batok niana?

[Hulagway sa panid 11]

Ikaw mahimong mas malipayon kon imong isalikway ang butang gidumtan ni Jehova